Men's Health Month: ஆண்களை அதிகம் பாதிக்கும் உடல்நலப் பிரச்சினைகளை பட்டியலிட்ட டாக்டர்!

Men's Health Month: பல நோய்கள் ஆண்களையும் பெண்களையும் பாதிக்கின்றன; இருப்பினும், உயிரியல் காரணிகள், வாழ்க்கை முறைப் பழக்கவழக்கங்கள், தொழில் சார்ந்த சூழல்கள் மற்றும் மருத்துவ உதவியை நாடும் அணுகுமுறை ஆகியவற்றின் கூட்டு விளைவால் சில பாதிப்புகள் ஆண்களிடம் அதிகமாகக் காணப்படுகின்றன. மேலும், இந்திய ஆண்கள் வழக்கமான உடல்நலப் பரிசோதனைகளைச் செய்துகொள்வது குறைவு; பெரும்பாலும் நோய் முற்றிய நிலையிலேயே அவர்கள் மருத்துவ உதவியை நாடுகின்றனர்.

இப்படிப்பட்ட ஆண்களுக்காகவே 1992-ஆம் ஆண்டு முதல், ஜூன் மாதம் தேசிய ஆண்கள் சுகாதார மாதமாகக் கொண்டாடப்பட்டு வருகிறது. இதன் நோக்கம் எளிமையானது: ஆண்கள் மற்றும் சிறுவர்கள் இருவரிடமும் தடுக்கக்கூடிய உடல்நலப் பிரச்சனைகள் குறித்த விழிப்புணர்வை அதிகரிப்பதும், நோய்களை முன்கூட்டியே கண்டறிந்து சிகிச்சை அளிப்பதை ஊக்குவிப்பதுமாகும்.

இந்த ஆண்கள் சுகாதார மாதத்தை முன்னிட்டு பெண்களை விட ஆண்களை அதிகம் பாதிக்கும் உடல்நலப் பிரச்சினைகளின் பட்டியலை சென்னையில் உள்ள கிளீனீகிள்ஸ் மருத்துவமனையின் உள் மருத்துவ மற்றும் நீரிழிவு நோய் சிகிச்சை நிபுணரான டாக்டர் S. பிரசன்னா கார்த்திக் அவர்கள் தமிழ் போல்ட்ஸ்கையுடன் பகிர்ந்து கொண்டார்.

அப்போது அவர் கூறியதாவது, "பல மேற்கத்திய நாடுகளைச் சேர்ந்தவர்களுடன் ஒப்பிடுகையில், இந்திய ஆண்களுக்கு ஏறக்குறைய பத்து ஆண்டுகள் முன்னதாகவே இதய நோய் ஏற்படும் வாய்ப்பு உள்ளது. உயர் இரத்த அழுத்தம், நீரிழிவு நோய், புகைபிடித்தல், மன அழுத்தம், உடல் பருமன் மற்றும் உடற்பயிற்சி இன்மை ஆகியவை இதற்கு முக்கியக் காரணங்களாகும். மேலும், இனப்பெருக்க வயதில் உள்ள பெண்கள், தங்கள் உடலில் உள்ள ஹார்மோன்களால் அதிகப் பாதுகாப்புப் பெறுகின்றனர்" என்றார்.

புகையிலை தொடர்பான நோய்கள்

புகையிலை பயன்பாடு தொடர்பான நோய்கள் மற்றொரு முக்கிய கவலையாக உள்ளன. புகையிலை பயன்பாடு இதய நோய், பக்கவாதம், நாள்பட்ட நுரையீரல் நோய் மற்றும் பல்வேறு வகையான புற்றுநோய்கள் ஏற்படும் அபாயத்தை கணிசமாக அதிகரிக்கிறது. புற்றுநோய்களில், வாய் புற்றுநோய் மற்றும் நுரையீரல் புற்றுநோய் ஆகியவை பெண்களை விட ஆண்களையே அதிகம் பாதிக்கின்றன. இவை தவிர, புரோஸ்டேட் புற்றுநோய், இரைப்பை புற்றுநோய் மற்றும் கல்லீரல் புற்றுநோய் ஆகியவையும் பெண்களை விட ஆண்களிடையே மிகவும் அதிகமாகக் காணப்படுகின்றன.

