சன்டே ஸ்பெஷல்: மட்டன் கொத்துக்கறி ரெசிபி

மழை பெய்துள்ளதால் பலருக்கும் சளி பிடித்திருக்கும். இன்று வார விடுமுறையில் மட்டன் செய்ய திட்டமிட்டுள்ளீர்களா? அப்படியானால் மட்டனைக் கொண்டு நல்ல காரசாரமான ஒரு ரெசிபி செய்யுங்கள். அதுவும் மிளகுத் தூள் நிறைய சேர்த்து மட்டன் கொத்துக்கறி செய்தால், சளி அனைத்தும் முறிந்துவிடும். இந்த மட்டன் கொத்துக்கறி ரசம் சாதம், சப்பாத்தி, பூரி, சாதம் போன்றவற்றுடன் சேர்த்து சாப்பிட அற்புதமாக இருக்கும்.

உங்களுக்கு மட்டன் கொத்துக்கறி எப்படி செய்வதென்று தெரிந்து கொள்ள வேண்டுமா? கீழே மட்டன் கொத்துக்கறி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எலும்பில்லாத மட்டன் - 1/2 கிலோ

* மிளகாய் தூள் - 2 டீஸ்பூன்

* மஞ்சள் தூள் - 2 டீஸ்பூன்

* உப்பு - சுவைக்கேற்ப

* தண்ணீர் - 1/2 கப்

மசாலாவிற்கு...

* தேங்காய் எண்ணெய் - 1/4 கப்

* சோம்பு - 2 டீஸ்பூன்

* வெங்காயம் - 2 (பொடியாக நறுக்கியது)

* பச்சை மிளகாய் - 3 (நீளமாக கீறியது)

* இஞ்சி பூண்டு பேஸ்ட் - 2 டேபிள் ஸ்பூன்

* கறிவேப்பிலை - சிறிது

* மிளகாய் தூள் - 1 டீஸ்பூன்

* மல்லித் தூள் - 1 டேபிள் ஸ்பூன்

* கரம் மசாலா - 1 டேபிள் ஸ்பூன்

* உப்பு - சுவைக்கேற்ப

* மிளகுத் தூள் - 1 டீஸ்பூன்

* கொத்தமல்லி - சிறிது

செய்முறை:

* முதலில் மட்டனை நன்கு கழுவிக் கொள்ள வேண்டும்.

* பின் குக்கரில் மட்டனைப் போட்டு, அத்துடன் மிளகாய் தூள், மஞ்சள் தூள், சுவைக்கேற்ப உப்பு மற்றும் 1/2 கப் நீரை ஊற்றி அடுப்பில் வைத்து, குக்கரை மூடி 12-15 விசில் விட்டு இறக்கிக் கொள்ள வேண்டும். விசில் போனதும் குக்கரைத் திறந்து கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் தேங்காய் எண்ணெய் ஊற்றி சூடானதும், சோம்பு சேர்த்து தாளிக்க வேண்டும்.

* பிறகு அதில் வெங்காயம், கறிவேப்பிலை, பச்சை மிளகாய் சேர்த்து சில நிமிடங்கள் வதக்க வேண்டும்.

* அடுத்து அதில் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.

* பின் அதில் வேக வைத்த மட்டனை சேர்த்து, அத்துடன் மிளகாய் தூள், மல்லித் தூள் மற்றும் கரம் மசாலா சேர்த்து நன்கு நீர் வற்றும் வரை கிளறி விட வேண்டும்.

* மட்டனில் இருந்து நீர் முற்றிலும் வற்றியதும், மேலே மிளகுத் தூளை தூவி கிளறி, அதன் பின் கொத்தமல்லியைத் தூவி இறக்கினால், மட்டன் கொத்துக்கறி தயார்.

Image Courtesy: yummytummyaarthi