நோபல் பரிசு ஏன் கணிதத்திற்கு வழங்கப்படுவதில்லை? கணிதத்திற்கு கொடுக்கப்படும் உயரிய விருதுகள் என்னென்ன தெரியுமா

நோபல் பரிசு என்பது உலகின் மிக உயரிய கௌரவங்களில் ஒன்றாகக் கருதப்படுகிறது. உலகை மாற்றும் கண்டுபிடிப்பு, அமைதியை பரப்புதல், இலக்கியம், சமூக மாற்றம் என பல்வேறு விஷயங்களுக்காக அந்ததந்த துறையில் சாதித்தவர்களுக்கு நோபல் பரிசு வழங்கப்படுகிறது. ஒவ்வொரு ஆண்டும், மக்கள் உலகத்தைப் புரிந்துகொள்ளும் விதத்தை மாற்றும் சாதனைகளை நோபல் பரிசுகள் அங்கீகரிக்கின்றன.

நோபல் பரிசுகள் வழங்கப்படும் துறைகளில் இயற்பியல், வேதியியல், மருத்துவம், இலக்கியம் மற்றும் அமைதி ஆகியவற்றுக்குத் தனித்தனிப் பிரிவுகள் உள்ளன. பல பத்தாண்டுகளுக்குப் பிறகு பொருளாதாரத்துக்குத் தனி விருது வழங்கப்பட்டது. ஆனால், நவீன அறிவியலின் ஏறக்குறைய ஒவ்வொரு துறைக்கும் ஆதாரமாக விளங்கும் கணிதப் பாடத்திற்கு, இதுவரை நோபல் பரிசு வழங்கப்பட்டதே இல்லை. இது கேட்பதற்கு நம்ப முடியாததாக இருக்கலாம், ஆனால் இதுவரை கணிதத்திற்கு நோபல் பரிசு வழங்கப்படவில்லை. இதற்குப் பின்னால் பல்வேறு காரணங்கள் உள்ளது. அவை என்னென்ன என்று இந்த பதிவில் தெரிந்து கொள்ளலாம்.

ஆல்ஃபிரட் நோபல் தனது உயிலில் கணிதத்தை சேர்க்கவில்லை

டைனமைட்டை கண்டுபிடித்த ஸ்வீடன் நாட்டு வேதியியலாளரும் கண்டுபிடிப்பாளருமான ஆல்ஃபிரட் நோபல், 1895-ல் தனது உயிலின் மூலம் நோபல் பரிசுகளை உருவாக்கினார். இயற்பியல், வேதியியல், உடலியல் அல்லது மருத்துவம், இலக்கியம் மற்றும் அமைதி ஆகிய துறைகளில் சாதனைகளுக்கான விருதுகளுக்குத் தனது செல்வம் பயன்பட வேண்டும் என்று அவர் அறிவுறுத்தினார். ஆனால் அவரது உயிலில் கணிதம் இடம்பெறவில்லை. ஆல்ஃபிரட் நோபல் கணிதத்தை தவிர்த்ததற்கு தெளிவான, ஆவணப்படுத்தப்பட்ட விளக்கம் எதுவும் கூறப்படவில்லை. அவரது மரணமடைந்த ஐந்து ஆண்டுகளுக்குப் பிறகு, 1901-ல் முதல் நோபல் பரிசுகள் வழங்கப்பட்டன. பரிசுகள் வழங்கப்பட்ட பிரிவுகள் அவரது விருப்பங்களைப் பிரதிபலித்ததால், கணிதம் பாரம்பரிய நோபல் அமைப்பின் ஒரு பகுதியாக மாறவில்லை.

காதல் போட்டி காரணமாக ஆல்ஃபிரட் நோபல் கணிதத்தை வெறுத்தாரா?

