உலகின் டாப் 10 பணக்கார குட்டி நாடுகள் என்னென்ன தெரியுமா? இந்த நாடுகளில் சில ஆயிரம் பேரே வாழ்கிறார்களாம்

தற்போது உலகில் மொத்தம் 195 நாடுகள் உள்ளன. பொதுவாக ஒரு நாடு என்பது லட்சக்கணக்கான முதல் கோடிக்கணக்கான மக்கள் தொகை மிகப்பெரிய பரப்பளவைக் குறிப்பதாக நாம் நினைத்துக் கொண்டிருக்கிறோம். உலகின் பெரும்பாலான நாடுகள் மிகப் பெரியவை என்றாலும், பரப்பளவில் நாம் கற்பனை செய்து கூட பார்க்க முடியாத அளவிற்கு சிறிய நாடுகளும் சில உள்ளன.

உலகின் சில நாடுகளில் மக்கள் தொகை ஆயிரக்கணக்கில் மட்டுமே உள்ளது என்றால் உங்களால் நம்ப முடியுமா? உலகின் மிகச் சிறிய இந்த 10 நாடுகளின் மொத்தப் பரப்பளவு மொத்தமே 1,491.4 சதுர கிலோமீட்டர்கள் என்பது உங்களுக்குத் தெரியுமா? பூமியில் உள்ள மிகவும் சிறிய 10 நாடுகளைப் பற்றி இந்த பதிவில் தெரிந்து கொள்ளலாம்.

வாடிகன்

Holy See என்று அழைக்கப்படும் இந்த நகரம் கத்தோலிக்க திருச்சபையின் தலைமையிடமாகத் திகழ்கிறது. இந்த நகரின் பரப்பளவு 0.44 சதுர கிலோ மீட்டர் மட்டுமே. உலகின் மிகப்பெரிய தேவாலயமான 'புனித பேதுரு பேராலயம்' (St. Peter's Basilica) இங்குதான் அமைந்துள்ளது. இதன் பொருளாதாரம் அஞ்சல் தலை விற்பனை, சுற்றுலாப் பயணிகள் மற்றும் அருங்காட்சியக நுழைவுக் கட்டணம் போன்றவற்றின் மூலம் அமைகிறது. இதன் மக்கள் தொகை 1000-க்கும் குறைவாகவே உள்ளது.

மொனாக்கோ

2 சதுர கிலோ மீட்டர் மட்டுமே பரப்பளவு கொண்ட மொனாக்கோவின் மக்கள் தொகை 36,000 மட்டுமே. இந்த நாடு சூதாட்டம் மற்றும் ஆடம்பரப் பொருட்கள் மற்றும் சேவைகள் சார்ந்த தொழில்களுக்குப் பெயர் பெற்றது. இந்நகரவாசிகள் பெரும்பாலும் தகவல் தொடர்புக்கு பிரெஞ்சு மொழியைப் பயன்படுத்துகின்றனர். இந்த நாட்டைப் பற்றிய ஆச்சரியப்படுத்தும் விஷயம் என்னவென்றால், தனிநபர் அடிப்படையில் உலகின் அதிக எண்ணிக்கையிலான கோடீஸ்வரர்கள் மற்றும் பில்லியனர்கள் வசிக்கும் இடமாக இது திகழ்கிறது. மேலும், மிகவும் பிரபலமான வருடாந்திர நிகழ்வான 'ஃபார்முலா 1' பந்தயம் இந்த நகர வீதிகளின் வழியாகவே நடைபெறுகிறது.

நவ்ரு

21 சதுர கிலோமீட்டர் மட்டுமே பரப்பளவு கொண்ட இந்த நாடு ஆஸ்திரேலியாவிற்கு வடகிழக்கே, பசிபிக் பெருங்கடலில் உள்ள ஒரு சிறிய தீவில் அமைந்துள்ளது. இது 'பிளசண்ட் ஐலேண்ட்' என்றும் அழைக்கப்படுகிறது. ஆச்சரியமான விஷயம் என்னவென்றால், உலகில் அதிக உடல் பருமன் கொண்ட மக்கள் வாழும் நாடாகவும் இது அறியப்படுகிறது. இங்கு 97 சதவீத ஆண்களும் 93 சதவீத பெண்களும் அதிக உடல் பருமன் அல்லது அதிக எடையுடன் உள்ளனர். இந்த நாட்டின் மக்கள் தொகை 15,000-க்கும் குறைவாகும்.

