இந்தியர்களுக்கு மிகவும் பிடித்த இந்த காய்கறிகள் அமெரிக்காவிலிருந்து வந்தவையாம்...எந்தெந்த காய்கறிகள் தெரியுமா?

இந்திய உணவுகள் உலக அளவில் மிகவும் பிரபலமானவை. இந்திய உணவுகளின் தனிச்சிறப்பே அவற்றில் சேர்க்கப்படும் மசாலாப் பொருட்களும், காய்கறிகளும்தான். ஆனால் பெரும்பாலான மக்களால் நம்ப முடியாத விஷயம் என்னவென்றால் நாம் விரும்பி சாப்பிடும் சில உணவுகளும், காய்கறிகளும் இந்தியாவை பூர்வீகமாகக் கொண்டவை அல்ல.

அவை உலகின் பல்வேறு நாடுகளிலிருந்து இந்தியாவிற்கு வந்தவை. குறிப்பாக கொலம்பிய பரிமாற்றத்திற்குப் பிறகு, அமெரிக்க உணவுகள் உலகளவில் பயணிக்கத் தொடங்கியபோது. மெதுவாக இந்த பொருட்கள் இந்திய உணவுகளுடன் கலந்தன, இதில் விசித்திரமானது என்னவென்றால் நாளடைவில் இந்த உணவுகள் வெளிநாட்டிலிருந்து வந்தவை என்பதை நாம் மறந்துவிடும் அளவுக்கு பொதுவானதாகிவிட்டன.

இப்போது அவை எந்தெந்த பொருட்கள் என்று தெரிந்தால் அவற்றை நம்புவது கடினம். இன்று இந்த பொருட்கள் இல்லாமல் இந்திய உணவுகளை கற்பனை செய்து கூட பார்க்க முடியாது. அவை எந்தெந்த உணவுகள் என்று இந்த பதிவில் தெரிந்து கொள்ளலாம்.

மிளகாய்

இது அதிர்ச்சியாகவும், ஆச்சரியமாகவும் இருக்கலாம், மிளகாய் நம் உணவில் மிகவும் ஆழமாக வேரூன்றியிருந்தாலும், அது இந்தியாவை பூர்வீகமாகக் கொண்டதல்ல. அவை உண்மையில் மத்திய மற்றும் தென் அமெரிக்காவிலிருந்து வந்தவை. போர்த்துகீசிய வணிகர்கள் மூலம் அவை இந்தியாவிற்கு கொண்டுவரப்பட்டது, இந்தியா அவற்றை விரைவாக ஏற்றுக்கொண்டது. மிளகாய் இந்திய சமையலில் காரம், சுவை மற்றும் முற்றிலும் புதிய பரிணாமத்தைக் கொண்டுவந்தது. சுவையைத் தவிர, அவை வளர்சிதை மாற்றத்தை அதிகரிக்கவும் உதவுகின்றன மற்றும் ஆக்ஸிஜனேற்றிகள் நிறைந்துள்ளன.

உருளைக்கிழங்கு

இந்திய சமையலறையையும், உருளைக்கிழங்கையும் ஒருபோதும் பிரிக்க முடியாது. அனைத்து இந்திய சமையலறைகளிலும் உருளைக்கிழங்கு நிச்சயம் இருக்கும். நம் உணவில் முக்கிய அங்கும் வகிக்கும் உருளைக்கிழங்கு இந்தியாவை பூர்வீகமாகக் கொண்டதல்ல, இது ஆண்டிஸிலிருந்து வந்தது, போர்த்துகீசியர்களால் இந்தியாவிற்கு கொண்டு வரப்பட்டது. காலப்போக்கில், அவை உள்ளூர் இந்திய சமையலறையை ஆக்கிரமித்தது. உருளைக்கிழங்கை பல வழிகளில் சமைக்கலாம், சரியான முறையில் அவற்றை சாப்பிடும்போது, ஆற்றல், பொட்டாசியம் மற்றும் நார்ச்சத்துக்களை வழங்குகிறது.

