30 வயதிலேயே எலும்பு தொடர்பான பிரச்சனைகளை சந்திக்க என்ன காரணம் தெரியுமா?

மோசமான உணவுமுறை

தசைகள் மற்றும் எலும்புகள் வலிமையாக இருக்க புரோட்டீன் சத்து அவசியமாகும். கூடுதலாக கால்சியம், பாஸ்பரஸ் மற்றும் வைட்டமின் டி ஆகியவை எலும்புகளின் ஆரோக்கியத்திற்கு இன்றியமையாதவையாகும். இவை அனைத்தும் முழு தானியங்கள், பழங்கள் மற்றும் காய்கறிகளில் இருந்து கிடைக்கிறது. ஆனால் தற்போதைய இளம் வயதினர் சத்துக்கள் இல்லாத ஃபாஸ்ட் ஃபுட் உணவுகளின் மீதுள்ள மோகத்தால், காய்கறிகள் மற்றும் பழங்களை அதிகம் உண்பதில்லை. இதன் காரணமாக உடல் பருமன் மற்றும் இதயம் தொடர்பான நோய்களால் பாதிக்கப்படுகின்றனர். இதில் உடல் பருமன் எலும்புகள் பலவீனமாவதற்கு மற்றொரு காரணமாகும்.

உடலுழைப்பில்லாத வாழ்க்கை முறை

பெருந்தொற்று காலத்திலும் சரி, பெருந்தொற்றுக்கு பிந்தைய காலத்திலும் சரி, பெரும்பாலானோர் வீட்டில் இருந்து கொண்டே தங்களின் அலுவலக வேலைகளை செய்து வருகின்றனர். இதன் விளைவாக நீண்ட நேரம் உட்கார்ந்தவாறே வேலை செய்வதால், தசைகள், முதுகு, தோள்கள் மற்றும் கழுத்துப் பகுதிகளுக்கு அதிக அழுத்தம் கொடுக்கப்படுகிறது. சிலர் படுக்கையில் அமர்ந்து கொண்டே அல்லது படுத்துக் கொண்டே வேலை செய்கின்றனர். இப்படி செய்யும் போது, சரியான நிலையில் அமர்ந்து வேலை செய்யாத காரணத்தினால் முதுகு வலி, கழுத்து வலி போன்ற பிரச்னைகளை சந்திக்கின்றனர். இதுமட்டுமின்றி, வீட்டில் இருந்து கொண்டே வேலை செய்வதால், பலர் காலையில் எழுந்ததும் அப்படியே தங்களின் வேலையை ஆரம்பிக்கின்றனர். இதனால் உடலுக்கு சிறு வேலை கூட கொடுக்காமல், சாப்பிடும் உணவுகளில் உள்ள கொழுப்புக்கள் உடலில் அப்படியே தங்கி உடல் பருமனை உண்டாக்கி, எலும்பு தொடர்பான பிரச்சனைகளை சந்திக்க வைக்கிறது.

உடற்பயிற்சியின்மை

இளம் தலைமுறையினர் சரியான தோரணையில் இருக்காததைத் தவிர, உடற்பயிற்சி செய்வதையும் தவிர்க்கிறார்கள். முதுகெலும்பிற்கு வயிறு மற்றும் முதுகு தசைகளின் ஆதரவும் தேவை. அதுவும் பளு தூக்கும் பயிற்சியை செய்வது முதுகெலும்பிற்கு உதவுகிறது. கூடுதலாக, வாக்கிங், பைக்கிங் மற்றும் நீச்சல் போன்ற குறைந்த தாக்கத்தை ஏற்படுத்தும் பயிற்சிகள் உடலில் ஏற்படும் வலியைப் போக்க உதவுகிறது.

30-களில் எலும்புகளின் ஆரோக்கியம்

முந்தைய காலத்தில் 30 வயதில் ஒருவரின் அதிகப்படியான வலிமைக்கு எழும்புகள் தான் காரணம். ஏனெனில் அக்காலத்தில் அவர்களின் உணவுகள் சத்துக்கள் நிறைந்திருக்கும் மற்றும் உடலுழைப்பு அதிகமாகவும் இருக்கும். நீங்களும் 30 வயதில் வலிமையாக இருக்க விரும்பினால் மற்றும் எலும்புகள் நல்ல அடர்த்தியைப் பெற வேண்டுமானால், தினமும் போதுமான கால்சியத்தைப் பெற வேண்டும் மற்றும் உடற்பயிற்சி செய்ய வேண்டும். அதுவும் இந்த வயதிற்குட்பட்டவர்கள் தினமும் குறைந்தது 1000 மிகி கால்சியத்தைப் பெற வேண்டும். கூடுதலாக, தினமும் குறைந்தது 30 நிமிடங்கள் எடை தூக்கும் உடற்பயிற்சிகளை செய்வது எலும்புகளை வலுப்படுத்த உதவும்.

எலும்பியல் மருத்துவரை ஒருவர் எப்போது அணுக வேண்டும்?

ஒருவருக்கு பளு தூக்குதல், விளையாட்டுக்கள் போன்ற காரணங்களால் மூட்டு அல்லது முதுகு வலி ஏற்பட்டு, அவர் போதுமான ஓய்வு எடுத்து, ஐஸ் ஒத்தடம் கொடுத்தால் 72 மணிநேரத்திற்குள் வலி சரியாகிவிடும். ஆனால் வலி சரியாகாமல், வலி இன்னும் வளர்ந்து கொண்டே இருந்தால், உடனே சிகிச்சைப் பெற எலும்பியல் மருத்துவரை அணுக வேண்டும்.