கொரோனா வைரஸ், இன்புளூயன்சா - இரண்டிற்கும் என்ன வித்தியாசம்?

அறிகுறிகள்

வேகமாக வளர்ந்து வரும் கொரோனா வைரஸ் தொற்றுநோயைப் பற்றிய மிக முக்கியமான அம்சம் என்னவென்றால், இந்நோயின் அறிகுறிகள் சளி, இருமல் மற்றும் அதிகமான காய்ச்சலுடன் தொடங்குவது தான். இது இன்புளூயன்சா தொற்றுக்கு மிகவும் ஒத்தவையாக உள்ளது. தற்போது இன்புளூயன்சா வைரஸும் மக்களிடையே பரவ ஆரம்பித்துள்ளது. எனவே ஒருவருக்கு இருப்பது இன்புளூயன்சா தொற்றா அல்லது கொரோனா வைரஸ் தொற்றா என்பதை சொல்வதே உண்மையிலேயே மிகவும் கடினம் தான்.

இரண்டும் ஒத்தவையா?

தொடக்கத்தில், கோவிட்-19 மற்றும் இன்புளூயன்சா இரண்டும் வைரஸ் மூலம் பரவும் நோய்த்தொற்றுக்கள் ஆகும். மேலும் இவை மனிதனிடமிருந்து மனிதன் தொடர்பு கொள்வதன் மூலம் பரவுகின்றன. பொதுவாக இருமல் மற்றும் சளி மூலம் மற்றவருக்கு பரவுகின்றன. உலக சுகாதார அமைப்பின் கூற்றுப்படி, கோவிட்-19 மற்றும் இன்புளூயன்சா இரண்டும் தொற்று வைரஸ்கள். இவை சுவாச நோயை உண்டாக்குகின்றன. மேலும் குமட்டல், மூச்சுத் திணறல், மார்பு நெரிசல், அதிகப்படியான காய்ச்சல் மற்றும் தீவிர நிலையில் நிமோனியா போன்றவற்றை உண்டாக்கும்.

வித்தியாசம்

கொரோனா வைரஸ் மற்றும் இன்புளூயன்சா வைரஸ் ஒத்த அறிகுறிகளைக் காட்டினாலும், வெவ்வேறு குடும்பத்தைச் சேர்ந்தவை. கோவிட்-19, 2019 ஆம் ஆண்டு கண்டுபிடிக்கப்பட்ட கொரோனா வைரஸ் நாவல். இதுவரை மனிதர்களிடம் காணப்படாத ஒரு வகை வைரஸ். இதோடு ஒப்பிடும் போது, இன்புளூயன்சா வைரஸால் ஏற்படும் காய்ச்சல் நீண்ட காலத்திற்கு முன்பே கண்டுபிடிக்கப்பட்டது.

ஆய்வாளர்கள் கூறுவது...

கொரோனா வைரஸானது, இன்புளூயன்சா மற்றும் ஒத்த வைரஸ்களை விட வேகமாக பரவுகிறது என்று ஆராய்ச்சியாளர்கள் கூறுகின்றனர்.

இன்புளூயன்சா அறிகுறிகள்

100.5 டிகிரிக்கு மேல் காய்ச்சல், தீவிர உடல் சோர்வு, கடுமையான தசை அல்லது உடல் வலிகள், வறட்டு இருமல் மற்றும் சளி உள்ளிட்டவை இன்புளூயன்சா அறிகுறிகள் அறிகுறிகளாகும். பல நேரங்களில் இவை மிகவும் தீவிரமானதாக இருக்கும்.

சோதனை ஒன்றே வழி

கொரோனா வைரஸ் தொற்றின் ஆரம்ப கால அறிகுறிகளும் கீடுமையான சளி அல்லது காய்ச்சலைத் தான் கொண்டிருக்கும். எனவே கொரோனா வைரஸுக்கும், இன்புளூயன்சாவுக்கும் இடையிலான வித்தியாசத்தை உண்மையில் சொல்வது கடினமாக இருக்கும். சோதனைகள் மூலம் மட்டுமே கொரோனா வைரஸா அல்லது இன்புளூயன்சா தொற்றா என்பதை அடையாளம் காண முடியும்.

நாட்கள் வித்தியாசம்

நோய்க் கட்டுப்பாடு மற்றும் தடுப்பு மையங்களின் (சி.டி.சி) படி, சளி மற்றும் காய்ச்சலுக்கான வைரஸ் தாக்கியிருந்தால், அந்த வைரஸ் பாதித்தவுடன் அதற்கான அறிகுறிகள் வெளிப்பட 2-3 நாட்கள் எடுக்கும். அதுவே கொரோனா வைரஸ் தாக்கியிருந்தால், அதற்கான அறிகுறிகள் தென்பட 2-14 நாட்கள் எடுக்கும்.