தக்காளி

இந்த வசீகரமான தக்காளி இல்லாத சமையலறையை கற்பனை செய்து கூட பார்க்க முடியாது. தக்காளி என்பது அமெரிக்காவலிருந்து வந்த மற்றொரு பிரபல உணவாகும். ரசம் முதல் சட்னி வரை, அவை பல உணவுகளுக்கு சுவை, நிறம் மற்றும் சமநிலையைக் கொண்டுவருகின்றன. தக்காளியில் வைட்டமின் சி மற்றும் லைகோபீன் நிறைந்துள்ளன, அவை சருமம், நோய் எதிர்ப்பு சக்தி மற்றும் இதய ஆரோக்கியத்திற்கு சிறந்தவை.

மக்காச்சோளம்

மக்காச்சோளம் இந்தியாவின் பல பகுதிகளில், குறிப்பாக பஞ்சாப் மற்றும் குஜராத்தில் ஒரு முக்கிய உணவாக உள்ளது. இது மெக்சிகோவிலிருந்து இந்தியாவிற்கு வந்தது, இது வர்த்தக வழிகள் மூலம் இங்கு கொண்டு வரப்பட்டது. சோள மாவு எதிர்பார்த்ததை விட விரைவாக பழங்குடிப் பகுதிகளில் ரொட்டிகள், சிற்றுண்டிகள் மற்றும் புளிக்கவைக்கப்பட்ட உணவுகளில் நுழைந்தது. சோளம் பசையம் இல்லாதது, நார்ச்சத்து அதிகம் உள்ளது மற்றும் பி வைட்டமின்கள் நிறைந்தது.

நிலக்கடலை

நம் அனைவருக்கும் பிடித்த நிலக்கடலை தென் அமெரிக்காவிலிருந்து இந்தியாவிற்கு வந்தது, ஆனால் இப்போது பல பிராந்திய உணவு வகைகளின் ஒரு பகுதியாக மாறிவிட்டது. தெற்கில் வேர்க்கடலை சட்னி, மேற்கில் போஹா, அல்லது தினசரி சமையலில் பயன்படுத்தப்படும் நிலக்கடலை எண்ணெய் போன்றவை இல்லாத வாழ்க்கையை நினைத்துக் கூட பார்க்க முடியாது. வேர்க்கடலை புரதம் நிறைந்தது, இதயத்திற்கு ஆரோக்கியமானது மற்றும் ஆரோக்கியமான கொழுப்புகளின் நல்ல மூலமாக உள்ளது.

பப்பாளி

தற்போது பெரும்பாலான இந்திய வீடுகளின் தோட்டத்தை அலங்கரிக்கும் இந்த வெப்ப மண்டல பழம் அமெரிக்காவிலிருந்து இந்தியாவிற்கு வந்தது. அதன் சுவை மற்றும் சுகாதார நன்மைகளுக்காக இது விரைவில் இந்திய மக்களால் ஏற்றுக்கொள்ளப்பட்டது. பப்பாளி அதன் செரிமான நொதிகள், வைட்டமின் சி உள்ளடக்கம் மற்றும் வீக்கத்தைக் குறைப்பதில் அதன் பங்கிற்கு பெயர் பெற்றது. இது சரும பராமரிப்பிலும் முக்கியப்பங்கு வகிக்கிறது.

Disclaimer: இந்தக் கட்டுரையில் வழங்கப்பட்ட தகவல்கள் பொதுவான தகவல் மற்றும் கல்வி நோக்கங்களுக்காக மட்டுமே, மேலும் இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றா பகிரப்படவில்லை. மருத்துவ நிலை குறித்து உங்களுக்கு ஏதேனும் கேள்விகள் இருந்தால் உங்கள் மருத்துவர் அல்லது தகுதிவாய்ந்த சுகாதார வழங்குநரின் ஆலோசனையைப் பெறவும்.