இளைஞர்களுக்கும் திடீர் கார்டியாக் அரெஸ்ட் ஏற்படுமா? அதன் எச்சரிக்கை அறிகுறிகள் என்ன? விளக்கும் டாக்டர்!

National Sudden Cardiac Arrest Awareness Month: சமீப காலமாக மாரடைப்பு, கார்டியாக் அரெஸ்ட் போன்றவற்றால் ஏராளமானோர் மரணமடைந்து வருகின்றனர். அதுவும் திடீர் இதயச் செயலிழப்பு (Sudden Cardiac Arrest) என்றால் பொதுவாக வயதானவர்களுக்குத் தான் ஏற்படும் என்று பலரும் நினைக்கிறார்கள். ஆனால், இதய நோய் இருப்பது தெரியாதவர்களுக்கும், பார்ப்பதற்கு ஆரோக்கியமாக இருக்கும் பதின்ம வயதினருக்கும் இளைஞர்களுக்கும் கூட இந்தப் பாதிப்பு ஏற்படலாம். இளம் வயதினருக்கு இது ஏற்படுவது அரிதாக இருந்தாலும், அதற்கான ஆபத்துக் காரணங்களைத் தெரிந்து கொள்வதும், பாதிப்பு ஏற்பட்டால் உடனடியாகச் செயல்படுவதும் உயிரைக் காப்பாற்ற உதவும்.

இந்த திடீர் கார்டியாக் அரெஸ்ட் குறித்த விழிப்புணர்வை மக்களிடையே ஏற்படுத்த ஒவ்வொரு ஆண்டும் அக்டோபர் மாதம் தேசிய திடீர் இதயச் செயலிழப்பு விழிப்புணர்வு மாதம் அனுசரிக்கப்படுகிறது. இந்த மாதத்தை முன்னிட்டு இளைஞர்களுக்கும் திடீர் கார்டியாக் அரெஸ்ட் ஏற்படுமா? அதன் காரணங்கள் மற்றும் எச்சரிக்கை அறிகுறிகள் குறித்து சென்னை கிளெனீகிள்ஸ் மருத்துவமனையின் மூத்த இருதயவியல் ஆலோசகரான டாக்டர். கோபு பி அவர்கள் தமிழ் போல்ட்ஸ்கையுடன் பகிர்ந்து கொண்டார்.

மாரடைப்புக்கும் கார்டியாக் அரெஸ்ட்டிற்கும் உள்ள வித்தியாசம் என்ன?

"இதயத்தின் மின் இயக்கத்தில் (Electrical Activity) ஆபத்தான மாற்றம் ஏற்படும்போது, இதயம் உடலின் பல்வேறு பகுதிகளுக்கும் தேவையான அளவு இரத்தத்தைச் செலுத்த முடியாமல் போகிறது. இதுவே திடீர் இதயச் செயலிழப்பு எனப்படுகிறது. இதனால் ஒருவர் சில நொடிகளிலேயே சுருண்டு விழுந்து சுயநினைவை இழக்கலாம்.

இது மாரடைப்பிலிருந்து (Heart Attack) வேறுபட்டது. மாரடைப்பு ஏற்படும் போது, இதயத் தசைக்குச் செல்லும் இரத்த ஓட்டம் பொதுவாகத் தடைப்படுகிறது. ஆனால், திடீர் இதயச் செயலிழப்பு ஏற்படும் போது இதயம் இரத்தத்தைச் சரியாகச் செலுத்துவதை நிறுத்திவிடுகிறது. இருப்பினும், மாரடைப்பு சில நேரங்களில் திடீர் இதயச் செயலிழப்பை ஏற்படுத்தலாம்." என்று டாக்டர் கூறினார்.

இளைஞர்களுக்கு திடீர் இதயச் செயலிழப்பு ஏற்படுவதற்கான காரணங்கள் என்ன?

"சில அடிப்படையான இதயப் பிரச்சினைகள் மற்றும் உடல்நலக் குறைபாடுகள் இளைஞர்களுக்கு திடீர் இதயச் செயலிழப்பு ஏற்படும் அபாயத்தை அதிகரிக்கலாம்.

- கண்டறியப்படாத இதய நோய்கள்: இதயத் தசை வழக்கத்தைவிடத் தடிமனாக மாறும் ஹைபர்டிராஃபிக் கார்டியோமயோபதி (Hypertrophic Cardiomyopathy) போன்ற நோய்கள், இதயத் துடிப்பில் ஆபத்தான மாற்றங்களை ஏற்படுத்தலாம்.

- பரம்பரையாக ஏற்படும் இதய மின் இயக்கக் கோளாறுகள்: லாங் க்யூ.டி. சிண்ட்ரோம் (Long QT Syndrome) போன்ற பாதிப்புகள் இதயத்தின் மின் இயக்கத்தைப் பாதிக்கின்றன. இதனால் இதயத் துடிப்பு சீரற்றதாக மாறி, சில நேரங்களில் உயிருக்கு ஆபத்தை ஏற்படுத்தலாம்.

