பாகிஸ்தானில் இந்திய ரூபாயின் மதிப்பு எவ்ளோ தெரியுமா? இந்திய ரூபாய் பாகிஸ்தானை விட வலிமையாக இருக்க காரணம் என்ன?

இந்திய ரூபாய் உலகளவில் மிகவும் மதிப்பு வாய்ந்ததாகக் கருதப்படுகிறது. இந்தியாவின் ஒரு ரூபாய் பல்வேறு நாடுகளில் வெவ்வேறு மதிப்புகளைக் கொண்டிருந்தாலும் நமது அண்டை நாடான பாகிஸ்தானில் இந்திய ரூபாயின் மதிப்பு என்னவென்று எப்போதாவது சிந்தித்து உள்ளீர்களா?

இந்திய ரூபாயும், பாகிஸ்தான் ரூபாயும் சுவாரஸ்யமான வரலாற்றையும், வளர்ச்சியையும் கொண்டுள்ளது. இந்திய ரூபாய் (INR) மற்றும் பாகிஸ்தான் ரூபாய் (PKR) ஆகியவை புவியியல் ரீதியான அருகாமை மட்டுமல்லாமல், பொதுவான தோற்றத்தையும் கொண்ட ஒரு தனித்துவமான வரலாற்றைப் பகிர்ந்து கொள்கின்றன.

INR இந்தியாவின் அதிகாரப்பூர்வ நாணயமாகவும், PKR பாகிஸ்தானின் தேசிய நாணயயமாகவும் உள்ளன. ஆரம்பத்தில், இரு நாடுகளும் பிரிட்டிஷ் ஆட்சியின் கீழ் இருந்த இந்தியாவிலிருந்து ஒரே மாதிரியான நாணய முறையைப் பெற்றன. அப்போது 1 INR என்பது 1 PKR-க்கு சமமாக இருந்தது. காலப்போக்கில், பல்வேறு அரசியல் மற்றும் பொருளாதாரக் காரணிகள் இவ்விரு நாணயங்களின் மாற்று விகிதங்களில் தாக்கத்தை ஏற்படுத்தியுள்ளன. தற்போது இந்தியா மற்றும் பாகிஸ்தானின் நாணயங்களின் மதிப்பு மற்றும் அவற்றின் வரலாற்றைப் பற்றி தெரிந்து கொள்ளலாம்.

இந்திய ரூபாய்க்கும் பாகிஸ்தான் ரூபாய்க்கும் இடையிலான மாற்று விகிதம் (1947-2000)

1947 முதல் 2000 வரையிலான காலகட்டத்தில், சுதந்திரம் பெற்ற பிறகு இந்திய ரூபாய்க்கும் பாகிஸ்தான் ரூபாய்க்கும் இடையிலான மாற்று விகிதம் ஆரம்ப ஆண்டுகளில் நிலையாக ஒரே மாதிரியாக இருந்தது. இருப்பினும், காலப்போக்கில் அது படிப்படியாக இந்திய ரூபாய்க்குச் சாதகமாக மாறியது. ஆரம்பத்தில், 1947-ல் நாடு பிரிக்கப்பட்டபோது, ​​இந்தியா மற்றும் பாகிஸ்தான் ஆகிய இரு நாடுகளின் நாணய மதிப்பும் சமமாகவே இருந்தது, அதாவது 1 இந்திய ரூபாய் என்பது 1 பாகிஸ்தான் ரூபாய்க்குச் சமமாக இருந்தது. ஆனால், 2000-ஆம் ஆண்டிற்குள் இந்த இரண்டு நாட்டின் நாணயங்களின் மதிப்பிற்கு இடையிலான இடைவெளி அதிகரித்தது.

இந்திய ரூபாய்க்கும், பாகிஸ்தான் ரூபாய்க்கும் இடையிலான மாற்று விகிதம் (2001 - 2010)

2001 மற்றும் 2010 ஆண்டுகளுக்கு இடைப்பட்ட காலத்தில், இரு நாடுகளுக்கும் இடையிலான நாணய மாற்று விகிதத்தில் குறிப்பிடத்தக்க ஏற்ற இறக்கங்கள் காணப்பட்டன. 2001-ஆம் ஆண்டில் 1 இந்திய ரூபாயின் மதிப்பு 1.23 பாகிஸ்தான் ரூபாய்க்குச் சமமாக இருந்தது. இருப்பினும், காலப்போக்கில் பாகிஸ்தான் ரூபாய்க்கு எதிராக இந்திய ரூபாயின் மதிப்பு படிப்படியாக உயர்ந்தது. 2010-ஆம் ஆண்டிற்குள் இந்த மாற்று விகிதம் 1.93-யை எட்டியது. இந்தக் காலகட்டத்தில் பாகிஸ்தான் ரூபாய்க்கு எதிராக இந்திய ரூபாயின் மதிப்பில் ஏற்பட்ட உயர்வு 56.91% ஆகும்.