ஒரு கணிதவியலாளர், ஆல்ஃபிரட் நோபல் நேசித்த ஒரு பெண்ணுடன் காதல் உறவில் ஈடுபட்டதால், அவர் கணிதத்தை ஒதுக்கிவிட்டார் என்று ஒரு பரவலான கோட்பாடு கூறுகிறது. மீண்டும் மீண்டும் இந்த கோட்பாட்டில் அப்பெண் அவரது மனைவி என்று சொல்லப்படுகிறது. ஆனால் இதில் மிகப்பெரிய முரண் என்னவென்றால், ஆல்ஃபிரட் நோபல் திருமணம் செய்துகொள்ளவே இல்லை. ஆஸ்திரிய அமைதி ஆர்வலர் பெர்த்தா வான் சுட்னருடனான அவரது தொடர்பு உட்பட, அவரது காதல் உறவுகளை வரலாற்றுப் பதிவுகள் ஆவணப்படுத்துகின்றன, ஆனால் ஒரு கணிதவியலாளருடனான காதல் போட்டியே அவர் கணிதத்தை ஒதுக்குவதற்குக் காரணம் என்பதற்கு நம்பகமான ஆதாரம் எதுவும் இல்லை.

நோபல் கணிதத்திற்கு முன்னுரிமை கொடுக்கவில்லையா?

இதற்கான விளக்கம் நோபல் உண்மையில் என்ன எழுதினார் என்பதிலிருந்து தொடங்குகிறது. அவரது உயில், குறிப்பிடப்பட்ட துறைகளுக்குள், மனிதகுலத்திற்கு மிகப்பெரிய நன்மையை அளித்த சாதனைகளில் கவனம் செலுத்தியது. விருதுகள் குறித்த அவரது தனிப்பட்ட விருப்பத்திற்குள் கணிதம் பொருந்தாமல் இருந்திருக்கலாம், ஆனால் அவர் ஏன் அதைத் தவிர்த்தார் என்பதற்கு எந்த விளக்கமும் தற்போது வரை கிடைக்கவில்லை. இயற்பியல், பொறியியல் மற்றும் மருத்துவம் ஆகிய துறைகளிலும் கணிதம் கண்டுபிடிப்புகளுக்கு மறைமுக காரணமாக உள்ளது, இதனால் கணித முன்னேற்றங்களை, அவை உருவாக்க உதவும் அறிவியல் கண்டுபிடிப்புகளிலிருந்து பிரிப்பது கடினமாகிறது. இது நோபலின் முடிவிற்கான ஒரு விளக்கமாகவே உள்ளதே தவிர, நிரூபிக்கப்பட்ட காரணம் அல்ல.

கணிதத்திற்கு என வேறுசில உயரிய விருதுகள் உள்ளது

நோபல் பரிசு வழங்கப்படாதது கணிதவியலாளர்களை சர்வதேச அங்கீகாரம் பெறாமல் தடுக்கவில்லை. 1936-ல் உருவாக்கப்பட்ட ஃபீல்ட்ஸ் பதக்கம், கணிதவியலில் மிகவும் மதிப்புமிக்க விருதுகளில் ஒன்றாகும். இது ஒவ்வொரு நான்கு வருடங்களுக்கும், அந்த ஆண்டின் ஜனவரி 01-ஆம் தேதியன்று 40 வயதுக்குள் இருக்கும் சிறந்த கணிதவியலாளர்களுக்கு வழங்கப்படுகிறது. கணிதத்திற்கு வழங்கப்படும் மற்றொரு முக்கிய கௌரவம் ஏபெல் பரிசு ஆகும், இது முதன்முதலில் 2003-ல் வழங்கப்பட்டது. நார்வேஜிய கணிதவியலாளர் நீல்ஸ் ஹென்ரிக் ஏபெல் என்பவரின் பெயரால் அழைக்கப்படும் இது, கணிதவியலில் சிறந்த பணிகளை அங்கீகரிக்கிறது. இந்த விருதுகளுக்கு அவற்றின் சொந்த வரலாறுகளும் தேர்வு செயல்முறைகளும் உள்ளன. இவை இரண்டும் கணிதத்திற்கான நோபல் பரிசு அல்ல, இருப்பினும் ஏபெல் பரிசு பெரும்பாலும் அதுபோன்ற ஒரு பங்கை வகிப்பதாக விவரிக்கப்படுகிறது.