கொழுப்பு கல்லீரல் புற்றுநோயாக மாறுமா? யாருக்கு ஆபத்து அதிகம்? - விளக்கும் கல்லீரல் நிபுணர்!

Liver Cancer Awareness Month: சர்வதேச புற்றுநோய் ஆராய்ச்சி முகமையின் (IARC) ஆராய்ச்சியாளர்களின் சமீபத்திய மதிப்பீடுகளின்படி, 2024-ஆம் ஆண்டில் சுமார் 8,50,000 பேருக்கு கல்லீரல் புற்றுநோய் கண்டறியப்பட்டது; மேலும், 7,30,000-க்கும் அதிகமானோர் இந்த நோயால் உயிரிழந்தனர். உலகளவில் ஏழாவது பொதுவான புற்றுநோய் வகையாகவும், புற்றுநோயால் ஏற்படும் இறப்புகளுக்கு மூன்றாவது முக்கிய காரணமாகவும் கல்லீரல் புற்றுநோய் உள்ளது. எனவே இந்த கல்லீரல் புற்றுநோய் குறித்த விழிப்புணர்வை மக்களிடையே ஏற்படுத்தும் வகையில் ஒவ்வொரு ஆண்டும் அக்டோபர் மாதம் கல்லீரல் புற்றுநோய் விழிப்புணர்வு மாதம் அனுசரிக்கப்படுகிறது.

சமீப காலமாக இளைஞர்களிடையே கொழுப்பு கல்லீரல் பாதிப்பு அதிகரித்து வருகிறது. இதைக் காணும் போது கொழுப்பு கல்லீரல் பாதிப்பானது கல்லீரல் புற்றுநோயாக மாறும் வாய்ப்புள்ளதா என்ற கேள்வி பலருக்கும் எழக்கூடும். ஆகவே கொழுப்புக் கல்லீரல் இருந்தால் கல்லீரல் புற்றுநோய் வருமா என்பது குறித்து சென்னை கிளெனீகிள்ஸ் மருத்துவமனையின் கல்லீரல் மற்றும் மாற்று அறுவை சிகிச்சைத் துறை இயக்குநர், டாக்டர் ஜாய் வர்கீஸ் அவர்கள் தமிழ் போல்ட்ஸ்கையுடன் பகிர்ந்து கொண்டார்.

அப்போது அவர் கூறியதாவது, "வழக்கமான உடல்நலப் பரிசோதனைகளின் போது கொழுப்புக் கல்லீரல் (Fatty Liver) பாதிப்பு அதிகளவில் கண்டறியப்படுகிறது. குறிப்பாக, எந்தவிதமான வெளிப்படையான அறிகுறிகளும் இல்லாதவர்களிடமும் இந்தப் பாதிப்பு கண்டறியப்படலாம். கொழுப்புக் கல்லீரல் பாதிப்பு ஏற்பட்டால் அது தானாகவே புற்றுநோயாக மாறிவிடும் என்று அர்த்தமில்லை. இருப்பினும், சிலருக்கு இந்தப் பாதிப்பு தீவிரமான கல்லீரல் பாதிப்பாக முன்னேறக்கூடும் என்பதால், இதைப் புறக்கணிக்கக் கூடாது.

கல்லீரல் செல்களில் அதிகப்படியான கொழுப்பு சேரும் போது கொழுப்புக் கல்லீரல் பாதிப்பு ஏற்படுகிறது. உடல் பருமன், டைப் 2 நீரிழிவு நோய், ரத்தத்தில் அதிக கொழுப்புச் சத்து மற்றும் இன்சுலின் எதிர்ப்பு ஆகியவற்றுடன் இந்தப் பாதிப்பு பொதுவாகத் தொடர்புடையது. சிலருக்கு இது வளர்சிதை மாற்றச் செயல்பாட்டுக் குறைபாட்டுடன் தொடர்புடைய கல்லீரல் அழற்சியாக (Metabolic Dysfunction-Associated Steatohepatitis - MASH) மாறலாம்.

இதைத் தொடர்ந்து, கல்லீரலில் தழும்புத் திசுக்கள் உருவாகும் ஃபைப்ரோசிஸ் (Fibrosis) மற்றும் சிரோசிஸ் (Cirrhosis) எனப்படும் தீவிரமான கல்லீரல் பாதிப்பு ஏற்படலாம். சிரோசிஸ் கல்லீரல் புற்றுநோய் ஏற்படும் அபாயத்தை கணிசமாக அதிகரிக்கிறது. கல்லீரல் செல்களில் இருந்து உருவாகும் முதன்மை கல்லீரல் புற்றுநோயின் (Hepatocellular Carcinoma) மிகவும் பொதுவான வகை இதுவாகும்." என்று டாக்டர் கூறினார்.

கொழுப்புக் கல்லீரல் இருந்தால் கல்லீரல் புற்றுநோய் வருமா?

