சத்தான மீல் மேக்கர் கட்லெட் ரெசிபி - ட்ரை பண்ணி பாருங்க - மொறுமொறுனு சாப்பிட சூப்பரா இருக்கும்

Soya Chunks Cutlet Recipe in Tamil: மாலை நேரத்தில் உங்கள் வீட்டிலுள்ளவர்கள் சாப்பிட மொறுமொறுப்பான ஸ்நாக்ஸ் கேட்கிறார்களா? வழக்கமான பஜ்ஜி. போண்டா போன்ற ஸ்நாக்ஸ்களைப் போல அல்லாமல் ஏதாவது வித்தியாசமான ஸ்நாக்ஸ் ஏதாவது செய்து கொடுக்க கேட்கிறார்களா? அப்படியானால் வீட்டில் மீல் மேக்கரும், உருளைக்கிழங்கும் இருந்தால், அவற்றைக் கொண்டு அட்டகாசமான சுவையில் மொறுமொறுப்பான கட்லெட்டை செய்து கொடுங்கள்.

இந்த சுவையான கட்லெட் வழக்கமாக செய்வது போன்று இல்லாமல் வித்தியாசமாக இருக்கும். இது ஒரு அற்புதமான ஸ்நாக்ஸாக மட்டுமின்றி, ஒரு சுவையான மற்றும் ஆரோக்கியமான டிபனாகவும் இருக்கும். ஒருமுறை இந்த ஸ்நாக்ஸை செய்தால் அடிக்கடி செய்து கொடுக்குமாறு கேட்பார்கள். மாலை நேரத்தில் சாப்பிட இது அட்டகாசமான ஸ்னாக்ஸாக இருக்கும்.

உங்களுக்கு மொறுமொறுப்பான சோயா கட்லெட்டை எப்படி செய்வதென்று தெரிந்து கொள்ள வேண்டுமா? கீழே சோயா கட்லெட் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- மீல் மேக்கர் - 1 கப்
- வேகவைத்த உருளைக்கிழங்கு - 1
- பால் - 2 ஸ்பூன்
- இஞ்சி-பூண்டு விழுது - 1 ஸ்பூன்
- புதினா இலைகள் - சிறிதளவு
- கொத்தமல்லி இலைகள் - சிறிதளவு
- மிளகாய் தூள் - 1 ஸ்பூன்
- சீரகத் தூள் - 1/2 ஸ்பூன்
- கரம் மசாலா - 1/4 ஸ்பூன்
- வேர்க்கடலை - 1 ஸ்பூன்
- உப்பு - தேவையான அளவு
- சோள மாவு - 3 ஸ்பூன்
- பிரட் தூள் - 1/2 கப்
- எண்ணெய் - பொரிப்பதற்குத் தேவையான அளவு

செய்முறை:

- ஒரு பாத்திரத்தில் 2 கப் தண்ணீர் மற்றும் பாலைச் சேர்க்கவும். அது கொதிக்கத் தொடங்கும்போது, ​​அதில் மீல் மேக்கர் துண்டுகளைச் சேர்க்கவும்.

- இதை 2 நிமிடங்கள் கொதிக்க விடவும். பிறகு அடுப்பை அணைத்துவிடவும்.

- மீல் மேக்கரில் உள்ள நீரை வடித்துவிட்டு, அவற்றில் எஞ்சியிருக்கும் அதிகப்படியான நீரை நன்றாகப் பிழிந்து வெளியேற்றவும். இது மிகவும் முக்கியமானதாகும்.

- ஏனெனில் நீர் இருந்தால் கட்லெட்டுகள் சரியான வடிவத்தில் இருக்காது. எனவே, கைகளால் நன்கு அழுத்தி அதிகப்படியான நீரை வெளியேற்றவும்.

- ஒரு அகலமான பாத்திரத்தில் சோயா துண்டுகள், மசித்த உருளைக்கிழங்கு மற்றும் இஞ்சி-பூண்டு விழுது ஆகியவற்றைச் சேர்க்கவும்.

- அத்துடன் மிளகாய் தூள், கரம் மசாலா, சீரகத் தூள், உப்பு, வேர்க்கடலை மற்றும் பொடியாக நறுக்கிய கொத்தமல்லி, புதினா இலைகளைச் சேர்க்கவும்.

- இந்த கலவையை நன்றாகக் கலக்கவும். இதனுடன் 2 ஸ்பூன் சோள மாவைச் சேர்க்கவும்.

- இந்த கலவையை நன்றாகக் கலக்கவும். இந்த கலவையிலிருந்து ஒரு மீடியம் சைஸ் உருண்டையை கையில் எடுக்கவும். அதைத் தட்டையாகத் தட்டி வடை வடிவில் செய்யவும்.

- ஒரு பாத்திரத்தில் 1 டேபிள்ஸ்பூன் சோள மாவைச் சேர்த்து, அதில் தண்ணீர் ஊற்றி கட்டிகள் இல்லாமல் பசை போல ஆக்கவும்.

- தட்டி வைத்ததை சோள மாவில் விரைவாக முக்கி, பிரெட் தூளில் நன்றாகப் புரட்டவும். இதேபோல மீதமுள்ள மாவையும் தயார் செய்யவும்.

- நீங்கள் விருப்பப்பட்டால் பொரிக்கலாம், இல்லையெனில் ஒரு தோசைக்கல்லைச் சூடாக்கவும். அதில் சில துளிகள் எண்ணெய் ஊற்றி, கட்லெட்டுகளை வைத்து, அவை பொன்னிறமாகும் வரை இருபுறமும் வேகவைக்கவும்.

- அவ்வளவுதான் சூப்பரான மீல் மேக்கர் கட்லெட் ரெடி.