தலைசுற்ற வைக்கும் இந்தியாவிலுள்ள வினோதமான திருமண சடங்குகள் - இப்படிலாம் கல்யாணம் பண்ணுனா அவ்வளவுதான்

இந்தியாவில் திருமணங்கள் என்பது பெரும்பாலும் பிரமாண்டமாகவும், ஆடம்பரமாகவும் நடத்தப்படுகிறது. அலங்காரம் முதல் உணவுகள் வரை திருமணங்களில் அவரவர் பொருளாதார வசதிக்கு ஏற்ப ஆடம்பரம் நிறைந்திருக்கிறது. அதேபோல, ஒவ்வொரு சடங்கும் சம்பிரதாயமும் தனக்கே உரித்தான தனித்துவத்தைக் கொண்டுள்ளன.

பன்முகத்தன்மை கொண்ட நாடான இந்தியாவில், நாடு முழுவதும் பலவிதமான விசித்திரமான சடங்குகளும் சம்பிரதாயங்களும் பின்பற்றப்படுகின்றன.இந்தச் சடங்குகளுக்குப் பிணைந்துள்ள உணர்வுகள் இந்தியத் திருமணங்களை மிகவும் சிறப்பானதாகவும் தனித்துவமானதாகவும் ஆக்குகின்றன. உணர்வுப்பூர்வமான மற்றும் ஆன்மீக ரீதியிலான பிணைப்பே இந்து திருமணச் சடங்குகளின் சிறப்பான அம்சமாகும். ஆனால் இந்தியாவில் நாம் நினைத்துக்கூட பார்க்க முடியாத சில தனித்துவமான திருமண சடங்குகள் உள்ளன. அவற்றில் சிலவற்றை இந்த பதிவில் தெரிந்து கொள்ளலாம்.

மணமகன் மற்றும் மணமகளின் அம்மாக்கள் திருமணத்திற்கு வராமல் இருப்பது

பெங்காலித் திருமண மரபுகளின்படி, மணமகன் மற்றும் மணமகளின் அம்மாக்கள் திருமணத்தில் கலந்துகொள்ள அனுமதி இல்லை. இதற்குக் காரணம், அவர்களுக்கிடையேயான உணர்வுபூர்வமான பிணைப்பு அசுபமாகக் கருதப்படுகிறது. அதாவது, தாயின் இருப்பு தங்கள் குழந்தையின் திருமண வாழ்க்கையில் ஏதேனும் தீய விளைவை ஏற்படுத்தக்கூடும் என்று நம்பப்படுகிறது.

மீன் சடங்கு

மணிப்பூர் திருமணங்களில் கடைபிடிக்கப்படும் மிகவும் விசித்திரமான மற்றும் இறுதியான சடங்கு இதுதான். மணமகன் மற்றும் மணமகளைக் குறிக்கும் வகையில், இரு வீட்டுப் பெண்களும் 'தாகி' வகை மீன்கள் கொண்ட ஒரு ஜோடியை நீரில் விடுவார்கள். அந்த மீன்கள் ஒன்றாக நீந்திச் சென்றால், புதுமணத் தம்பதியினர் மகிழ்ச்சியான வாழ்க்கையை வாழ்வார்கள் என்பது அவர்களின் நம்பிக்கையாகும்.

குடங்களை பேலன்ஸ் செய்யும் சடங்கு

பீகார் திருமணங்களின் தனித்துவமான மரபுகளில், குடங்களை பேலன்ஸ் செய்யும் சடங்கு மிகவும் விசித்திரமானதாகக் கருதப்படுகிறது. இதில், மணமகள் தன் தலையில் சில மண் குடங்களைச் சுமந்து சமநிலைப்படுத்தியவாறு புகுந்த வீட்டிற்குள் வரவேற்கப்படுகிறார். மணமகள் குடங்களை பேலன்ஸ் செய்தபடியே பெரியவர்களின் பாதங்களைத் தொட்டு வணங்க வேண்டும் என்பது வழக்கம். அவர் சுமக்கும் குடங்களின் எண்ணிக்கை, குடும்பத்தின் எதிர்காலத்தை வழிநடத்திச் செல்வதில் அவருக்குள்ள திறன்களின் அளவாகக் கருதப்படுகிறது.

