சுட்ட கத்திரிக்காய் சட்னி

உங்கள் வீட்டில் கத்திரிக்காய் நிறைய உள்ளதா? அந்த கத்திரிக்காயைக் கொண்டு என்ன செய்வதென்று யோசித்துக் கொண்டிருக்கிறீர்களா? அப்படியானால் அதைக் கொண்டு சுட்ட கத்திரிக்காய் சட்னி செய்யுங்கள். இந்த சட்னி இட்லி, தோசைக்கு மிகவும் அட்டகாசமாக இருக்கும். முக்கியமாக இந்த சட்னியின் சிறப்பு என்னவென்றால், இதை அரைக்க வேண்டிய அவசியமில்லை கையால் பிசைந்தாலே போதுமானது. இந்த சட்னி செய்வதற்கு மிகவும் சுலபமாக இருப்பதோடு, குழந்தைகள் முதல் பெரியவர்கள் வரை அனைவரும் விரும்பி சாப்பிடும் வகையில் இருக்கும்.

உங்களுக்கு சுட்ட கத்திரிக்காய் சட்னி எப்படி செய்வதென்று தெரிந்து கொள்ள வேண்டுமா? கீழே சுட்ட கத்திரிக்காய் சட்னியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கத்திரிக்காய் - 2

* வரமிளகாய் - 4-5

* பெருங்காயத் தூள் - 1/2 டீஸ்பூன்

* புளி - 1 சிறிய எலுமிச்சை அளவு

* உப்பு - சுவைக்கேற்ப

செய்முறை:

* முதலில் கத்திரிக்காயை நன்கு கழுவிக் கொள்ள வேண்டும். பின் அந்த கத்திரிக்காயை நெருப்பில் நன்கு சுட்டுக் கொள்ள வேண்டும். பின்பு அதை குளிர்ந்த நீரில் போட்டு, பின் தோலை உரித்துக் கொள்ள வேண்டும்.

* அதன் பின் அந்த கத்திரிக்காயை கையால் நன்கு மசித்துக் கொள்ள வேண்டும்.

* பின்பு வரமிளகாயை நெருப்பில் நன்கு சுட்டு, அதை கையால் உடைத்து, கத்திரிக்காயுடன் சேர்த்து பிசைய வேண்டும்.

* பிறகு புளியை நீரை ஊற வைத்து, கையால் நன்கு பிசைந்து, அதன் சாற்றினை மசித்த கத்திரிக்காயுடன் சேர்த்துக் கொள்ள வேண்டும்.

* பின்னர் அதில் சுவைக்கேற்ப உப்பு மற்றும் பெருங்காயத் தூள் சேர்த்து கிளற வேண்டும்.

* இறுதியாக ஒரு வாணலியை அடுப்பில் வைத்து, அதில் இந்த கத்திரிக்காயை ஊற்றி சற்று கெட்டியாகும் வரை கொதிக்கவிட்டு இறக்கினால், சுட்ட கத்திரிக்காய் சட்னி தயார்.

Image Courtesy: yummytummyaarthi