- பிறவியிலேயே இருக்கும் இதயக் குறைபாடுகள்: பிறக்கும்போதே இதயத்தின் அமைப்பில் சில குறைபாடுகள் இருக்கலாம். இத்தகைய குறைபாடுகள் உள்ளவர்களுக்குக் குறிப்பாகக் கடுமையான உடற்பயிற்சியின் போது இதயப் பிரச்சினைகள் ஏற்படும் அபாயம் அதிகரிக்கலாம்.

- இதயத் தசையில் ஏற்படும் அழற்சி: மயோகார்டிடிஸ் (Myocarditis) எனப்படும் இதயத் தசை அழற்சி, சில நேரங்களில் வைரஸ் தொற்றுகளால் ஏற்படலாம். இது இதயம் இரத்தத்தைச் செலுத்தும் திறனையும் அதன் மின் இயக்கத்தையும் பாதிக்கக்கூடும்.

- பிற ஆபத்துக் காரணிகள்: சில மருந்துகள், போதைப்பொருட்கள் மற்றும் உடலில் சோடியம், பொட்டாசியம் போன்ற தாதுக்களின் (Electrolytes) அளவில் ஏற்படும் சமநிலையின்மை ஆகியவையும் இதயத் துடிப்பில் ஆபத்தான மாற்றங்களை ஏற்படுத்தலாம்." என்று டாக்டர் கோபு கூறினார்.

புறக்கணிக்கக் கூடாத எச்சரிக்கை அறிகுறிகள் என்ன?

"திடீர் இதயச் செயலிழப்பு ஏற்படுவதற்கு முன்பாகச் சிலருக்கு எந்த அறிகுறிகளும் இல்லாமல் இருக்கலாம். இருப்பினும், சில அறிகுறிகள் இதயத்தில் ஏற்கெனவே பிரச்சினை இருப்பதற்கான எச்சரிக்கையாக இருக்கலாம்.

- காரணமின்றி மயங்கி விழுதல்: குறிப்பாக, உடற்பயிற்சி செய்யும்போதோ, உடல் உழைப்பின்போதோ மயக்கம் ஏற்படுவது கவனிக்கப்பட வேண்டிய அறிகுறியாகும்.

- நெஞ்சு வலி அல்லது அசௌகரியம்: உடற்பயிற்சி செய்யும் போது அல்லது உடல் உழைப்பின் போது நெஞ்சில் வலி, இறுக்கம் அல்லது அசௌகரியம் ஏற்பட்டால் அதைப் புறக்கணிக்கக்கூடாது.

- இதயத் துடிப்பில் மாற்றம்: இதயம் வழக்கத்தைவிட வேகமாகவோ அல்லது சீரற்ற முறையிலோ துடிப்பது மீண்டும் மீண்டும் ஏற்பட்டால் கவனம் தேவை. குறிப்பாக, இதனுடன் தலைச்சுற்றலும் இருந்தால் மருத்துவ ஆலோசனை பெற வேண்டும்.

- காரணமின்றி மூச்சுத்திணறல்: மேற்கொள்ளும் வேலையின் அளவுக்கு அதிகமாக மூச்சுத்திணறல் ஏற்படுவது அல்லது சிறிய உடல் உழைப்புக்கே மூச்சுவிடச் சிரமப்படுவது கவனிக்கப்பட வேண்டிய அறிகுறியாகும்.

- குடும்பத்தில் இளம் வயதில் திடீர் மரணம் ஏற்பட்ட வரலாறு: நெருங்கிய குடும்ப உறுப்பினர் ஒருவர் இளம் வயதில் காரணம் தெரியாமல் திடீரென உயிரிழந்திருந்தாலோ, குடும்பத்தில் பரம்பரையாக ஏற்படும் இதய நோய் இருந்தாலோ மருத்துவ ஆலோசனை பெறுவது அவசியம்.

இந்த அறிகுறிகள் இருப்பவர்கள் அனைவருக்கும் தீவிரமான இதய நோய் இருக்கிறது என்று அர்த்தமல்ல. இருப்பினும், அவற்றுக்கான காரணத்தைக் கண்டறிய மருத்துவப் பரிசோதனை அவசியம். குறிப்பாக, உடற்பயிற்சியின் போது மயக்கம் அல்லது நெஞ்சு வலி ஏற்பட்டால், அதைச் சாதாரண உடல் சோர்வு அல்லது நீர்ச்சத்துக் குறைபாடு என்று அலட்சியப்படுத்தக் கூடாது." என்று டாக்டர் கூறினார்.

ஒருவர் திடீரெனச் சுருண்டு விழுந்தால் என்ன செய்ய வேண்டும்?

