கொரோனா மற்றும் மலேரியா அறிகுறிகளுக்கு இருக்குற வித்தியாசம் இதுதான். தெரிஞ்சுக்கோங்க...

கோவிட்-19 மற்றும் மலேரியா வேறுபாடு

மலேரியா என்பது கொசுக்களால் பரவக்கூடிய நோயாகும். பாதிக்கப்பட்ட பெண் அனோபில்ஸ் கொசு ஆரோக்கியமான நபரைக் கடித்து, அதன் உடலில் உள்ள ஒட்டுண்ணியை பகிரும்போது ஏற்படக்கூடியது. அதுவே, கோவிட்-19 என்பது ஒரு ஆட்டோ இம்யூன் தொற்று நோயாகும். இது கொரோனா என்கின்ற வைரஸானது சுவாச துளிகள் மற்றும் நேரடி உடல் தொடர்பு மூலம் பரப்புவதால் ஏற்படக்கூடியது. இதனை படிக்கும் போதே இரண்டிற்கும் துளியும் சம்பந்தம் இல்லை என்பது அனைவருக்கும் தெரிந்திருக்கும்.

நோய்க்கான காரணங்கள் மற்றும் பரவும் முறைகள் ஆகியவற்றின் அடிப்படையில் இவை இரண்டும் முற்றிலும் மாறுபட்ட நோய்கள் என்பது புரிந்திருக்கும். கொரோனா வைரஸ் என்பது ஒரு நபரிடமிருந்து இன்னொருவருக்கு பரவக்கூடிய ஒரு தொற்று நோயாகும். ஆனால், பாதிக்கப்பட்ட கொசுவால் கடிக்கும் பட்சத்தில் தான் மலேரியா ஏற்படுகிறது, மேலும், இது பிறருக்கு பரவாது.

கோவிட்-19-க்கும் மலேரியாவுக்கும் என்ன தொடர்பு?

கொரோனா வைரஸால் பாதிக்கப்பட்ட நபருக்கு ஏற்படக்கூடிய நோய் அறிகுறிகளைக் கட்டுப்படுத்துவதில் ஹைட்ராக்ஸி குளோரோகுயின் மலேரியா மருந்து ஒரு சாத்தியமான மருந்து என்று முதலில் அடையாளம் காணப்பட்டது. அதன் பிறகு, மக்கள் கொரோனா வைரஸ் மற்றும் மலேரியாவிற்கும் தொடர்பு இருப்பதாக கருதத் தொடங்கினர். திடீரென்று, இது ஒரு உயிர் காக்கும் மருந்து என்று கூறப்பட்டது. ஆனால் அதன் பயனற்ற தன்மை பின்னர் தான் நிரூபிக்கப்பட்டது. இது நோயாளிகளுக்கு மலேரியாவின் ஆரம்பக்கட்ட நோய் அறிகுறிகளைக் குறைக்க மட்டுமே உதவியது என்றும், ஆனால் கோவிட்-19ல் இருந்து மீட்கப்படுவதற்கு இதற்கு எந்தப் பங்கும் இல்லை என்பதும் பிறகு நிரூபணமானது. துரதிர்ஷ்டவசமான நிகழ்வுகளாக, இந்த மருந்தை உட்கொண்ட சிலருக்கு பாதகமான விளைவுகள் ஏற்பட்டது.

