விஜய்க்கு எதிராக போட்டியிடப்போகும் 252 தேர்தல்களில் தோற்ற ' தேர்தல் மன்னன்' யார் தெரியுமா?

Tamil Nadu Election 2026: தமிழ்நாடு சட்டமன்ற தேர்தலுக்கான தேதி அறிவிக்கப்பட்டுவிட்டது. அனைத்து கட்சிகளும் தீவிரமாக தங்களின் பிரச்சாரத்தைத் தொடங்கியுள்ளன. இந்த முறை நான்கு முனைபோட்டியாக நடைபெற உள்ள தமிழ்நாடு சட்டமன்ற தேர்தலில் அனைத்து கட்சிகளும் தங்களின் வேட்பாளர்களை அறிவித்து விட்டன. ஏப்ரல் 23 ஆம் தேதி நடைபெற தேர்தலுக்கு மே 04 ஆம் தேதி முடிவுகள் அறிவிக்கப்பட உள்ளது.

தமிழ்நாட்டின் ஒவ்வொரு தேர்தலிலும் "தேர்தல் மன்னன்" என்றே பரவலாக அறியப்படும் கே. பத்மராஜன், நடிகர் மற்றும் தமிழக வெற்றிக் கழகத்தின் தலைவர் விஜயை எதிர்த்து போட்டியிடுவதாக அறிவித்துள்ளார். விஜயின் தொகுதி அறிவிக்கப்பட்டதும், அதே தொகுதியில் தானும் போட்டியிடப்போவதாக அவர் அறிவித்துள்ளார்.

தேர்தல் மன்னன்

தேர்தல்களில் தொடர்ந்து போட்டியிட்டுத் தோல்வியடைவதன் மூலமே தமிழ்நாட்டில் தனக்கென ஒரு தனி அடையாளத்தை உருவாக்கிக்கொண்ட 67 வயதான பத்மராஜன், 'தமிழக வெற்றிக் கழகம்' (TVK) கட்சியின் தலைவரான விஜய், 2026 சட்டமன்றத் தேர்தலில் எந்தத் தொகுதியில் போட்டியிட்டுத் தனது அரசியல் பயணத்தைத் தொடங்குகிறாரோ, அதே தொகுதியில் தானும் ஒரு சுயேச்சை வேட்பாளராகப் போட்டியிட வேட்புமனு தாக்கல் செய்யப்போவதாகத் தெரிவித்துள்ளார்.

தேர்தல் தோல்விகளின் நாயகன்

1988-ஆம் ஆண்டு முதல் இதுவரை 252 தேர்தல்களில் போட்டியிட்டு, ஒன்றில்கூட வெற்றிபெறாத பத்மராஜன், வெற்றி என்பது ஒருபோதும் தனது இலக்காக இருந்ததில்லை என்று எப்போதும் தெரிவிப்பார். தேர்தலில் 'பங்கேற்பதே' தனது வெற்றியின் அளவுகோல் என்று அவர் கூறினார்; இந்த அணுகுமுறையே, அதிக முறை தோல்விகளை சந்தித்த வேட்பாளர் என்ற வகையில், 'லிம்கா சாதனைப் புத்தகத்தில்' அவருக்கு இடத்தைப் பெற்றுத் தந்துள்ளது. கிட்டதட்ட நாற்பது ஆண்டுகளுக்கும் மேலாக, உள்ளாட்சித் தேர்தல்கள், கூட்டுறவுச் சங்கத் தேர்தல்கள், சட்டமன்ற மற்றும் மக்களவைத் தேர்தல்கள் என அனைத்து தேர்தல்களிலும் அவர் போட்டியிட்டுள்ளார். அனைத்திற்கும் மேலாக குடியரசுத் தலைவர் மற்றும் துணைக் குடியரசுத் தலைவர் பதவிகளுக்காகக்கூட அவர் வேட்புமனு தாக்கல் செய்துள்ளார்.

2026 தேர்தலில் போட்டி

2026 சட்டமன்ற தேர்தலில் அவர் நடிகர் விஜயை எதிர்த்து போட்டியிடப்போவதாக அறிவித்துள்ளார். மேலும் மேட்டூரிலிருந்தும் போட்டியிடத் திட்டமிட்டுள்ளதாக அவர் தெரிவித்துள்ளார். அவரது நீண்ட தேர்தல் பயணத்தால் அவர் பொருளாதாரரீதியாக பெரும் நஷ்டத்தை ஏற்படுத்தியுள்ளது. அவரது கூற்றுப்படி, இதுவரை தேர்தல் வைப்புத்தொகையாகவே அவர் ஒரு கோடி ரூபாய்க்கும் அதிகமாக இழந்துள்ளார். 2011-ஆம் ஆண்டு நடைபெற்ற தமிழகச் சட்டமன்றத் தேர்தலில்தான் அவரே எதிர்பார்க்காத ஆச்சரியம் நடந்தது. அப்போது மேட்டூர் தொகுதியில் அவர் 6,273 வாக்குகளைப் பெற்றார். இந்த முடிவை அவருக்கே ஆச்சரியமாக இருந்ததாக அவர் கூறினார்.

பத்மராஜனின் தேர்தல் வரலாறு

பத்மராஜனின் தேர்தல் வரலாறு மிகவும் சுவாரஸ்யமானது. ஏனெனில், அவர் இந்தியாவின் முக்கிய அரசியல் தலைவர்களான மு. கருணாநிதி, ஜெ. ஜெயலலிதா, அடல் பிஹாரி வாஜ்பாய் மற்றும் பி.வி. நரசிம்ம ராவ் போன்ற அரசியல் ஜாம்பவான்களுக்கு எதிராக அவர் போட்டியிட்டுள்ளார், மேலும், 2014-ஆம் ஆண்டு நடைபெற்ற மக்களவைத் தேர்தலின்போது நரேந்திர மோடிக்கு எதிராகவும் அவர் களத்தில் நின்றார். மேலும் குடியரசுத் தலைவர் பதவிக்கு ஆறு முறையும், துணைக் குடியரசுத் தலைவர் பதவிக்கு ஏழு முறையும் அவர் போட்டியிட்டுள்ளார். அதனால்தான் அவர் 'தேர்தல் மன்னன்' என்று அழைக்கப்படுகிறார்.