வாஸ்துப்படி எந்த திசையை நோக்கி சாப்பிட வேண்டும்? தவறான திசையில் சாப்பிட்டால் என்ன ஆகும்?

கிழக்கு

நீங்கள் கிழக்கு திசையை நோக்கி சாப்பிட்டால், டென்சன் மற்றும் மன அழுத்தம் குறையும். இந்த திசையை நோக்கி உணவை உண்ணும் போது மூளை உற்சாகமடைவதோடு, உண்ணும் உணவு நன்கு செரிமானமாகி, ஆரோக்கியம் சிறப்பாக இருக்கும். இந்த திசையை நோக்கி சாப்பிடுவது வயதானவர்களுக்கும், நோய்வாய்ப்பட்டவர்களுக்கும் மிகவும் நல்லது.

வடக்கு

பணம், அறிவு மற்றும் ஆன்மீக சக்தி வேண்டுமா? அப்படியானால் வடக்கு திசையை நோக்கி சாப்பிடுங்கள். உங்கள் தொழிலில் நல்ல வளர்ச்சியைக் காண விரும்பினால், வடக்கு திசையில் அமர்ந்திருப்பது நன்மை பயக்கும். குறிப்பாக இந்த திசை மாணவர்களுக்கும், இளைஞர்களுக்கு மிகவும் நல்லது.

மேற்கு

மேற்கு திசையை நோக்கி சாப்பிடுவது மிகவும் நல்லது. அதுவும் வியாபாரம் செய்யும் வியாபாரிகள் மேற்கு திசையை நோக்கி சாப்பிட்டால், அது லாபத்திற்கு வழிவகுக்கும்.

தெற்கு

தெற்கு திசை எம திசையாக கருதப்படுவதால், தெற்கு திசையை நோக்கி அமர்ந்து சாப்பிடுவதைத் தவிர்க்க வேண்டும். குறிப்பாக உங்கள் பெற்றோர் உயிருடன் இருந்தால், இந்த தெற்கு திசையை நோக்கி சாப்பிடுவதைத் தவிர்த்திடுங்கள்.

சாப்பாட்டு அறை எந்த திசையில் இருக்க வேண்டும்?

வாஸ்து சாஸ்திரத்தின் படி, சாப்பாட்டு/டைனிங் அறை வீட்டின் மேற்கு திசையில் இருக்க வேண்டும். இது மங்களகரமானது மற்றும் லாபகரமானது. இந்த திசையில் அமர்ந்து சாப்பிட்டால், ஆரோக்கியம் நன்றாக இருக்கும் மற்றும் உணவு மற்றும் பிற மதிப்புமிக்க பொருட்களில் பற்றாக்குறை ஏற்படாது.

நினைவில் கொள்ள வேண்டியவை:

வீட்டில் டைனிங் டேபிள் வைப்பதாக இருந்தால், பிரதான கதவு அல்லது கழிவறைக்கு முன் வைப்பதைத் தவிர்க்க வேண்டும். இல்லாவிட்டால், அது வீட்டில் பிரச்சனைகளை ஏற்படுத்துவதோடு, மன உளைச்சலுக்கு வழிவகுக்கும். முக்கியமாக கைக்கழுவும் தொட்டியானது கிழக்கு திசையில் இருக்க வேண்டும். உங்கள் வீட்டில் கைக்கழுவும் தொட்டியானது கிழக்கு அல்லது வடகிழக்கு திசையில் இருப்பதை உறுதிப்படுத்திக் கொள்ளுங்கள். மறந்தும் தென்கிழக்கு திசையில் வைத்துவிட வேண்டாம்.