வீட்டுல மேகி இருக்கா? அப்ப இந்த மாதிரி பேல் பூரி செய்யுங்க.. குழந்தைங்க விரும்பி சாப்பிடுவாங்க...

Maggi Bhel Puri Recipe In Tamil: வீட்டில் குழந்தைகள் இருந்தால், நிச்சயம் மாலை வேளையில் சாப்பிட ஸ்நாக்ஸ் கேட்பார்கள். அப்படி கேட்கும் போது, நீங்கள் எப்போதும் ஒரே மாதிரியான ஸ்நாக்ஸை சாப்பிடக் கொடுத்தால், அது அவர்களுக்கு போரடித்துவிடும். உங்கள் குழந்தைகளுக்கு மாலை வேளையில் ஒரு ட்ரீட் தரும் வகையில் ஒரு ஸ்நாக்ஸ் செய்து கொடுக்க நினைக்கிறீர்களா?

அப்படியானால் வீட்டில் மேகி இருந்தால், அவற்றைக் கொண்டு மேகி பேல் பூரியை செய்யுங்கள். இந்த மேகி பேல் பூரி குழந்தைகள் மீண்டும் மீண்டும் கேட்டு வாங்கி சாப்பிடும் வகையில் ருசியாக இருக்கும். முக்கியமாக இந்த பேல் பூரி 5 நிமிடத்தில் செய்யக்கூடிய வகையில் ஈஸியாக இருக்கும்.

உங்களுக்கு மேகி பேல் பூரியை எப்படி செய்வதென்று தெரிந்து கொள்ள வேண்டுமா? கீழே மேகி பேல் பூரி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வேர்க்கடலை - 1/4 கப்
* மேகி - 1 பாக்கெட்
* வெண்ணெய் - 1 ஸ்பூன்
* பாதாம் - 5 (ஒன்றிரண்டாக தட்டிக் கொள்ளவும்)
* முந்திரி - 5 (ஒன்றிரண்டாக தட்டிக் கொள்ளவும்)
* உப்பு - சுவைக்கேற்ப
* மிளகாய் தூள் - 1/2 டீஸ்பூன்
* மேகி மசாலா - 1/2 டீஸ்பூன்
* வெங்காயம் - 1 (பொடியாக நறுக்கியது)
* தக்காளி - 1 (பொடியாக நறுக்கியது)
* எலுமிச்சை சாறு - 1 டேபிள் ஸ்பூன்
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் வேர்க்கடலையைப் போட்டு நன்கு வறுத்து இறக்கி, தோலை நீக்கிவிட்டு தனியாக வைத்துக் கொள்ள வேண்டும்.
* பின்னர் அதே வாணலியை அடுப்பில் வைத்து, அதில் வெண்ணெய் சேர்த்து உருகியதும், அதில் ஒரு பாக்கெட் மேகியை நொறுக்கிப் போட்டு பொன்னிறமாக வறுக்க வேண்டும்.
* அதன் பின் அத்துடன் வறுத்த வேர்க்கடலை, சிறிது பாதாம் மற்றும் முந்திரியையும் போது சிறிது நேரம் வறுத்து இறக்கி ஒரு கிண்ணத்தில் போட்டுக் கொள்ள வேண்டும்.
* பின்பு அதில் மிளகாய் தூள், சுவைக்கேற்ப உப்பு மற்றும் சிறிது மேகி மசாலாவை சேர்க்க வேண்டும்.
* அடுத்து பொடியாக நறுக்கிய வெங்காயம் மற்றும் தக்காளியை சேர்க்க வேண்டும்.
* இறுதியாக எலுமிச்சை சாறு மற்றும் கொத்தமல்லியைத் தூவி நன்கு கரண்டியால் கிளறி பரிமாறினால், சுவையான மேகி பேல் பூரி தயார்.

Image Courtesy: PassionateHomemaker