இந்தியாவிலேயே அதிக மக்கள் தொகை கொண்ட மாவட்டம் எது? அது எந்த மாநிலத்தில் இருக்கு தெரியுமா?

இந்தியா தற்போது உலகளவில் அதிக மக்கள்தொகை கொண்ட நாடாக மாறியுள்ளது. 28 மாநிலங்களும், 8 யூனியன் பிரதேசங்களும் உள்ள இந்தியாவில் நிர்வாக வசதிக்காக 800-க்கும் மேற்பட்ட மாவட்டங்கள் உள்ளது.
இந்தியாவிலேயே அதிக மக்கள் தொகை கொண்ட மாநிலமாக உத்தரப் பிரதேசம் அறியப்பட்டாலும், இந்தியாவில் அதிக மக்கள் தொகை கொண்ட முதல் ஐந்து மாவட்டங்களின் பட்டியலில் உத்திரப்பிரதேசத்தின் மாவட்டங்கள் எதுவும் இடம்பெறவில்லை.

அப்படியெனில் இந்தியாவின் எந்த மாவட்டம் அதிக மக்கள் தொகை கொண்ட மாவட்டமாக இருக்கும்? ஆச்சரியமளிக்கும் விதமாக, தற்போது மேற்கு வங்காளத்தில் உள்ள 'நார்த் 24 பர்கானாஸ்' மாவட்டமே அதிக மக்கள் தொகை கொண்ட மாவட்டமாகத் திகழ்கிறது.

கொல்கத்தா நகரத்தின் ஒரு பகுதியாக விளங்கும் இம்மாவட்டத்தின் மக்கள் தொகை 2023-ஆம் ஆண்டின் நிலவரப்படி சுமார் 1.05 கோடியாக மதிப்பிடப்பட்டுள்ளது. இதன் மூலம் இது இந்தியாவின் அதிக மக்கள் தொகை கொண்ட மாவட்டமாகவும் விளங்குகிறது. நார்த் 24 பர்கானாஸ் மாவட்டம் ஏன் இவ்வளவு அதிக மக்கள் தொகையைக் கொண்டுள்ளது என்பதையும், எந்த மாவட்டத்தைப் பின்னுக்குத் தள்ளி அது இந்த இடத்தைப் பிடித்தது என்பதையும் இந்த பதிவில் தெரிந்து கொள்ளலாம்.

நார்த் 24 பர்கானாஸ் எப்படி முதலிடத்திற்கு வந்தது?

2011 மக்கள் தொகைக் கணக்கெடுப்பின்படி, மகாராஷ்டிராவில் உள்ள தானே மாவட்டம் 11.06 மில்லியன் மக்கள்தொகையுடன் அதிக மக்கள்தொகை கொண்ட மாவட்டமாக இருந்தது. இருப்பினும், ஆகஸ்ட் 2014-ல், தானே மற்றும் நியூ பால்கர் மாவட்டம் என இரண்டு மாவட்டங்களாகப் பிரிக்கப்பட்டது. இந்தப் பிரிவினை, தானே மாவட்டத்தின் மக்கள்தொகையை 8.07 மில்லியனாகக் குறைத்து, நார்த் 24 பர்கானாஸ் அதிக மக்கள்தொகை கொண்ட மாவட்டமாக மாற வழிவகுத்தது.

இந்த மாவட்டத்தின் தற்போதைய மக்கள் தொகை எவ்வளவு?

தற்போது, ​​நார்த் 24 பர்கானாஸ் (North 24 Parganas) மாவட்டத்தின் மக்கள் தொகை சுமார் 10.9 மில்லியனாக மதிப்பிடப்பட்டுள்ளது. சதுர கிலோமீட்டருக்கு 2,469 பேர் என்ற மக்கள் அடர்த்தியைக் கொண்டுள்ள இம்மாவட்டம், இந்தியாவில் அதிக மக்கள் தொகை கொண்ட மாவட்டமாக மட்டுமல்லாமல், உலகின் அதிக மக்கள் அடர்த்தி கொண்ட பகுதிகளில் ஒன்றாகவும் திகழ்கிறது.

இந்த மாவட்டம் ஏன் முதலிடத்தில் உள்ளது?

கொல்கத்தா பெருநகரப் பகுதியின் ஒரு முக்கிய அங்கமாகத் திகழ்வது, மிடில் கிளாஸ் மக்கள் வாழ்வதற்கு ஏற்ற செலவு மற்றும் வேலைக்காகப் பலர் கொல்கத்தாவிற்குப் பயணம் செய்வது ஆகியவை இப்பகுதி முதலிடத்தில் இருப்பதற்கான காரணங்களாகும். சால்ட் லேக் போன்ற துணை நகரங்களையும், 1,500-க்கும் மேற்பட்ட நிறுவனங்கள் மற்றும் 3,50,000 தொழிலாளர்களைக் கொண்ட தகவல் தொழில்நுட்ப மையத்தையும் இது கொண்டுள்ளது. இது வேலைவாய்ப்புக்காக மாநிலம் முழுவதுமிருந்து பலரை ஈர்க்கிறது. இதனால் இங்கு மக்கள் தொகை தொடர்ந்து அதிகரித்து வருகிறது.

நார்த் 24 பர்கானாஸ் மாவட்டத்தில் விவசாயம், மீன்பிடித் தொழில் மற்றும் சிறு-நடுத்தரத் தொழில்களும் உள்ளன. விவசாயம் பரவலாக மேற்கொள்ளப்பட்டாலும், பல கிராம மக்கள் நகரங்களை நோக்கி இடம்பெயர்ந்து வருகின்றனர்.

இந்த மாவட்டத்தின் வரலாறு என்ன?

கங்கை-பிரம்மபுத்திரா டெல்டா பகுதியில், ஹூக்ளி ஆற்றின் கரையில் அமைந்துள்ள இம்மாவட்டம் வளமான வரலாற்றைக் கொண்டுள்ளது. 1757-ல் நடைபெற்ற பிளாசி போருக்குப் பிறகு, பிரிட்டிஷ் கிழக்கிந்திய நிறுவனம் இந்தப் பகுதியைக் கைப்பற்றியது. 1947-ல் இந்தியா பிரிக்கப்பட்டதைத் தொடர்ந்து, கிழக்கு பாகிஸ்தானிலிருந்து (தற்போதைய வங்கதேசம்) லட்சக்கணக்கான அகதிகள் இங்கு குடியேறினர்; இது மக்கள் தொகை பெருக்கத்திற்கு வழிவகுத்தது. 1986-ஆம் ஆண்டில், 'பெரிய 24 பர்கானாஸ்' (Greater 24 Parganas) பகுதியிலிருந்து நார்த் 24 பர்கானாஸ் மாவட்டம் பிரிக்கப்பட்டது.