மலேரியா மற்றும் கொரோனா வைரஸின் வெவ்வேறு அறிகுறிகள்

கோவிட்-19 இன் அறிகுறிகள் ஒவ்வொரு முறையும் புதுப்பிக்கப்பட்டு வருகின்றன. கிட்டத்தட்ட ஒவ்வொரு நாளும், விஞ்ஞானிகள் இந்த வைரஸின் புதிய அறிகுறியை ஒரு விரிவான பரிசோதனைக்குப் பிறகு கண்டுபிடித்து வருகின்றனர். அதாவது, அதிகப்படியான காய்ச்சல், சளி, வறட்டு இருமல், தொண்டை புண் ஆகியவற்றை கொண்ட ஒரு ஆட்டோ இம்யூன் நோயாக இது தொடங்கியது. ஆனால், இப்போது கோவிட்-19 இன் சாத்தியமான அறிகுறிகளின் பட்டியல் நீண்டு கொண்டே செல்கிறது. இந்த வைரஸால் பாதிக்கப்பட்ட ஒரு நபருக்கு, 3 முதல் 14 நாட்களுக்குள் அறிகுறிகள் தென்படலாம் (அறிகுறிகளைக் காட்டாத, அறிகுறியற்ற நோயாளிகளைத் தவிர) பின்னர், கடுமையான அறிகுறிகள் காணப்படலாம்.

மலேரியா அறிகுறிகள்

மலேரியாவின் அறிகுறிகள் அன்றும் இன்றும், எப்போதும் அப்படியே இருக்கின்றன. காய்ச்சல், சளி, தலைவலி போன்றவை மலேரியாவின் முதல் அறிகுறிகளாகும். இது கொசு கடித்த 10-15 நாட்களுக்குப் பிறகு ஒருவருக்கு தென்படக்கூடும்.

வேறுபடுத்தும் அறிகுறிகள்

கோவிட்-19 இன் பெரும்பாலான அறிகுறிகள் மலேரியாவைப் போலவே இருந்தாலும், இந்த இரண்டு நோய்களையும் வேறுபடுத்துகின்ற பல அறிகுறிகள் உள்ளன. அவையாவன:

* சுவாச பிரச்சனைகள்

* நெஞ்சு வலி

* வயிற்றுப்போக்கு

* வறட்டு இருமல்

* மூட்டு மற்றும் தசை வலிகள்

* வாசனை மற்றும் சுவை இழப்பு

* பிங்க் நிற கண் அல்லது வெண்படல அழற்சி

* சரும தடிப்புகள்

* கால்விரல்கள் மற்றும் கை விரல்களில் நிறமாற்றம்

மலேரியா அறிகுறிகளுடன் இந்த அறிகுறிகளும் உங்களுக்கு காணப்பட்டால், உடனடியாக கோவிட்-19 பரிசோதனைக்கு உட்படுத்தப்படுத்திக் கொள்ளுங்கள். நீங்கள் வைரஸால் பாதிக்கப்பட்டுள்ளீர்களா என்பதைக் கண்டறியும் வரை, பிறருக்கு நோய் பரவுவதைத் தடுக்க மற்றவர்களிடமிருந்து உங்களைத் தனிமைப்படுத்திக் கொள்ளுங்கள்.

முடிவுரை

கொரோனா வைரஸைப் பற்றி மக்களிடையே மிகுந்த பீதி நிலவுகிறது. அவர்களுக்கு மலேரியா அல்லது வைரஸ் காய்ச்சலாக கூட இருக்கலாம். ஆனால், சாதாரண காய்ச்சல், சளி வந்தாலே அவர்களுக்கு கொரோனா வைரஸாக இருக்குமோ என்று கவலைப்படுகிறார்கள். இதனால் தான் கொரோனா வைரஸின் அறிகுறிகளைப் பற்றிய புதிய புதிய தகவல்களை அனைவரும் தெரிந்து வைத்துக் கொள்ள வேண்டியது அவசியம். இந்த வைரஸ் பாதிக்கப்பட்ட பிறகு காய்ச்சல் போன்ற அறிகுறிகள் நிச்சயம் ஏற்படும் என்பது அவசியமில்லை. எனவே, சரியான நேரத்தில் நோயறிதல் மற்றும் முறையான சிகிச்சை பெறுதல் ஆகியவை, கோவிட்-19 நோயால் ஏற்படும் அபாயகரமான விளைவுகளைத் தடுப்பதில் முக்கிய பங்கு வகிக்கிறது. எனவே, தனித்திருங்கள், விழித்திருங்கள்...