கீல்வாதம், சிறுநீரகக் கற்கள்

கீல்வாதம் (gout) மற்றும் சிறுநீரகக் கற்கள் போன்ற பாதிப்புகள் ஆண்களிடம் அதிகமாகக் காணப்படுகின்றன. பதப்படுத்தப்பட்ட உணவுகள், சர்க்கரை கலந்த பானங்கள் மற்றும் சிவப்பு இறைச்சி (red meat) ஆகியவற்றை அதிகம் உட்கொள்வது மற்றும் உடலுழைப்பற்ற வாழ்க்கை முறை ஆகியவை, இளம் இந்திய ஆண்களிடையே யூரிக் அமிலத்தின் அளவு அதிகரிப்பதற்குப் பங்களித்துள்ளன. அதிகப்படியான யூரிக் அமிலம் மூட்டுகளில் வலிமிகுந்த கீல்வாத பாதிப்புகளை ஏற்படுத்துவது மட்டுமின்றி, இதய-இரத்த நாள நோய்களுக்கான அபாயத்தையும் அதிகரிக்கக்கூடும்.

புரோஸ்டேட் பிரச்சனைகள்

புரோஸ்டேட் (prostate) சுரப்பி தொடர்பான கோளாறு என்பது ஆண்களுக்கு மட்டுமே ஏற்படக்கூடிய ஒரு நோயாகும்; வயது ஏற ஏற இது மிகவும் பொதுவாகக் காணப்படுகிறது. 50 வயதை எட்டும் ஆண்களில் சுமார் நான்கு பேரில் ஒருவருக்குப் புரோஸ்டேட் சுரப்பி வீக்கம் ஏற்படுகிறது, மேலும் 60 வயதுக்குப் பிறகு இந்தநிலை இன்னும் பரவலாகக் காணப்படுகிறது. இதனால் இரவில் அடிக்கடி சிறுநீர் கழித்தல் மற்றும் சிறுநீர் கழிப்பதில் சிரமம் போன்ற பிரச்சனைகள் ஏற்படுகின்றன.

பிற பிரச்சனைகள்..

மரபியல் காரணங்களால் சில பாதிப்புகள் ஆண்களிடம் அதிகமாகக் காணப்படுகின்றன. உதாரணமாக, ஹீமோபிலியா மற்றும் சிவப்புப்-பச்சை நிறக்குருடு ஆகியவை "X" குரோமோசோமுடன் தொடர்புடைய பரம்பரை நோய்களாகும்; இவை பெரும்பாலும் ஆண்களிடமே காணப்படுகின்றன.

தடுப்பது எப்படி?

"புகையிலையைத் தவிர்ப்பது, மது அருந்துவதைக் கட்டுப்படுத்துவது, தவறாமல் உடற்பயிற்சி செய்வது, ஆரோக்கியமான உடல் எடையைப் பராமரிப்பது, இரத்த அழுத்தம் மற்றும் நீரிழிவு நோயைக் கட்டுப்படுத்துவது, சத்துச்சார்ந்த உணவை உட்கொள்வது மற்றும் ஆண்டுதோறும் இதய ஆரோக்கிய பரிசோதனை செய்துகொள்வது ஆகியவை நோய் ஏற்படும் அபாயத்தைக் பெருமளவில் குறைக்கக்கூடும். இந்திய ஆண்களைப் பொறுத்தவரை, நோய்த்தடுப்பு சுகாதாரப் பராமரிப்பில் முதலீடு செய்வது, நீண்ட, ஆரோக்கியமான மற்றும் அதிக பயனுள்ள வாழ்க்கையை நோக்கிய மிகச்சிறந்த ஒரு வழியாக அமையும்." என்றும் டாக்டர் கூறினார்.

(பொறுப்புத் துறப்பு: மேலே கொடுக்கப்பட்டுள்ள தகவல் இணையத்தில் கிடைக்கும் அனுமானங்கள் மற்றும் தகவல்களின் அடிப்படையில் கொடுக்கப்பட்டுள்ளன மற்றும் நம்பகத்தன்மைக்கு உத்தரவாதம் இல்லை. தமிழ் போல்ட்ஸ்கை இக்கட்டுரை தொடர்பான தகவலை உறுதிப்படுத்தவில்லை. மேலும் எங்கள் ஒரே நோக்கம் தகவலை வழங்குவது மட்டுமே. அதை வெறும் தகவலாக மட்டும் எடுத்துக் கொள்ள வேண்டும். எந்தவொரு தகவலையும் அனுமானத்தையும் பயிற்சி செய்வதற்கு அல்லது செயல்படுத்துவதற்கு முன், தயவுசெய்து சம்பந்தப்பட்ட நிபுணரை அணுகவும்.)