25 லட்ச ரூபாய்க்கு விற்கப்படும் உலகின் காஸ்ட்லியான காபி - இதன் சுவை எப்படி இருக்கும் தெரியுமா? ஷாக் ஆகாதீங்க

உலகில் தண்ணீர், தேநீருக்கு அடுத்தபடியாக மக்களால் அதிகளவு விரும்பி குடிக்கப்படும் பானமென்றால் அது காபிதான். நாம் அதிகபட்சமாக ஒரு காபிக்கு 20 ரூபாய் முதல் 200 ரூபாய் வரை செலவிடுவோம். ஆனால் உலகின் சில காபி பிரியர்கள் வித்தியாமான காபிகளுக்காக தாராளமாக செலவு செய்கிறார்கள். ஆனால் ஒரு காபி ஆடம்பரத்தின் எல்லையை உச்சத்துக்கு கொண்டு சென்றுள்ளது.

பனாமாவின் ஹசியெண்டா லா எஸ்மெரால்டா பண்ணையில் இருந்து வரும் ஒரு கப் கெய்ஷா காபியின் விலை ரூ. 57,000 ஆகும். இது உலகின் மிகவும் விலையுயர்ந்த காபிகளில் ஒன்றாக விளங்குகிறது. 2025-ஆம் ஆண்டு நடைபெற்ற 'பெஸ்ட் ஆஃப் பனாமா' ஏலத்தில், இந்த காபி வகை உலகையே ஆச்சரியப்படுத்தும் சாதனையை செய்தது. இந்த அரிய வகை காபி கொட்டைகளின் ஒரு கிலோகிராமிற்கு அதை வாங்கியவர்கள் 30,204 அமெரிக்க டாலருக்கு (இந்திய மதிப்பில் 25 லட்சம் ரூபாய்) ஏலத்தொகையாக வழங்கினர். இந்தச் சாதனையின் மூலம், 'கெய்ஷா' (Geisha) காபி, உலகின் மிகவும் மதிப்புமிக்க காபி வகைகளில் ஒன்றாக அங்கீகாரம் பெற்றது.

இது ஏன் இவ்வளவு விலையுயர்ந்தாக உள்ளது?

இதன் அசாதாரணமான விலைக்குக் காரணம், அதன் அரியத்தன்மை, தரம் மற்றும் பல ஆண்டுகால ஆராய்ச்சி ஆகியவற்றால் உருவானது. உலகின் மிகவும் காஸ்ட்லியான காபி, 13 ஆண்டுகால கடின உழைப்பிற்குப் பிறகு உருவாக்கப்பட்டது. இது பனாமாவின் ஒரு குறிப்பிட்ட பகுதியில் மிகக் குறைந்த அளவிலேயே பயிரிடப்படுகிறது. காபி ஆர்வலர்கள் மற்றும் ஆடம்பரப் பொருட்களை விரும்புவோரைப் பொறுத்தவரை, இந்த காபியைக் கொண்டிருப்பது ஒரு கௌரவத்தின் அடையாளமாகக் கருதப்படுகிறது.

இந்த காபியை சிறப்பாக்குவது எது?

சிரிகுய் மாகாணத்தின் போக்வெட் நகரில் உள்ள ஹசியெண்டா லா எஸ்மெரால்டாவில் விளைந்த, சுத்தம் செய்யப்பட்ட கெய்ஷா காபி, சர்வதேச நடுவர் குழுவில் 98 புள்ளிகள் என்ற சிறப்பான மதிப்பெண்ணைப் பெற்றது. இது காபி உலகில் வழங்கப்படும் மிக உயர்ந்த மதிப்பெண்ணாகும். 20 கிலோகிராம் கொண்ட ஒரு தொகுதி, துபாயைத் தளமாகக் கொண்ட ஒரு காபி நிறுவனத்திற்கு பல மில்லியன் ரூபாய்க்கு விற்கப்படுவதற்கு முன்பு, 549 ஏலங்களைப் பெற்றது.

செல்வந்தர்களுக்கான ஆடம்பர அனுபவம்

துபாயில், ரோஸ்டர்ஸ் ஸ்பெஷாலிட்டி காபி ஹவுஸ், ஹாரியோ V60 தயாரிப்பு முறையைப் பயன்படுத்தி, பிரத்யேகமாக வடிவமைக்கப்பட்ட கிரிஸ்டல் கண்ணாடிக் குவளைகளில் இந்தக் காபியைப் பரிமாறுகிறது. உலகின் மிகவும் காஸ்ட்லியான மற்றும் ஸ்பெஷலான காபிகளில் ஒன்றைச் சுவைத்ததாகக் கூறிக்கொள்வதற்காகவும், அதை அனுபவிப்பதற்காகவுமே பல பணக்கார வாடிக்கையாளர்கள் இதை வாங்குகிறார்கள் என்று தொழில் வல்லுநர்கள் கூறுகின்றனர்.

இதன் சுவை எப்படி இருக்கும்?

காபிக்கான பிரத்யேக விமர்சகர்களின் கூற்றுப்படி, கெய்ஷா காபியானது லிலாக், கோகோ, டேன்ஜரின், ஆப்ரிகாட் மற்றும் சந்தனத்தின் மென்மையான சுவைகளை வழங்குகிறது. சூடாக இருக்கும்போது மல்லிகை போன்ற நறுமணத்தைக் கொண்டிருக்கும் இந்த காபியானது, ஆறியவுடன் மாம்பழம் மற்றும் லிச்சி போன்ற வெப்பமண்டலப் பழங்களின் சுவைகளை அடைகிறது. இது மிகவும் கசப்பாக இருப்பதற்குப் பதிலாக, ஒரு சிறந்த ஒயினின் சுவையை வழங்குகிறது. தைவான் மற்றும் ஜப்பான் போன்ற நாடுகளிலும் இந்த அரிய வகை காபிகளின் பிரபலம் அதிகரித்து வருகிறது, அங்கு சில காபி கடைகள் தனித்தனி கோப்பைகளை இன்னும் அதிக விலைக்கு விற்பனை செய்கின்றன. இந்த காபியின் தேவை அதிகரிப்பதாலும், காலநிலை மாற்றம் அரிய வகை காபி கொட்டைகளின் விநியோகத்தைப் பாதிப்பதாலும் இதன் விலை எதிர்காலத்தை தொடர்ந்து உயரக்கூடும் என்று நிபுணர்கள் கூறுகின்றனர்.