"ஒருவர் திடீரெனச் சுருண்டு விழுந்து, சுயநினைவின்றி இருப்பதுடன், இயல்பாக மூச்சுவிடாமல் இருந்தாலோ அல்லது மூச்சுக்காகத் திணறினாலோ, அவருக்குத் திடீர் இதயச் செயலிழப்பு ஏற்பட்டிருக்கலாம் எனச் சந்தேகிக்க வேண்டும். அத்தகைய சூழலில் உடனடியாகச் செயல்படுவது மிகவும் அவசியம்.

முதலில், இந்தியாவில் அவசர உதவிக்கு 112 என்ற எண்ணை அழைக்க வேண்டும். பின்னர், இதய நுரையீரல் மீட்பு முதலுதவி (Cardiopulmonary Resuscitation - CPR) முறையைத் தொடங்க வேண்டும். இதில் மார்பின் நடுப்பகுதியில் அழுத்தம் கொடுப்பது முக்கியமானது.

தானியங்கி வெளிப்புற இதய அதிர்வு நீக்கி (Automated External Defibrillator - AED) என்ற கருவி அருகில் இருந்தால், அதை இயக்கி, அதில் கூறப்படும் வழிமுறைகளைப் பின்பற்ற வேண்டும். சிபிஆர் பயிற்சி பெறாதவர்கள், அவசர உதவி மையத்திலிருந்து வழங்கப்படும் வழிகாட்டுதலைப் பின்பற்றி மார்பில் அழுத்தம் கொடுக்கலாம்.

உடனடியாகச் செய்யப்படும் சிபிஆர் மற்றும் விரைவாக வழங்கப்படும் இதய அதிர்வு சிகிச்சை ஆகியவை உயிர் பிழைப்பதற்கான வாய்ப்பை அதிகரிக்கின்றன. எனவே, பாதிக்கப்பட்டவர் தானாகச் சுயநினைவுக்குத் திரும்புவார் என்று காத்திருக்காமல் உடனடியாக அவசர உதவியைப் பெற வேண்டும்." என்று டாக்டர் கூறினார்.

திடீர் இதயச் செயலிழப்பைத் தடுக்க முடியுமா?

"எல்லா நிகழ்வுகளையும் முன்கூட்டியே கணிக்கவோ தடுக்கவோ முடியாது. இருப்பினும், இதற்கான அதிக ஆபத்தில் இருப்பவர்களை முன்கூட்டியே கண்டறிவதன் மூலம், அவர்களுக்குத் தேவையான மருத்துவப் பரிசோதனைகளையும் சிகிச்சைகளையும் வழங்க முடியும்.

காரணமின்றி மயக்கம் ஏற்படுபவர்கள், உடற்பயிற்சியின் போது நெஞ்சு வலி ஏற்படுபவர்கள், அடிக்கடி இதயத் துடிப்பில் மாற்றங்களை உணர்பவர்கள் அல்லது குடும்பத்தில் திடீர் இதய மரணம் ஏற்பட்ட வரலாறு உள்ளவர்கள் மருத்துவ ஆலோசனை பெற வேண்டும்.

அவர்களின் அறிகுறிகள் மற்றும் மருத்துவ வரலாற்றைப் பொறுத்து, மருத்துவர் மின் இதய வரைபடப் பரிசோதனையை (Electrocardiogram - ECG) அல்லது இதயத்தின் அமைப்பையும் செயல்பாட்டையும் அறிய உதவும் இதய ஒலி வரைபடப் பரிசோதனையை (Echocardiogram) பரிந்துரைக்கலாம். தேவைக்கேற்ப மற்ற சிறப்புப் பரிசோதனைகளும் மேற்கொள்ளப்படலாம்.

கவலைக்குரிய அறிகுறிகள் இருப்பவர்கள், கடுமையான உடற்பயிற்சியை மீண்டும் தொடங்குவதற்கு முன்பு மருத்துவரிடம் பரிசோதனை செய்து கொள்ள வேண்டும். அதே நேரத்தில், இதயப் பிரச்சினைகள் ஏற்படலாம் என்ற அச்சத்தால் ஆரோக்கியமான இளைஞர்கள் உடற்பயிற்சி செய்வதைத் தவிர்க்க வேண்டியதில்லை. ஆபத்துக் காரணிகள் இருப்பவர்களுக்கு அவர்களின் உடல்நிலைக்கு ஏற்ப மருத்துவர் உரிய ஆலோசனைகளை வழங்குவார்.

இளம் வயதினராகவும் உடல் ஆரோக்கியத்துடன் இருப்பவராகவும் இருப்பது மட்டுமே இதயத்தில் எந்தப் பிரச்சினையும் இல்லை என்பதை உறுதிப்படுத்தாது. எச்சரிக்கை அறிகுறிகளை அறிந்துகொள்வது, சரியான நேரத்தில் மருத்துவப் பரிசோதனை செய்துகொள்வது மற்றும் சிபிஆர் முதலுதவி முறைகளைப் பற்றித் தெரிந்துகொள்வது ஆகியவை திடீர் இதயச் செயலிழப்பு ஏற்படும் சூழலில் உயிரைக் காப்பாற்ற உதவும்." என்று டாக்டர் கோபு கூறினார்.