துவாலு

26 சதுர கி.மீ பரப்பளவு கொண்ட இந்த நாடு முன்பு 'எல்லிஸ் தீவு' என்று அழைக்கப்பட்டது. 10,000-க்கும் குறைவான மக்கள் தொகை கொண்ட இந்த நாடு பசிபிக் பெருங்கடலில், ஆஸ்திரேலியாவிற்கு வடகிழக்கே அமைந்துள்ளது. இந்த தீவில் ஒரே ஒரு மருத்துவமனை மட்டுமே உள்ளது, கடந்த காலத்தில் முன்பு இது பிரிட்டிஷ் ஆட்சியின் கீழ் இருந்தது, ஆனால் 1978-ல் சுதந்திரம் பெற்றது.

சான் மரினோ

61 சதுர கிலோ மீட்டர் பரப்பளவு கொண்ட சான் மரினோ தெற்கு ஐரோப்பாவில் உள்ளது, ஐரோப்பாவின் மூன்றாவது மிகச்சிறிய நாடாகும். இது 'சான் மரினோவின் மிக அமைதியான குடியரசு' என்றும் அழைக்கப்படுகிறது. இதன் பொருளாதாரம் சுற்றுலாவைச் சார்ந்ததாக உள்ளது. தனிநபர் மொத்த உள்நாட்டு உற்பத்தியின் அடிப்படையில், இது உலகின் மிகவும் செல்வந்த நாடுகளில் ஒன்றாகத் திகழ்கிறது. இந்த நாட்டின் மக்கள் தொகை 30,000-க்கும் குறைவாகும்.

லீக்டன்ஸ்டைன்

160 சதுர கி.மீ. பரப்பளவு கொண்ட இந்த நாடு மத்திய ஐரோப்பாவில் அமைந்துள்ளது மற்றும் சுவிட்சர்லாந்தை எல்லையாகக் கொண்டுள்ளது. தனிநபர் மொத்த உள்நாட்டு உற்பத்தியின் அடிப்படையில், இதுவே உலகின் செல்வமிக்க ஜெர்மன் மொழி பேசும் நாடாகும். இதன் மக்கள் தொகை 33,720 மட்டுமே.

மார்ஷல் தீவுகள்

181 சதுர கி.மீ. பரப்பளவு கொண்ட இந்த தீவு நாடானது வட பசிபிக் பெருங்கடலில் அமைந்துள்ளது. மார்ஷல் தீவுகளின் இரண்டு தீவுத் தொகுதிகள் 'ரடாக் சங்கிலி' மற்றும் 'ராலிக் சங்கிலி' என்று அழைக்கப்படுகின்றன. இதில் 'ரடாக்' என்பது சூரிய உதயத்தையும், 'ராலிக்' என்பது சூரிய அஸ்தமனத்தையும் குறிக்கிறது. 60,000-க்கும் குறைவான மக்கள் தொகை கொண்ட இந்த தீவுகளின் சராசரி உயரம் கடல் மட்டத்திலிருந்து வெறும் 7 அடி மட்டுமே.

செயின்ட் கிட்ஸ் மற்றும் நெவிஸ்

261 சதுர கி.மீ. பரப்பளவு கொண்ட செயின்ட் கிட்ஸ் தீவு மேற்கிந்திய தீவுகளில் அமைந்துள்ளது. இது நெவிஸ் தீவுடன் ஒரே கூட்டமைப்பைச் சேர்ந்தது. இது வெஸ்ட் இண்டீஸின் மதர் காலனி என்றும் அழைக்கப்படுகிறது. இதன் பொருளாதாரம் சுற்றுலா, விவசாயம் மற்றும் உற்பத்தித் தொழில்கள் போன்றவற்றை அடிப்படையாகக் கொண்டது. இதன் மக்கள் தொகை வெறும் 40,000 மட்டுமே.

மாலத்தீவு

300 சதுர கி.மீ. பரப்பளவு கொண்ட உலகின் மிகவும் பிரபலமான இந்த நாடு 1965-இல் சுதந்திரம் பெற்றது. இதற்கு முன்னதாக இது போர்த்துகீசியர், டச்சு மற்றும் பிரிட்டிஷார் போன்ற பல பேரரசுகளின் காலனியாக இருந்தது. இதன் பொருளாதாரம் முழுக்க முழுக்க சுற்றுலாவைச் சார்ந்ததாக உள்ளது.

மால்டா

316 சதுர கிலோமீட்டர் கொண்ட இந்த நாடு மத்தியதரைக் கடலில் அமைந்துள்ளது. கவர்ச்சிகரமான கடற்கரைகள் மற்றும் உற்சாகமான இரவு நேர வாழ்க்கை ஆகியவற்றைக் கொண்டுள்ளதால், இதன் பொருளாதாரம் பெரும்பாலும் சுற்றுலாவைச் சார்ந்தே உள்ளது. இந்த நாட்டின் மக்கள் தொகை கிட்டதட்ட 450,000 ஆகும்.