ஒரு ரயில் டிக்கெட்டின் விலை 17 லட்சத்திற்கு விற்கப்படும் உலகின் ஆடம்பர ரயில் - எந்த நாட்டில் ஓடுது தெரியுமா?

ரயில் போக்குவரத்து என்பது உலகம் முழுவதும் கிட்டதட்ட அனைத்து நாடுகளிலும் இருக்கும் ஒரு அத்தியாவசியமான போக்குவரத்து துறையாகும். இந்தியாவில் கிட்டதட்ட 13,000-க்கும் மேற்பட்ட ரயில்கள் உள்ளன. ஆனால் இந்தியாவை விட அதிவேக ரயில்களும், நவீன ரயில்களும் பிற நாடுகளில் உள்ளன. ஜப்பான் அதன் அதிவேக ரயில்களுக்கு பெயர் பெற்றது என்பது உலகமே அறிந்ததுதான். ஜப்பானில் நீண்ட தூரங்களை சில நிமிடங்களில் கடந்து விட முடியும் மற்றும் அதிவேகம் என்பது இங்கு பயண அனுபவத்தின் ஒரு முக்கிய அங்கமாக உள்ளது.

ஆனால் ஜப்பானின் கியூஷு எனும் தெற்குத் தீவில், இதற்கு முற்றிலும் மாறுபட்ட ஒரு ரயில் சேவை உள்ளது. பயணிகளை ஒரு நகரத்திலிருந்து மற்றொரு நகரத்திற்கு அவசரமாக அழைத்துச் செல்வதற்குப் பதிலாக, நிதானமாகப் பயணத்தை ரசிக்க இந்த ரயில் அவர்களை ஊக்குவிக்கிறது. எரிமலை சார்ந்த நிலப்பரப்புகள், கடற்கரைப் பகுதிகள், வரலாற்றுச் சிறப்புமிக்க நகரங்கள் மற்றும் வெந்நீர் ஊற்றுகள் நிறைந்த பகுதிகள் வழியாகச் செல்லும் 'செவன் ஸ்டார்ஸ் இன் கியூஷு' (Seven Stars in Kyushu) ரயில், பல வெளிநாட்டுப் பயணிகள் காணாத ஜப்பானின் மற்றொரு பரிமாணத்தை வெளிப்படுத்துகிறது.

இந்த ரயில் 2013-ல் அறிமுகப்படுத்தப்பட்டதிலிருந்து, படுக்கை வசதி கொண்ட இந்த ரயில் உலகின் மிகச்சிறந்த ஆடம்பர ரயில் பயண அனுபவங்களில் ஒன்றாகப் புகழ்பெற்றுள்ளது. ஆனால் இந்த ரயிலில் கற்பனைக்கு எட்டாத பல சிறப்புகள் உள்ளது அவை என்னென்ன என்று இந்த பதிவில் தெரிந்து கொள்ளலாம்.

செவன் ஸ்டார் கியூஷி ரயில்

சுமார் 3 பில்லியன் யென் (இந்திய மதிப்பில் ஏறக்குறைய ரூ. 165 கோடி) செலவில் உருவாக்கப்பட்ட 'செவன் ஸ்டார்ஸ்' என்ற பெயர், அது வழங்கும் ஆடம்பர வசதிக்காக வழங்கப்பட்டதல்ல. மாறாக, இப்பயணத்தின்போது ரயில் கடந்து செல்லும் கியூஷு பகுதியின் ஏழு மாகாணங்களான ஃபுகுவோகா, சாகா, நாகசாகி, குமாமோட்டோ, ஓயிட்டா, மியாசாகி மற்றும் ககோஷிமா ஆகியவற்றையே இது குறிக்கிறது.