மணமகனின் ஆடையைக் கிழிக்கும் சடங்கு

திருமணத்தன்று ஆடைகள் கிழிவது அபசகுணமாகக் கருதப்படுகிறது. ஆனால் அதுவே ஒரு சடங்காக இருந்தால் எப்படி இருக்கும்? சிந்தி சமூகத்தின் திருமண மரபில் இது 'சாந்த்' (Saanth) எனப்படும் ஒரு சடங்காகக் கருதப்படுகிறது. இதில் மணமகனின் வலது காலில் ஒரு காலணி அணிவிக்கப்பட்டு, அவரது தலையில் எண்ணெய் பூசப்படுகிறது. பின்னர் அவர் தனது வலது காலால் ஒரு மண்பானையை உடைக்கிறார். அதைத் தொடர்ந்து மணமகனின் ஆடைகள் கிழிக்கப்படுகின்றன. இந்த சடங்கு அவருக்கு நல்வாய்ப்பைக் கொண்டுவரும் என்று நம்பப்படுகிறது.

பால் மற்றும் தேனைக் குடித்தல்

திருமணத்தின் போது பால் மற்றும் தேன் குடிப்பது மிகவும் சாதாரணமானதாகத்தான் தெரியும். ஆனால் குஜராத்தி திருமணச் சடங்குகளில் இது ஒரு தனித்துவமான வழக்கமாகக் கடைப்பிடிக்கப்படுகிறது. 'மதுபர்கா' என்று அழைக்கப்படும் இந்தச் சடங்கில், மணமகனின் பாதங்களை மணப்பெண்ணின் பெற்றோர் பால் மற்றும் தேன் கொண்டு கழுவி அவரை வரவேற்கிறார்கள். பின்னர், அதே பாத்திரத்தில் உள்ள அந்தக்கலவையை மணமகன் எடுத்து அருந்த வேண்டும். இது கேட்பதற்குச் சற்று அருவருப்பாகத் தோன்றலாம்; இருப்பினும், இது அவர்களின் ஆழமாக வேரூன்றிய பாரம்பரியமாகத் தொடர்ந்து வருகிறது.

தக்காளி வீசும் சடங்கு

உத்தரப் பிரதேசத்தில் உள்ள ஒரு சிறிய நகரத்தில் வினோதமான திருமண வழக்கம் ஒன்று பின்பற்றப்படுகிறது. அங்கு மணமகன் வீட்டார் ரோஜா இதழ்களைத் தூவி வரவேற்கப்படுவதற்குப் பதிலாக, அவர்கள் மீது தக்காளிகள் வீசப்படுகின்றன. ஒரு திருமண உறவு சலசலப்புடன் அல்லது களேபரத்துடன் தொடங்கினால், அது இறுதியில் அன்பில் முடியும் என்பது மக்களின் நம்பிக்கையாக உள்ளது.

மூக்கை இழுக்கும் சடங்கு

மூக்கை இழுப்பது வேடிக்கையான செயலாகத் தோன்றலாம், ஆனால் குஜராத்தி திருமண மரபில் இதற்கு ஒரு சிறப்பான அர்த்தம் உண்டு. 'போன்கானா' என்று அழைக்கப்படும் இந்த வேடிக்கையான சடங்கில், மணமகன் மணப்பெண்ணை ஏற்றுக்கொள்ளும்போது பணிவுடனும் நன்றியுணர்வுடனும் இருக்க வேண்டும் என்பதை நினைவூட்டும் வகையில், மாமியார் அவருக்கு ஆரத்தி எடுத்து அவரது மூக்கை இழுப்பார்.

மணமகனை கிணற்றில் வீசும் சடங்கு

வடக்கு கோவாவில் உள்ள மக்களால் பின்பற்றப்படும் ஒரு விசித்திரமான திருமண வழக்கம் இது. இதில், புதிதாகத் திருமணம் ஆன மணமகன் ஒரு கிணறு அல்லது ஏரிக்கு அழைத்துச் செல்லப்பட்டு, அதில் வீசப்படுகிறார். 'சாவ் ஜோவா' என்று அழைக்கப்படும் இந்த நிகழ்வு, மணமகனுக்குக் குழந்தை பாக்கியம் மற்றும் நற்பலன்களைத் தருவதாகக் கருதப்படுகிறது. மணமகனைப் பற்றி மணப்பெண்ணின் குடும்பத்தினர் நன்றாகத் தெரிந்துகொள்வதற்கான ஒரு வாய்ப்பாகவும் இந்த சடங்கு கருதப்படுகிறது.