புகைப்பிடிப்பதால் அழகிற்கு ஏற்படும் பிரச்சனைகள்!!!

எப்போதும் சோர்வாக இருத்தல்

புகைப்பிடிப்பதால் கண்ணைச் சுற்றி வீக்கம் அல்லது கருவளையம் உருவாகும், இதனால் முகம் எப்போது சோர்வாக தோன்றும். புகைப்பிடிப்பவர்கள் அதிகளவில் தூக்கத்தை இழப்பதற்கான (நான்கு மடங்கு அதிகமாக) வாய்ப்பு இருப்பதால், இளம் வயதிலே கண்ணைச் சுற்றி ‘ஐ பாக்ஸ்' அல்லது கரு வளையம் உருவாகிறது. இது முக சோர்வுக்கு வழிவகுக்கும்.

மஞ்சள் நிற பற்கள்

புகையிலையிலுள்ள நிக்கோட்டின் என்ற நச்சுத்தன்மை, அசிங்கமான மஞ்சள் நிற பற்கள் தோன்றுவதற்கான முக்கிய காரணமாகும். ஆகவே பற்கள் தொடர்ந்து வெள்ளையாக இருக்க ஆசைப்பட்டால், புகைப்பிடிப்பதை நிறுத்துங்கள். பற்களில் மஞ்சள் நிறம் ஏற்பட்டால், அதை இலகுவாக நீக்கிவிட முடியாது. இதை நீக்க வேண்டுமெனில், டீத் க்ளினிங் அல்லது ஒயிட்டனிங் போன்ற செயல்பாடுகள் பல் மருத்துவர்கள் மூலம் செய்யப்பட வேண்டும். இல்லையெனில் கடைசி வரை மஞ்சள் நிற பற்களோடே இருக்க வேண்டும்.

முகத்தில் சுருக்கம் ஏற்படுதல்

ஒருவர் தொடந்து புகைப்பிடிப்பதால், சருமத்தை ஆரோக்கியமாக வைத்திருக்க தேவையான இரத்த ஓட்டம் தடைப்படும், இதனால், புகைப்பிடிக்காதவர்களை விட, புகைப்பிடிப்பவர்கள் 1.4 தடவை வயதானவர்களாக தோன்றுவார்கள்.

விரல்கள் மற்றும் கைகளில் மஞ்சள் நிற கறை

நிக்கோட்டின் பற்களை மட்டுமல்ல, விரல்களிலும் மஞ்சள் நிற கறை ஏற்படுவதற்கு முக்கிய காரணியாகும். இந்த மஞ்சள் நிற கறையை, வீட்டு வைத்தியம் மூலம் நீக்க முடியும் என்றாலும், புகைப்பிடித்தலை நிறுத்துவது அதைவிட சிறந்தது.

தலைமுடி பாதிப்பு

புகைப்பிடிப்பதிலிருந்து வெளியாகும் ஒருவகை கெமிக்கல், முடியின் டி.என்.ஏ-யில் பாதிப்பை ஏற்படுத்துவதால், பலவீனமான மற்றும் முடி உடைதல் போன்ற பிரச்சனைகள் உருவாகும். எனவே தான், தொடர்ந்து புகைப்பிடிக்கும் ஒருவருக்கு முடி உதிரும் பிரச்சனை அதிகமாக இருக்கும்.

வடுக்கள் அல்லது தழும்புகள்

புகையிலையிலுள்ள நிக்கோட்டின், குழாய்ச் சுருக்கம் (வாசோகன்ஸ்ட்ரிக் ஷன்) என்ற நிலையை உருவாக்குவதால், இது குருதிக் குழாய்ச் சுருக்கத்திற்கு வழிவகுக்கிறது. இதனால், ஆக்ஸிஜன் நிறைந்த குருதி முகத்திற்கு செல்வது குறைவதால், முகப்பொலிவு பாதிக்கப்படும். இதனால் முகத்தில் வடுக்கள் ஏற்பட்டு, இதை குணப்படுத்த நீண்ட நாள் தேவைப்படும்.

புகைப்பிடிப்போர் முகம் (ஸ்மோக்கர்ஸ் ஃபேஸ்)

புகையிலையிலுள்ள கார்பன் மோனாக்ஸைடு சருமத்தில் ஆக்ஸிஜனைக் குறைக்கிறது. நிக்கோட்டின் இரத்த ஒட்டத்தை தடை செய்கிறது. இவற்றால், வெளுத்த, பொலிவற்ற வறட்சியான முகத்தோற்றம் உருவாகும். இது ‘ஸ்மோக்கர்ஸ் ஃபேஸ்' என அழைக்கப்படுகிறது.

ஸ்ட்ரெட்ச் மார்க் (சரும தழும்பு)

நிக்கோட்டின் சருமத்திசுக்களை பாதிப்பது மட்டுமன்றி, இது சருமத்தின் நெகிழ்வுத் தன்மையையும் குறைக்கிறது. உடல் எடை திடீரென கூடுதல் அல்லது குறைவதால், வெளுத்த கோடு போன்ற தழும்பு தோலில் ஏற்படுகிறது. சருமம் தானாக குணமடையும் தன்மையை நிக்கோட்டின் தடை செய்வதால், இந்த தழும்பு நீங்காது தொடர்ந்திருக்கும்.

பற்சிதைவு

அதிகமாக புகைப்பிடிப்பதால் பற்கள் முழுமையாக பாதிப்படையும். இதில் பல் மஞ்சள் நிறமடைதல் ஒரு ஆரம்ப நிலையே. இதன் தொடர்ச்சியாக, அனைத்து பற்களும் பாதிக்கப்பட்டு, பற்கள் விழுவதற்காக வாய்ப்பு அதிகரிக்கும்.

கண் படலம்

நம் எல்லோருக்கும் கண் பார்வை மிகவும் அவசியம். ஆகவே இது பாதிக்கப்படாமல் இருக்க வேண்டுமென்றால், புகைப்பிடிப்பதை நிறுத்த வேண்டும். புகைப்பிடிப்பதால் இளம் வயதிலேயே கண்ணில் படலம் ஏற்படும் சாத்தியம் உருவாகி, கண் பார்வையில் பாதிப்பு ஏற்படும்.