அடிக்கடி டர்ர்.. விடுறீங்களா? ரொம்ப சங்கடமா இருக்கா? இதோ அதை சரிசெய்யும் சில இயற்கை வழிகள்!

ஓமம்

அஜீரண கோளாறை சந்திக்கும் போது, குறிப்பாக வயிற்றில் அதிக வாயு தேங்கி வாய்வு தொல்லையை ஏற்படுத்தும் போது, அதிலிருந்து உடனடி நிவாரணம் பெற ஓமம் பெரிதும் உதவி புரியும். அதற்கு ஒரு டீஸ்பூன் ஓமத்தை சுடுநீரில் போட்டு 5-10 நிமிடம் ஊற வைத்து, பின் அந்த நீரைக் குடிக்க வேண்டும்.

பெருங்காயம்

அன்றாட சமையலில் பயன்படுத்தப்பட்டு வரும் ஒரு முக்கிய பொருள் தான் பெருங்காயம். இது ஒரு சிறந்த வாய்வு எதிர்ப்பியாக செயல்படுகிறது மற்றும் இது வயிற்றில் அதிக வாயுவை உருவாக்கும் பாக்டீரியாக்களின் வளர்ச்சியைத் தடுக்கிறது. அதற்கு ஒரு டம்ளர் வெதுவெதுப்பான நீரில் 1 டீஸ்பூன் பெருங்காயத் தூள் சேர்த்து கலந்து, எப்போதெல்லாம் அசௌகரியத்தை உணர்கிறீர்களோ, அப்போது குடிக்க வேண்டும். ஆனால் அளவுக்கு அதிகமாக குடிக்காதீர்கள். இல்லாவிட்டால், அது நெஞ்செரிச்சலை ஏற்படுத்தும்.

சீரகம்

சீரகம் சிறந்த செரிமானத்திற்கு உதவுகிறது. பெரும்பாலான ஊட்டச்சத்து நிபுணர்கள் மற்றும் உணவியல் நிபுணர்கள் செரிமானம் சிறப்பாக இருக்க தினமும் காலையில் வெறும் வயிற்றில் ஒரு டம்ளர் சீரக நீரைக் குடிக்க அறிவுறுத்துகிறார்கள். இருப்பினும், வயிற்று உப்புசம் அல்லது வாய்வு தொல்லையால் அவதிப்படுபவர்களும் இந்நீரைக் குடிப்பதால் உடனடி நிவாரணத்தைப் பெறலாம்.

எலுமிச்சை சோடா

வாய்வு தொல்லையால் மிகவும் அவதிப்படுபவர்கள் ஒரு டம்ளர் நீரில் எலுமிச்சை சாறு மற்றும் சிறிது பேக்கிங் பவுடர் சேர்த்து கலந்து, உணவு உண்ட பின் குடித்தால், அஜீரண கோளாறு மற்றும் வாய்வு தொல்லையில் இருந்து உடனடி நிவாரணம் கிடைக்கும்.

திரிபலா

திரிபலா என்பது வயிற்று உப்புசம் மற்றும் வாய்வு தொல்லைக்கு காரணமான மலச்சிக்கல் முதல் அஜீரண கோளாறு வரை பல செரிமான பிரச்சனைகளை சரிசெய்வதில் சிறந்தது. வயிற்றில் அசௌகரியத்தை அனுபவிக்கும் போது 1 டீஸ்பூன் திரிபலா பொடியை வெதுவெதுப்பான நீரில் கலந்து ஒரு நாளைக்கு ஒருமுறை குடிக்க உடனடி நிவாரணம் கிடைக்கும்.

குறிப்பு

வயிற்று உப்புசம் மற்றும் வாய்வு தொல்லையால் கஷ்டப்படுபவர்கள் தங்களின் அன்றாட உணவில் இஞ்சி க்ரீன் டீ சேர்த்து வரலாம். முக்கியமாக அளவுக்கு அதிகமாக உண்பதை குறைப்பது வாயு பிரச்சனையைக் குறைக்க உதவும். அதற்கு பதிலாக, 3-4 மணிநேரத்திற்கு ஒருமுறை கொஞ்சம் கொஞ்சமாக சாப்பிடலாம். இதனால் செரிமான மண்டலத்தின் செயல்பாடும் சிறப்பாக இருக்கும். குறிப்பாக தினமும் சிறிது நேரம் உடற்பயிற்சி செய்து வருவது வாயு பிரச்சனைகளை கட்டுப்படுத்துவதில் பயனுள்ளதாக இருக்கும்.