மாரடைப்பு வரும்போது... ஆண்களுக்கும் பெண்களுக்கும் வெவ்வேறு அறிகுறிகள் ஏற்படுமாம்...ஜாக்கிரதை!

மாரடைப்பு அறிகுறிகள்

மாரடைப்பின் அறிகுறிகளை பெண்கள் அலட்சியப்படுத்துகிறார்கள். தசை வலி அல்லது அஜீரணம் போன்ற வேறு ஏதாவது காரணமாக இருக்கலாம் எனத் தவறாகப் புரிந்துகொள்கிறார்கள். மார்பு வலி மற்றும் அழுத்தம் போன்ற வலுவான மாரடைப்பு அறிகுறிகளைக் கூட பெண்கள் கவனிக்காமல் விடுகிறார்கள் என நிபுணர்கள் எச்சரிக்கிறார்கள். ஆதலால், பெண்கள் தங்கள் உடல்நலம் குறித்து மிகவும் கவனமாக இருக்க வேண்டும்.

ஆய்வு கூறுவது

பொதுவாக பிரச்சனைகளை விரைவில் கண்டுபிடித்துவிட்டால், அதற்கான சிகிச்சையை தமாதிக்காமல் உடனே தொடங்கிவிடலாம். பெண்கள் அறிகுறிகளை மிக அலட்சியமாக எடுத்துக்கொள்வதால், சிகிச்சையை தாமதமாக பெறுகிறார்கள். இதனால், பாதிப்பு அதிகமாகிறது. சில நேரங்களில் இறப்பும் ஏற்படக்கூடும். மாரடைப்பு பிரச்சனைக்கு சிகிச்சை பெறுவதற்கு முன்பு மக்கள் எவ்வளவு நேரம் காத்திருந்தார்கள் என்பதை அளவிடும் ஒரு ஆய்வில், ஆண்களுக்கு சுமார் 16 மணிநேரத்துடன் ஒப்பிடும்போது, பெண்களுக்கு சராசரியாக 54 மணிநேரம் தாமதமாகிறது.

பெண்களுக்கு ஏற்படக்கூடிய அறிகுறிகள் என்ன?

மாரடைப்பின் போது, பெண்களுக்கு குமட்டல், வாந்தி, தாடையில் வலி, கழுத்து அல்லது மேல் முதுகில் வலி, கீழ் மார்பு அல்லது அடிவயிற்றில் வலி, மூச்சுத் திணறல், மயக்கம், அஜீரணம் மற்றும் தீவிர சோர்வு போன்றவற்றை அனுபவிக்கும் வாய்ப்புகள் அதிகம். மேலும், தூக்கமின்மை பிரச்சினைகள், பதட்டம், தலைச்சுற்றல் மற்றும் கடுமையான சோர்வு போன்ற அறிகுறிகளை அனுபவிக்க வாய்ப்புள்ளது.

மாதவிடாய் ஒரு பெரிய ஆபத்து காரணி

மாதவிடாய் நிறுத்தம் பெண்களுக்கு இதய ஆரோக்கியத்திற்கு அதிக ஆபத்தை ஏற்படுத்துகிறது. அறிக்கைகளின்படி, பெண்களில் ஏற்படும் இதயம் தொடர்பான இறப்புகளில் பெரும்பகுதி 50 வயதுக்கு மேற்பட்ட பெண்களுக்கு நிகழ்கிறது. ஆரோக்கியமற்ற உடல் எடை, உடற்பயிற்சியின்மை, புகைபிடித்தல், நிறைவுற்ற கொழுப்பு-குறைவான டிரான்ஸ் கொழுப்பு கொண்ட உணவுகளை உட்கொள்வது ஒரு பெண்ணின் இதய ஆரோக்கியத்தை பாதிக்கிறது. அதிக ஆபத்தில் ஆழ்த்துகிறது.

ஆண்கள் அனுபவிக்கும் அறிகுறிகள் என்ன?

மாரடைப்பின் போது ஆண்களுக்கு மார்பு வலி, குமட்டல், வாந்தி, தாடை, கழுத்து அல்லது முதுகில் வலி, மார்பில் அழுத்தும் மற்றும் மூச்சுத் திணறல் போன்ற உணர்வு ஏற்படும். ஆண்களுக்கு கை வலி, குளிர் வியர்வை மற்றும் தலைச்சுற்றல் போன்ற அறிகுறிகளும் ஏற்படலாம்.

ஆபத்து காரணிகள்

ஆண்களாக இருந்தாலும் சரி, பெண்களாக இருந்தாலும் சரி, இதயப் பிரச்சனைகளுடன் தொடர்புடைய அபாயங்களைத் தவிர்ப்பதற்கு ஆபத்து காரணிகளை அறிந்து கொள்வது மிகவும் அவசியம். உயர் இரத்த அழுத்தம், உயர் கொழுப்பு, சாதாரண ட்ரைகிளிசரைடுகளை விட அதிகமானது, நீரிழிவு நோய், புகைபிடித்தல், மது அருந்துதல், உடல் பருமன், உணவில் ஆரோக்கியமற்ற கொழுப்பு போன்றவை மாரடைப்புக்கான பொதுவான ஆபத்து காரணிகள் ஆகும்.