நீச்சல் மேற்கொண்டால் சருமத்தின் நிறம் கருமையடையுமா?

திறந்தவெளி நீச்சல் குளம்

அனைத்து நீச்சல் குளங்களுமே வெயிலின் தாக்கம் இல்லாதவாறு மூடி இருப்பதில்லை. சில நீச்சல் குளங்கள் திறந்தவெளியில் இருக்கும். இதனால் சூரியக்கதிர்களின் தாக்கமானது சருமத்தில் நேரடியாக பட்டு, சருமத்தின் நிறத்தை மாற்றிவிடும். ஆகவே நீச்சல் செய்யும் முன், வாட்டர் ப்ரூஃப் சன் ஸ்கிரீன் லோசனை தடவிக் கொண்டால், சூரியக்கதிர்களின் தாக்கத்தில் இருந்து சருமத்தை பாதுகாக்கலாம்.

குளோரின்

அனைத்து நீச்சல் குளங்களிலும் நீரை சுத்தமாக வைத்துக் கொள்ள குளோரின் பயன்படுத்தப்படும். ஆனால் அந்த குளோரின் சருமத்திற்கு மிகவும் தீங்கை விளைவிக்கும். அதிலும் சரும வறட்சி, சருமத்தின் நிறத்தை மாற்றுவது என்று பல பிரச்சனைகளை ஏற்படுத்தும்.

சுத்தமான நீரில் குளிக்கவும்

நீச்சல் குளத்தில் இருந்து வெளியே வந்த பின்னர், நல்ல சோப்பை பயன்படுத்தி, சுத்தமான நீரால் உடலை நன்கு அலசினால், சருமத்தில் குளோரினால் ஏற்படும் பாதிப்புக்களை தடுக்கலாம்.

மாய்ஸ்சுரைசர் பயன்படுத்தவும்

பொதுவாக குளித்து முடித்த பின்னர், சருமமானது உடலில் உள்ள நீரை உறிஞ்சிவிடும். ஆகவே நல்ல தரமான எண்ணெய் பசை அதிகம் உள்ள மாய்ஸ்சுரைசரைப் பயன்படுத்த வேண்டும்.

தக்காளி

நீச்சல் மேற்கொண்ட பின், தக்காளியைக் கொண்டு சருமத்தை மசாஜ் செய்தால், அதில் உள்ள சிட்ரிக் ஆசிட்டானது சருமத்தில் கருமை ஏற்படுவதைத் தடுக்கும்.

தண்ணீர் மற்றும் ஜூஸ்

நீச்சல் ஒரு உடற்பயிற்சி. ஆகவே என்ன தான் தண்ணீரில் இருந்தாலும், உடலில் இருந்து நீர்ச்சத்தானது குறையும். அதிலும் நீச்சல் குளத்தில் உள்ள நீரில் குளோரின் இருப்பதால், அவை சருமத்தை வறட்சி அடையச் செய்யும். எனவே நீர்ச்சத்து குறையாமல் இருக்க தண்ணீர் மற்றும் ஜூஸை அதிகம் குடிக்க வேண்டும்.

வாழைப்பழ ஃபேஸ் பேக்

வாழைப்பழம் ஒரு அருமையான அழகுப் பொருள் என்று சொல்லலாம். ஏனெனில் வாழைப்பழமானது சரும கருமையைப் போக்கும் தன்மைக் கொண்டது. ஆகவே நீச்சல் முடித்து வீட்டிற்கு வந்த பின்னர், வாழைப்பழத்தை மசித்து, அதில் தேன் சேர்த்து கலந்து சருமத்திற்கு தடவி ஊற வைத்து கழுவினால், சருமத்தில் உள்ள கருமையுடன், வறட்சியடையாமலும் இருக்கும்.

நீச்சலுக்கு பின்...

நீச்சல் மேற்கொள்ளும் போது சருமமானது நன்கு நீரில் ஊறி ஈரமாக இருப்பதால், சூரியக் கதிர்கள் படும் போது, சருமமானது எளிதில் பாதிப்படைகிறது. ஆகவே நீச்சலை மேற்கொள்ளும் முன்பும் சரி, பின்பும் சரி சன் ஸ்க்ரீன் லோசனை பயன்படுத்தாமல் வெயிலில் செல்ல வேண்டாம்.