"இல்லை. கொழுப்புக் கல்லீரல் பாதிப்பு உள்ள பெரும்பாலானவர்களுக்குக் கல்லீரல் புற்றுநோய் ஏற்படுவதில்லை. கல்லீரலில் தழும்புத் திசுக்கள் அதிகமாக உருவாகியிருப்பவர்களுக்கும், சிரோசிஸ் பாதிப்பு உள்ளவர்களுக்கும் புற்றுநோய் ஏற்படும் அபாயம் அதிகமாக உள்ளது.

இது தவிர நீரிழிவு நோய், உடல் பருமன், அளவுக்கு அதிகமாக மது அருந்துதல் மற்றும் நீண்டகால ஹெபடைடிஸ் பி அல்லது சி வைரஸ் தொற்று ஆகியவையும் கல்லீரல் புற்றுநோய்க்கான கூடுதல் ஆபத்துக் காரணிகளாகும். சிரோசிஸ் பாதிப்பு இல்லாதவர்களுக்கும் சில நேரங்களில் கல்லீரல் புற்றுநோய் ஏற்படலாம். இருப்பினும், இது குறைவாகவே காணப்படுகிறது." என்று டாக்டர் கூறினார்.

ஆரம்பத்திலேயே கண்டறிவது ஏன் முக்கியம்?

"கொழுப்புக் கல்லீரல் பாதிப்பு எந்தவிதமான அறிகுறிகளும் இல்லாமலேயே படிப்படியாகத் தீவிரமடையலாம். அறிகுறிகள் இல்லை என்பதற்காகக் கல்லீரல் ஆரோக்கியமாக இருக்கிறது என்று அர்த்தமல்ல. நீரிழிவு நோய், உடல் பருமன் அல்லது வளர்சிதை மாற்றம் தொடர்பான பிற ஆபத்துக் காரணிகள் உள்ளவர்கள், தங்களுக்குத் தேவையான கல்லீரல் பரிசோதனைகள் குறித்து மருத்துவரிடம் ஆலோசிக்க வேண்டும்.

கல்லீரலில் குறிப்பிடத்தக்க அளவில் தழும்புத் திசுக்கள் உருவாகியிருப்பதை ஆரம்பத்திலேயே கண்டறிவது, சிகிச்சையைத் தீர்மானிக்கவும், தொடர்ந்து நெருக்கமான மருத்துவக் கண்காணிப்பு தேவையா என்பதை அறியவும் உதவும்," என்கிறார் டாக்டர் ஜாய் வர்கீஸ் .

"ஒருவரின் ஆபத்துக் காரணிகளைப் பொறுத்து, மருத்துவர்கள் இரத்தப் பரிசோதனைகள், அல்ட்ராசவுண்ட் ஸ்கேன் (Ultrasound Scan) அல்லது கல்லீரலின் இறுக்கத்தை மதிப்பிடும் பரிசோதனைகளைப் பரிந்துரைக்கலாம். சிரோசிஸ் பாதிப்பு உள்ளவர்களுக்கு, கல்லீரல் புற்றுநோயை ஆரம்பத்திலேயே கண்டறிவதற்கான தொடர் கண்காணிப்பு (Surveillance) பொதுவாகத் தேவைப்படுகிறது. மருத்துவரின் ஆலோசனைப்படி, ஆறு மாதங்களுக்கு ஒருமுறை அல்ட்ராசவுண்ட் ஸ்கேன் செய்வது இந்தக் கண்காணிப்பின் ஒரு பகுதியாக இருக்கலாம்." என்றும் டாக்டர் கூறினார்.

கல்லீரல் புற்றுநோய் அபாயத்தைக் குறைக்க முடியுமா?

"படிப்படியாக உடல் எடையைக் குறைத்தல், தொடர்ந்து உடற்பயிற்சி செய்தல், சமச்சீரான உணவை உட்கொள்ளுதல் மற்றும் நீரிழிவு நோய், கொழுப்புச் சத்து, இரத்த அழுத்தம் ஆகியவற்றைக் கட்டுக்குள் வைத்திருத்தல் போன்றவை கல்லீரல் ஆரோக்கியத்தை மேம்படுத்த உதவும். கல்லீரலில் குறிப்பிடத்தக்க பாதிப்பு உள்ளவர்கள் மது அருந்துவதைத் தவிர்ப்பது மிகவும் முக்கியம். கல்லீரலைச் சுத்தப்படுத்துவதாகக் கூறப்படும், மருத்துவ ஆதாரங்கள் இல்லாத தயாரிப்புகளையும் (Liver Detox Products) பயன்படுத்துவதைத் தவிர்க்க வேண்டும்.

கொழுப்புக் கல்லீரல் பாதிப்பு ஏற்பட்டால் பீதியடைய வேண்டியதில்லை. ஆனால், ஆரம்பத்திலேயே உரிய நடவடிக்கை எடுப்பது அவசியம். சரியான நேரத்தில் பரிசோதனை செய்துகொள்வதும், முறையான சிகிச்சையைப் பெறுவதும் கல்லீரல் பாதிப்பு மேலும் தீவிரமடைவதைத் தடுக்கவும், கல்லீரல் புற்றுநோய் உள்ளிட்ட கடுமையான சிக்கல்களின் அபாயத்தைக் குறைக்கவும் உதவும்" என்று டாக்டர் ஜாய் வர்கீஸ் கூறினார்.