கொத்தவரங்காயை வெச்சு இப்படி கார குழம்பு செய்யுங்க.. சாதத்துடன் சாப்பிட சூப்பரா இருக்கும்...

Kothavarangai Kara Kuzhambu Recipe In Tamil: மதிய வேளையில் என்ன சமைப்பது என்று யோசித்துக் கொண்டிருக்கிறீர்களா? உங்கள் வீட்டில் கொத்தவரங்காய் உள்ளதா? இதுவரை நீங்கள் கொத்தவரங்காயை கொண்டு பொரியல், அவியல் என்று செய்திருக்கலாம்.

ஆனால் அதைக் கொண்டு கார குழம்பு செய்திருக்கிறீர்களா? இல்லையென்றால், அடுத்தமுறை கொத்தவரங்காயைக் கொண்டு காரகுழம்பு செய்யுங்கள். இந்த கொத்தவரங்காய் கார குழம்பு செய்வது மிகவும் சுலபம் மற்றும் இது சாதத்துடன் சாப்பிட அட்டகாசமாக இருக்கும்.

உங்களுக்கு கொத்தவரங்காய் கார குழம்பு எப்படி செய்வதென்று தெரிந்து கொள்ள வேண்டுமா? கீழே கொத்தவரங்காய் கார குழம்பு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* புளி - 1 சிறிய எலுமிச்சை அளவு
* சின்ன வெங்காயம் - 10-12
* கொத்தவரங்காய் - 15
* சாம்பார் தூள் - 2 டேபிள் ஸ்பூன்

தாளிப்பதற்கு...

* நல்லெண்ணெய் - 3 டேபிள் ஸ்பூன்
* கடுகு - 1 டீஸ்பூன்
* வெந்தயம் - 1/2 டீஸ்பூன்
* பெருங்காயத் தூள் - 1 சிட்டிகை
* கறிவேப்பிலை - சிறிது

செய்முறை:

* முதலில் சின்ன வெங்காயத்தை பொடியாக நறுக்கிக் கொள்ள வேண்டும். பின் கொத்தவரங்காயை இரண்டு இன்ச் துண்டுகளாக வெட்டிக் கொள்ள வேண்டும்.
* பின்பு புளியை 1 கப் நீரில் 15 நிமிடம் ஊற வைத்து, பின் அதை பிசைந்து சாறு எடுத்து தனியாக வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடானதும், கடுகு, வெந்தயம், பெருங்காயத் தூள், கறிவேப்பிலை சேர்த்து தாளிக்க வேண்டும்.
* பிறகு சின்ன வெங்காயம் மற்றும் கொத்தவரங்காயை சேர்த்து நன்கு வதக்க வேண்டும்.
* பின் அதில் சாம்பார் தூள், தேவையான அளவு உப்பு சேர்த்து நன்கு 2-3 நிமிடம் கிளறி விட வேண்டும்.
* அடுத்து புளிச்சாற்றினை சேர்த்து, மிதமான தீயில் வைத்து, நன்கு பச்சை வாசனை போக கொதிக்க வைத்து இறக்கினால், சுவையான கொத்தவரங்காய் கார குழம்பு தயார்.

Image Courtesy: padhuskitchen