1 கப் பச்சை பயறும், முட்டையும் வெச்சு.. காலையில் இந்த மாதிரி தோசை சுடுங்க.. டேஸ்ட் அருமையா இருக்கும்...

Pachaipayaru Muttai Dosa Recipe In Tamil: காலையில் உங்கள் வீட்டில் பெரும்பாலும் இட்லி, தோசை தான் செய்வீர்களா? அதுவும் தோசை அதிகமாக செய்வீர்களானால், எப்போதும் ஒரே மாதிரி தோசை செய்யாமல், அவ்வப்போது சற்று வித்தியாசமாகவும் தோசை செய்து சாப்பிட்டால் தான், தோசை வெறுத்துப் போகாமல் இருக்கும். அப்படி என்ன வித்தியாசமான தோசை சுடலாம் என்று கேட்கலாம்.

வீட்டில் பச்சை பயறு இருந்தால், அதைக் கொண்டு சத்தான தோசை சுடலாம். அதுவும் இந்த தோசையுடன் முட்டையை சேர்த்து செய்தால், இன்னும் சுவை பிரமாதமாக இருக்கும். டயட்டில் இருப்பவர்கள் சத்தான காலை உணவை சாப்பிட நினைத்தால், இந்த பச்சைபயறு முட்டை தோசையை செய்யலாம். இந்த தோசையில் புரோட்டீன் அதிகம் உள்ளது. எனவே எடையைக் குறைக்க நினைப்போருக்கு ஏற்றது.

உங்களுக்கு பச்சை பயறு முட்டை தோசையை எப்படி செய்வதென்று தெரிந்து கொள்ள வேண்டுமா? கீழே பச்சை பயறு முட்டை தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பச்சை பயறு - 1 கப்
* இஞ்சி - 1 சிறிய துண்டு
* பச்சை மிளகாய் - 1
* பாலக் கீரை - சிறிது
* உப்பு - சுவைக்கேற்ப
* முட்டை - தேவையான அளவு
* வெங்காயம் - 1 (பொடியாக நறுக்கியது)
* இட்லி பொடி - சிறிது
* எண்ணெய் - தேவையான அளவு

செய்முறை:

* முதலில் பச்சை பயறை இரவு தூங்கும் முன் நீரில் ஊற வைத்துக் கொள்ள வேண்டும்.
* பின் மறுநாள் காலையில் ஊற வைத்த பச்சைப்பயறை மிக்சர் ஜாரில் போட்டு, அத்துடன் இஞ்சி, பச்சை மிளகாய், பாலக்கீரை மற்றும் சுவைக்கேற்ப உப்பு சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்பு அரைத்த மாவை ஒரு பாத்திரத்தில் ஊற்றி, தோசை மாவு பதத்தில் கலந்து கொள்ள வேண்டும்.
* பிறகு தோசைக்கல்லை அடுப்பில் வைத்து, கல் சூடானதும், தயாரித்த மாவை ஒரு கரண்டி எடுத்து தோசையாக ஊற்றி, அதன் மேலே 1 முட்டையை உடைத்து ஊற்றி தோசையின் மேல் பரப்பி விட்டு, மேலே பொடியாக நறுக்கிய வெங்காயம் மற்றும் இட்லி பொடியைத் தூவி, எண்ணெய் ஊற்றி சிறிது நேரம் வேக வைத்து, பின் திருப்பிப் போட்டு சிறிது நேரம் வேக வைத்து எடுத்தால், சுவையான பச்சை பயறு முட்டை தோசை தயார்.