இந்தியாவில் ரூபாய் நோட்டுகளும், நாணயங்களும் எப்படி அச்சடிக்கப்படுகிறது? எங்கு அச்சடிக்கப்படுகிறது தெரியுமா?

நாம் ஒவ்வொரு நாளும் பணத்தையும், நாணயங்களையும் பயன்படுத்துகிறோம். என்னதான் டிஜிட்டல் முறையில் பணம் செலவழிக்க தொடங்கிவிட்டாலும் அன்றாட வாழ்க்கையில் நாம் பல்வேறு விஷயங்களுக்காக பணத்தையும், நாணயத்தையும் செலவழிக்கிறோம். ஆனால், தினமும் நம் கைக்கு வரும் மற்றும் நாம் செலவழிக்கும் நம்மிடம் புழங்கும் ரூபாய் நோட்டுகளும் நாணயங்களும் எங்கிருந்து வருகின்றன என்று எப்போதாவது யோசித்திருக்கிறீர்களா?

நமது பொருளாதாரத்தை இயக்கும் இந்த பணம், ஒரே நாளில் உருவாகி நமது கைக்கு வந்துவிடுவதில்லை. இது வடிவமைப்பு, அச்சிடுதல், நாணயங்களாக உருவாக்குதல் என ஒரு தீவிரமான செயல்முறைக்கு உட்பட்டு, இந்திய அரசு மற்றும் இந்திய ரிசர்வ் வங்கியின் (RBI) உதவியுடன் நம் கைக்கு வந்து சேர்கிறது.

இந்திய ரூபாயும் அதன் சின்னமும்

இந்தியாவின் அதிகாரப்பூர்வ நாணயம் 'இந்திய ரூபாய்' (INR) ஆகும். இது 100 பைசாக்களாகப் பிரிக்கப்பட்டுள்ளது. இந்திய ரிசர்வ் வங்கியின் அதிகாரப்பூர்வ இணையதளத்தின்படி, ரூபாய்க்கு உலகளவில் அங்கீகரிக்கப்பட்ட ஒரு தனித்துவமான குறியீடாக - ₹ - உள்ளது. இதன் வடிவமைப்பு, தேவநாகரி எழுத்தான "र" (Ra) மற்றும் லத்தீன் எழுத்தான "R" ஆகியவற்றின் கலவையாகும்.

நாணயங்கள் எங்கு அச்சிடப்படுகின்றன?

இந்திய ரிசர்வ் வங்கியின் தகவல்படி, இந்தியாவில் நாணயங்கள் 'Security Printing and Minting Corporation of India Ltd.' (SPMCIL) நிறுவனத்தால் மும்பை, ஹைதராபாத், கொல்கத்தா மற்றும் நொய்டா ஆகிய நான்கு இடங்களில் தயாரிக்கப்படுகின்றன. நாணயங்கள் தயாரிக்கப்பட்டவுடன் அவை நேரடியாக புழக்கத்திற்கு வருவதில்லை. இந்திய ரிசர்வ் வங்கிச் சட்டத்தின்படி, இவை முதலில் இந்திய ரிசர்வ் வங்கி (RBI) மூலமாகவே பொதுமக்களின் பயன்பாட்டிற்குக் கொண்டு வரப்படுகின்றன.

பணம் எங்கு அச்சிடப்படுகிறது?

இந்திய ரிசர்வ் வங்கியின் தகவல்படி, இந்தியாவில் பணம் நாட்டின் பல்வேறு பகுதிகளில் அமைந்துள்ள நான்கு அச்சகங்களில் அச்சிடப்படுகின்றன. இவற்றில் நாசிக் மற்றும் தேவாஸில் உள்ள இரண்டு அச்சகங்கள், 'Security Printing and Minting Corporation of India Ltd' (SPMCIL) நிறுவனத்தால் இயக்கப்படுகின்றன. மைசூரு மற்றும் சல்போனியில் உள்ள மற்ற இரண்டு அச்சகங்கள், இந்திய ரிசர்வ் வங்கியின் முழுமையான உரிமையிலுள்ள 'Bharatiya Reserve Bank Note Mudran Private Ltd' (BRBNMPL) நிறுவனத்தால் நிர்வகிக்கப்படுகின்றன.

இந்திய ரிசர்வ் வங்கியின் பங்கு

இந்தியாவில் ரூபாய் நோட்டுகளை வெளியிடும் அதிகாரம் ரிசர்வ் வங்கிக்கு மட்டுமே உண்டு. ரூபாய் தாள்களின் வடிவமைப்பு, அளவு மற்றும் அதற்கான காகிதங்கள் ஆகியவை, இந்திய ரிசர்வ் வங்கியின் பரிந்துரையின் பேரில் மத்திய அரசால் அங்கீகரிக்கப்படுகின்றன. ஒவ்வொரு ஆண்டும், பல்வேறு மதிப்புடைய பணத்தாள்கள் எவ்வளவு தேவைப்படும் என்பதைக் கணக்கிட்டு, அவற்றை அச்சிடும் அச்சகங்களுக்கு இந்திய ரிசர்வ் வங்கி ஆர்டர் வழங்குகிறது. ரூபாய் நோட்டுக்களின் தரத்தை உறுதிப்படுத்த, இந்திய ரிசர்வ் வங்கி "தூய்மையான பணத்தாள் கொள்கையை" (Clean Note Policy) பின்பற்றுகிறது. இதன்படி, நல்ல நிலையில் உள்ள தாள்கள் மட்டுமே மீண்டும் புழக்கத்திற்கு விடப்படுகின்றன; பழுதடைந்த அல்லது சேதமடைந்த நோட்டுகள் திரும்பப் பெறப்பட்டு அழிக்கப்படுகின்றன. நாணயங்களைப் பொறுத்தவரை, 'நாணயச் சட்டம், 2011'-ன் (Coinage Act, 2011) கீழ், அவற்றின் வடிவமைப்பு மற்றும் தயாரிப்புப் பணிகளை இந்திய அரசு மேற்கொள்கிறது.

Disclaimer: இந்தக் கட்டுரையில் குறிப்பிடப்பட்டுள்ள ரத்தினக் கற்களின் நன்மைகள் பாரம்பரிய நம்பிக்கைகள் மற்றும் ஜோதிட நடைமுறைகளை அடிப்படையாகக் கொண்டவை. இதன் முடிவுகள் நபருக்கு நபர் மாறுபடும். ஜோதிட நோக்கங்களுக்காக எந்த ரத்தினக் கல்லையும் அணிவதற்கு முன்பு ஒரு சான்றளிக்கப்பட்ட ஜோதிடர் அல்லது ரத்தின நிபுணரை அணுகுமாறு நாங்கள் பரிந்துரைக்கிறோம். இந்த உள்ளடக்கம் தகவல் நோக்கங்களுக்காக மட்டுமே, மேலும் தொழில்முறை ஆலோசனைக்கு மாற்றாக எடுத்துக்கொள்ள வேண்டாம்.