இந்திய ரூபாய்க்கும், பாகிஸ்தான் ரூபாய்க்கும் இடையிலான மாற்று விகிதம் (2011 - 2020)

அடுத்த பத்தாண்டுளில், INR-க்கும் PKR-க்கும் இடையிலான மாற்று விகிதத்தில் பெரிய அளவிலான ஏற்ற இறக்கங்கள் இல்லை. இருப்பினும், 2011 முதல் 2020 வரை ஒரு சீரான உயர்வு காணப்பட்டது. 2011-ல், 1 INR-ன் மதிப்பு 1.72 PKR-க்கு சமமாக இருந்தது, ஆனால் காலப்போக்கில் PKR-க்கு எதிராக இந்திய ரூபாயின் மதிப்பு அதிகரித்தது. 2020-ஆம் ஆண்டிற்குள், INR-க்கான PKR மாற்று விகிதம் 2.19-ஐ எட்டியது.

2021 - 2025 வரையிலான மாற்று விகிதம்

1947-ல் இந்தியா-பாகிஸ்தான் பிரிக்கப்பட்ட பிறகு இரு நாட்டின் நாணயங்களும் சமமான மதிப்பில் நிர்ணயிக்கப்பட்டிருந்தாலும், தற்போது பாகிஸ்தானின் மதிப்பை விட இந்திய ரூபாயின் மதிப்பு வலுவடைந்துள்ளது. கடந்த ஐந்து ஆண்டுகளில், PKR-க்கு எதிராக INR-ன் மதிப்பு தொடர்ந்து உயர்ந்துள்ளது. படிப்படியாக உயர்ந்து, 2026-ஆம் ஆண்டு நிலவரப்படி, 1 INR-க்கான மாற்று விகிதம் 2.92 PKR-யை எட்டியுள்ளது.

பாகிஸ்தான் ரூபாயை விட இந்திய ரூபாய் ஏன் வலுவாக உள்ளது?

1947-ல் இரண்டு நாடுகளின் நாணயங்களும் சமமான நிலையில் தொடங்கப்பட்டதிலிருந்து, பாகிஸ்தான் ரூபாயை விட இந்திய ரூபாய் பொதுவாக வலுவான நிலையிலேயே இருந்து வருகிறது. இதற்கான முக்கிய காரணங்கள் பின்வருமாறு:

- பாகிஸ்தானுடன் ஒப்பிடுகையில் இந்தியா மிகப்பெரிய மற்றும் பன்முகத்தன்மை கொண்ட பொருளாதாரத்தைக் கொண்டுள்ளது. இது இந்திய ரூபாய்க்கு ஒரு வலுவான அடித்தளத்தை அளிக்கிறது.

- பாகிஸ்தானை விட இந்தியா பொதுவாக அதிக அந்நிய நேரடி முதலீட்டை ஈர்க்கிறது. இந்த அந்நிய மூலதனங்கள், இந்திய ரூபாய்க்கான தேவையை அதிகரிப்பதன் மூலம் அதன் மதிப்பை வலுப்படுத்துகிறது.

- இந்தியா பாகிஸ்தானை விட மிகப்பெரிய மற்றும் பன்முகத்தன்மை கொண்ட ஏற்றுமதித் தளத்தைக் கொண்டுள்ளது. இது அந்நியச் செலாவணி வரத்தை சீராக உறுதி செய்வதன் மூலம் இந்திய ரூபாயை வலுப்படுத்துகிறது.

- பாகிஸ்தானுடனான வர்த்தகத்தில் இந்தியா உபரி நிலையைக் கொண்டுள்ளது. அதாவது, பாகிஸ்தானிலிருந்து இறக்குமதி செய்வதை விட அங்கிருந்து அதிகளவிலான பொருட்கள் மற்றும் சேவைகளை இந்தியா ஏற்றுமதி செய்கிறது. இது இந்திய ரூபாய்க்கான தேவையை அதிகரிக்கிறது.

- இந்தியா மற்றும் பாகிஸ்தான் இடையிலான அரசியல் பதற்றங்கள் பாகிஸ்தான் ரூபாயின் மதிப்பை பாதிக்கிறது. பதற்றம் நிலவும் காலங்களில் பாகிஸ்தான் ரூபாயை வைத்திருப்பதில் அதிக ஆபத்து இருப்பதாக முதலீட்டாளர்கள் கருதுகிறார்கள். இது பாகிஸ்தான் ரூபாயின் மதிப்பை பலவீனமடையச் செய்கிறது.