வெண்டைக்காயை தாபா ஸ்டைலில் இந்த மாதிரி செஞ்சு பாருங்க... சப்பாத்திக்கு அட்டகாசமா இருக்கும்...!

Dhaba Style Ladies Finger Fry Recipe in Tamil: பெரும்பாலான வீடுகளில் அடிக்கடி சமைக்கப்படும் காய்கறிகளில் ஒன்று வெண்டைக்காய். அதற்கு காரணம் வெண்டைக்காயின் சுவையும், அதிலுள்ள மருத்துவ குணங்களும்தான். பொதுவாக வெண்டைக்காய் சாப்பிட்டால் மூளை நன்கு வளரும் என்று கூறுவார்கள். வெண்டைக்காயை அதிகம் சமைக்க இதுவும் ஒரு முக்கியக் காரணம்.

வெண்டைக்காயை பொதுவாக சாம்பார் வைத்தோ அல்லது பொரியல் செய்தோ சாப்பிடுவோம், ஆனால் தாபாக்களில் வெண்டைக்காயை காரமாக ஒரு தனித்துவமான பொரியல் செய்வார்கள். இதை சாதத்துடனோ அல்லது சப்பாத்தி, ரொட்டியுடனோ வைத்து சாப்பிட சூப்பராக இருக்கும். இந்த பதிவில் சூப்பரான தாபா ஸ்டைல் வெண்டைக்காய் ப்ரை எப்படி செய்யலாம் என்று தெரிந்து கொள்ளலாம்.

தேவையானப் பொருட்கள்:

- 250 கிராம் வெண்டைக்காய்
- 5 ஸ்பூன் எண்ணெய்
- 1 ஸ்பூன் சீரகம்
- 1/2 ஸ்பூன் கடுகு
- 1 கப் நறுக்கிய வெங்காயம்
- 1 கப் அரைத்த தக்காளி விழுது
- 1 ஸ்பூன் இஞ்சி பூண்டு விழுது
- 1 கொத்து கறிவேப்பிலை
- 1 ஸ்பூன் சீரகத்தூள்
- 1 ஸ்பூன் மல்லித்தூள்
- 1/2 ஸ்பூன் கரம் மசாலா
- 2 சிட்டிகை மஞ்சள்தூள்
- 1 ஸ்பூன் மிளகாய் தூள்
- உப்பு தேவையான அளவு

செய்முறை:

- ஒரு பாத்திரத்தில் 2 ஸ்பூன் எண்ணெயைச் சூடாக்கி, அதில் வெண்டைக்காய் துண்டுகளைச் சேர்த்து, அவை கருமையாக மாறும் வரை வதக்கவும். பின்னர் அதை ஆறும் படி ஓரமாக வைக்கவும்.

- அதே பாத்திரத்தில், 3 ஸ்பூன் எண்ணெய் சேர்த்து, எண்ணெய் சூடானதும் அதில் கடுகு போட்டு பொரிய விடவும்.

- பின்னர் அதில் சீரகத்தை போட்டு தாளிக்கவும்.

-பின்னர் பொடியாக நறுக்கிய வெங்காயத்தைச் சேர்த்து, அது பொன்னிறமாக மாறும் வரை வதக்கவும். வெங்காயம் நிறம் மாறும் போது, ​​கறிவேப்பிலை சேர்க்கவும்.

- வெங்காயம் நிறம் மாறியதும், இஞ்சி பூண்டு விழுது சேர்த்து பச்சை வாசனை போகும் வரை வதக்கவும், பின்னர் உப்பு, மிளகாய் தூள், கரம் மசாலா, மல்லித்தூள், சீரகத்தூள் மற்றும் மஞ்சள் தூள் சேர்த்து, எண்ணெய் பிரியும் வரை வதக்கவும்.

- பின்னர் அரைத்த தக்காளி விழுதை சேர்த்து வதக்கவும்.

- எண்ணெய் தனியாக பிரிந்து வந்த பின், வதக்கி வைத்த வெண்டைக்காயைச் சேர்த்து 3-4 நிமிடங்கள் சமைக்கவும். எண்ணெய் பிரிந்து வந்ததும் அடுப்பிலிருந்து இறக்கவும்.

- அட்டகாசமான வெண்டைக்காய் பிரை ரெடி. இதை சாப்பாடு அல்லது சப்பாத்தியுடன் சாப்பிட அருமையாக இருக்கும்.