பக்ரீத் ஸ்பெஷல் மட்டன் க்ரீன் மசாலா - இத ஒருடைம் ட்ரை பண்ணுங்க.. டேஸ்ட் நாக்குலயே நிக்கும்..

Bakrid Special Mutton Green Masala Recipe In Tamil: பக்ரீத் பண்டிகையை முன்னிட்டு வீட்டில் மட்டன் பிரியாணி மட்டுமின்றி, அதற்கு சைடு டிஷ்ஷாக வேறு பல சுவையான மட்டன் ரெசிபிக்களையும் செய்து வைப்பார்கள். அப்போது உங்கள் வீட்டில் உள்ளோருக்கு சற்று வித்தியாசமான, அதே சமயம் ருசியான ஒரு மட்டன் ரெசிபியை செய்து கொடுக்க நினைத்தால், மட்டன் கிரீன் மசாலாவை செய்யுங்கள்.

இந்த மட்டன் மசாலா சாதத்துடன் மட்டுமின்றி, இட்லி, சப்பாத்தி போன்றவற்றுடன் சேர்த்து சாப்பிடவும் அற்புதமாக இருக்கும். முக்கியமாக இந்த மட்டன் மசாலா சட்டென்று செய்யக்கூடியவாறு மிகவும் சுலபமாக இருக்கும். இந்த ரெசிபிக்கு ஸ்பெஷலாக ஒரு மசாலா மட்டும் அரைத்தால் போதும், பின் சட்டென்று தயாராகிவிடும். முக்கியமாக இந்த ரெசிபியை வீட்டில் உள்ளோருக்கு செய்து கொடுக்கும் போது, வீட்டில் உள்ளோரின் பாராட்டுக்களைப் பெறலாம்.

இந்த மட்டன் க்ரீன் மசாலா ரெசிபி குறித்து ஷில்பா சமையல் என்னும் இன்ஸ்டாகிராம் பக்கத்தில் பகிரப்பட்டுள்ளது. உங்களுக்கு இந்த மட்டன் க்ரீன் மசாலாவை எப்படி செய்வதென்று தெரிந்து கொள்ள வேண்டுமா? கீழே மட்டன் க்ரீன் மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

அரைப்பதற்கு...

* வெங்காயம் - 1 (நறுக்கியது)
* பச்சை மிளகாய் - 8
* பூண்டு - 1 கைப்பிடி
* இஞ்சி - 1 துண்டு
* சீரகம் - 1 1/2 ஸ்பூன்
* மிளகு - 1 1/2 ஸ்பூன்
* புதினா - 1 கைப்பிடி
* கொத்தமல்லி - 1 கைப்பிடி

தாளிப்பதற்கு...

* எண்ணெய் - 2 டேபிள் ஸ்பூன்
* மட்டன் - 1 கிலோ
* மஞ்சள் தூள் - 1/2 டீஸ்பூன்
* உப்பு - சுவைக்கேற்ப
* அரைத்த விழுது

செய்முறை:

* முதலில் மிக்சர் ஜாரில் வெங்காயம், பூண்டு, இஞ்சி, பச்சை மிளகாய் ஆகியவற்றை சேர்க்க வேண்டும்.
* அதன் பின் அதில் சீரகம், மிளகு ஆகியவற்றை சேர்க்க வேண்டும்.
* அடுத்து அதில் 1 கைப்பிடி புதினா, 1 கைப்பிடி கொத்தமல்லியை சேர்த்து, நீர் சேர்க்காமல் நன்கு மென்மையாக அரைத்துக் கொள்ள வேண்டும்.
* பிறகு மட்டனை நன்கு கழுவிக் கொள்ள வேண்டும்.
* பின்பு ஒரு குக்கரை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி சூடானதும், மட்டனை சேர்த்து நன்கு 5 நிமிடம் வதக்க வேண்டும்.
* அதன் பின் அதில் மஞ்சள் தூள் மற்றும் சுவைக்கேற்ப உப்பு சேர்த்து நன்கு வதக்க வேண்டும்.
* பின்னர் அதில் அரைத்த விழுதை சேர்த்து நன்கு கிளறி விட்டு, குக்கரை மூடி 10 விசில் விட்டு இறக்கினால், சுவையான மட்டன் க்ரீன் மசாலா தயார்.