5 லட்ச ரூபாய்க்கு விற்கப்படும் உலகின் காஸ்ட்லியான ஐஸ்கிரீம் - அப்படி இதுல என்னதான் ஸ்பெஷல் தெரியுமா?

ஐஸ்க்ரீம் என்றால் யாருக்குத்தான் பிடிக்காது. வெண்ணிலா, சாக்லேட், ஸ்ட்ராபெர்ரி என நம் ஒவ்வொருவருக்கும் ஒரு ஐஸ்க்ரீம் பிடிக்கும். பொதுவாக ஐஸ்க்ரீமுக்காக குறிப்பிட்ட தொகையை செலவிடுவோம். அதிகபட்சமாக சில ஆயிரங்களை செலவிடுவோம். ஆனால் ஒரு கார் வாங்கக்கூடிய விலைக்கு ஒரு ஐஸ்க்ரீம் வாங்க சொன்னால் நாம் வாங்குவோமா? ஆனால் அந்த மாபெரும் விலைக்கு ஐஸ்க்ரீம் வாங்கி சாப்பிடுபவர்களும் இருக்கிறார்கள்.

இந்தியாவில் மலிவான விலையிலேயே சுவையான ஐஸ்க்ரீம் கிடைக்கும் போது ஒரு ஐஸ்க்ரீம் 5 லட்சத்திற்கு விற்கப்படுகிறது என்றால் உங்கள் நம்ப முடியுமா? இது கற்பனை செய்து கூட பார்க்க முடியாததாக இருக்கலாம். ஆனால் 'பியாகுயா' என்று பெயரிடப்பட்ட இந்த ஐஸ்கிரீமை ஜப்பானிய நிறுவனமான 'செல்லாட்டோ' உருவாக்கியுள்ளது. இது உலகின் மிகவும் விலையுயர்ந்த ஐஸ்கிரீம் என்று பெயர் பெற்றுள்ளது. இந்த ஐஸ்கிரீமை உருவாக்கியவர் யார் மற்றும் இது ஏன் இவ்வளவு விலையுயர்ந்ததாக உள்ளது என்று இந்த பதிவில் தெரிந்து கொள்ளலாம்.

இந்த ஐஸ்கிரீமை உருவாக்கியவர் யார்?

புதுமையான கலவை சமையல் பாணிக்கு (fusion cuisine) பெயர் பெற்றவரான 'ரிவி' (Rivi) உணவகத்தின் தலைமைச் சமையல்கலைஞர் தடாயோஷி யமடா (Tadayoshi Yamada) என்பவரால் இந்த ஐஸ்கிரீம் உருவாக்கப்பட்டுள்ளது. இதற்காக அவர் சிறப்பாக அழைக்கப்பட்டிருந்தார்.

இந்த ஐஸ்கிரீம் ஏன் இவ்வளவு அதிக விலை கொண்டதாக இருக்கிறது?

இந்த நிறுவனத்தின் தகவலின்படி, இந்த ஐஸ்கிரீம் உண்ணக்கூடிய தங்கத் தகடு, வெள்ளை ட்ரஃபிள் (white truffle) மற்றும் இயற்கையான சீஸ் ஆகியவற்றைக் கொண்டு தயாரிக்கப்படுகிறது. இதில் பயன்படுத்தப்படும் வெள்ளை ட்ரஃபிள் இத்தாலியின் ஆல்பா பகுதியில் விளைவிக்கப்படுகிறது. இதன் விலை கிட்டத்தட்ட 2 மில்லியன் யென் அல்லது 14,505 டாலர்கள் (ஒரு கிலோ 1.2 மில்லியன் ரூபாய்) ஆகும். பார்மிஜியானோ ரெஜியானோ (Parmigiano Reggiano) சீஸ் மற்றும் 'சகே' (sake) மதுபானம் தயாரிப்பின்போது மீதமாகும் 'சகே லீஸ்' ஆகியவை இதில் பயன்படுத்தப்படும் மற்ற விலையுயர்ந்த பொருட்களாகும். இதனால்தான், இந்த மிக விலையுயர்ந்த ஐஸ்கிரீமின் விலை 873,400 யென் அல்லது 6,696 டாலர்கள் அல்லது 553,772 ரூபாயாக உள்ளது.

இதன் சுவை எப்படி இருக்கும்?

ஜப்பானிய மற்றும் ஐரோப்பிய மூலப்பொருட்களை ஒன்றாக இணைத்து ஐஸ்கிரீமை உருவாக்குவதே இந்த மிகவும் விலையுயர்ந்த ஐஸ்கிரீமின் பின்னணியில் உள்ள யோசனை என்று கின்னஸ் நிறுவனம் கூறியது. இந்த அதிசயத்தைத் தயாரித்த செல்லாட்டோ நிறுவனம், வெள்ளை ட்ரஃபிளின் வலுவான நறுமணம், பார்மிஜியானோ ரெஜியானோ சீஸின் தனித்துவமான சுவையை வழங்கும் என்று கூறியுள்ளது. "சரியான சுவையைப் பெறுவதற்காக, பல சோதனைகள் மற்றும் தவறுகளுடன் இதை உருவாக்க எங்களுக்கு ஒன்றரை ஆண்டுகளுக்கும் மேலாக ஆனது. கின்னஸ் உலக சாதனைப் பட்டத்தைப் பெற்றது, எங்கள் முயற்சிகள் அனைத்திற்கும் தகுதியானதாக மாற்றியது" இந்நிறுவனத்தின் அலுவலர் கூறினார்.