அற்புதமான நிலப்பரப்புகள் வழியாகப் பயணம்

இந்த ஆடம்பர ரயில் மாறுபட்ட நிலப்பரப்புகள், வரலாற்றுச் சிறப்புமிக்க நகரங்கள், கடற்கரைப் பகுதிகள், செயல்படும் எரிமலைகள் மற்றும் வெந்நீர் ஊற்றுகள் நிறைந்த பகுதிகள் வழியாகச் செல்கிறது. 'செவன் ஸ்டார்ஸ் இன் கியூஷு' உலகின் மிகச் சிறந்த ரயில் பயண அனுபவங்களில் ஒன்றை வழங்குகிறது. இந்த ரயிலின் ஏழு பெட்டிகளை, அதாவது ஒரு உணவருந்தும் பெட்டி, ஒரு ஓய்வறைப் பெட்டி மற்றும் ஐந்து படுக்கை வசதி கொண்ட பெட்டிகள், குறிக்கும் வகையிலேயே இப்பெயர் அமைந்துள்ளது.

செவன் ஸ்டார் ரயிலை தனித்துவமாக்குவது எது?

JR கியூஷுவால் இயக்கப்படும் 'செவன் ஸ்டார்ஸ் இன் கியூஷு', பிரபல தொழில்துறை வடிவமைப்பாளரான ஈஜி மிட்டூக்காவால் வடிவமைக்கப்பட்டது. இந்த ஆடம்பர ரயிலின் வடிவமைப்பு, பாரம்பரிய ஜப்பானிய கைவினைத்திறனை நவீன வசதியுடன் இணைக்கின்றன. ஒவ்வொரு பெட்டியும் கையால் செய்யப்பட்ட மரச்சாமான்களைக் கொண்டுள்ளதுடன், கியூஷுவின் தன்மையைப் பிரதிபலிக்கும் விரிவான மரவேலைப்பாடுகளையும் கொண்டுள்ளது. இதில் 14 கையால் செய்யப்பட்ட மர அறைகள், தனிப்பட்ட மற்றும் உயர்தர உணவு உண்ணும் பகுதிகள் உள்ளன.

வழித்தடங்கள்

'செவன் ஸ்டார்ஸ்' ரயில், ஜப்பானில் உள்ள ஃபுகுவோகாவின் ஹகாட்டா நிலையத்திலிருந்து தொடங்கி அங்கேயே நிறைவடையும் ரவுண்ட் ட்ரிப் பயணங்களை மேற்கொள்கிறது. பருவநிலையைப் பொறுத்து, பயணிகள் 2 நாட்கள் மற்றும் 1 இரவு கொண்ட பயணம் அல்லது 4 நாட்கள் மற்றும் 3 இரவுகள் கொண்ட பயணம் ஆகியவற்றைத் தேர்ந்தெடுக்கலாம்.

இந்த ஆடம்பர ரயிலின் டிக்கெட் விலை என்ன?

தற்போதைய கட்டணங்கள் பயணத் திட்டம் மற்றும் சூட் (suite) வகையைப் பொறுத்து மாறுபடுகின்றன. 2 பகல், 1 இரவு கொண்ட பயணத்திற்கு, இருவர் தங்கும் வசதி கொண்ட 'சூட் கேபின்' கட்டணம் ஒரு நபருக்கு ¥700,000-லிருந்து தொடங்குகிறது; அதே சமயம் ஒருவர் மட்டும் தங்கும் 'DX சூட் A' வகைக்கு இது ¥1.6 மில்லியன் வரை (தோராயமாக ₹4 லட்சம் முதல் ₹9.5 லட்சம் வரை) கட்டணம் வசூலிக்கப்படுகிறது. 4 பகல், 3 இரவு கொண்ட பயணத்தைப் பொறுத்தவரை, இருவர் தங்கும் 'சூட் கேபின்' கட்டணம் ஒரு நபருக்கு ¥1.35 மில்லியனிலிருந்து தொடங்குகிறது. ஒருவர் மட்டும் தங்கும் 'DX சூட் A' வகைக்கு இது ¥2.85 மில்லியன் வரை (தோராயமாக ₹8 லட்சம் முதல் ₹17 லட்சம் வரை) வசூலிக்கப்படுகிறது.