காதலனுடன் வாக்குவாதம் செய்வதைத் தவிர்க்க சில வழிகள்!!!

வெளிப்படுத்த தாமதப்படுத்த வேண்டாம்

நிறைய பெண்கள் தங்களுக்குள் காதலனால் ஏற்பட்ட வேதனை மற்றும் மனதில் தோன்றுவதை அவர்களிடம் வெளிப்படையாக பேசாமல், உடனே முகத்தை தொங்கவிட்டு, அவர்களிடம் பேசாமல் போய்விடுவார்கள். பின் ஒரு கட்டத்தில் இது ஒரு பெரிய சண்டையாக வெடித்து, இருவருக்கும் மனதில் பெரிய கஷ்டத்தை ஏற்படுத்தி, பெரும் தொல்லையாக அமைந்துவிடும். எனவே எந்த ஒரு மன வருத்தம் ஏற்பட்டாலும், அப்போதே காதலனிடம் பேசியோ அல்லது வெளிப்படுத்தி விடுவது நல்லது.

ஆண்களுக்கு சொல்லாமல் புரியாது

ஆண்களுக்கு எதுவும் அவ்வளவு எளிதில் புரிந்து கொள்ளும் சக்தி இல்லை. அதிலும் காதலிக்கு ஏதாவது வருத்தம் இருந்தால் கூட, அது அவர்களுக்கு சொல்லாமல் புரியாது. எனவே அதனைப் புரிந்து கொண்டு, அவர்கள் மீது உங்களுக்கு வருத்தம் இருந்தால், அதை வெளிப்படையாக சொல்லுங்கள்.

சண்டை போடாமல் எப்படி வெளிப்படுத்துவது

சில நேரங்களில் பெண்களால் தங்களது கஷ்டம் மற்றும் வருத்தத்தை சண்டை போடாமல் வெளிப்படுத்த முடியாது. ஏனெனில் சில ஆண்கள் தமது காதலியின் உணர்ச்சியை புரிந்து கொள்ளாமல் எதையாவது செய்துவிட்டு, பின் அதனை காதலியானவள் தவறு என்று சுட்டிக் காட்டி கேட்கும் போது தான், அதனைப் புரிந்து கொண்டு பின் வருத்தப்படுவார்கள். எனவே உங்கள் காதலன் எதையாவது தவறாக செய்தால், அதனை அவர்களுக்கு சொல்லி, பின் அதற்கான தீர்வை அவர்களிடமே கேட்டு, அவர்கள் என்ன சொல்கிறார்கள் என்பதை கேளுங்கள்.

முக்கியமாக தவிர்க்க வேண்டியவை

* எவ்வளவு கோபம் இருந்தாலும், குரலை எப்போதும் உயர்த்தி பேசாமல், எப்போதும் சாதாரணமாக பேசுங்கள்.

* சண்டைகள் எத்தனை வந்தாலும், பழைய கதைகளைப் பற்றி பேசி, தற்போதைய சண்டையை பெரிதாக்காதீர்கள்.

* இருவருக்கிடையே உள்ள சண்டையை சரிசெய்ய மூன்றாம் நபரை ஈடுபடுத்தாதீர்கள்.

* குறிப்பாக படுக்கும் போது பிரச்சனைகளை பற்றி விவாதிக்காதீர்கள். இதனால் பிரச்சனை எப்போதும் நீங்காது.

உறவை வலுப்படுத்துங்கள்

எத்தனை முறை சண்டை போட்டாலும், காதலன் ஆசையாக உங்களிடம் வரும் போது, அவர்களை புறக்கணிக்காதீர்கள். ஏனெனில் சண்டையை, செல்லக் கொஞ்சல்கள் மூலமும் சரிசெய்ய முடியும். எனவே சண்டை வந்தால், மனதில் எப்போதும் வைத்துக் கொள்ளாமல், காதலனுடன் நேரத்தை செலவழித்து, அவர்களுடன் சந்தோஷமாக பேசி, அவர்களுக்கு உங்கள் அன்பை வெளிக்காட்டினால், காதலன் எப்போதும் உங்களை விட்டு செல்லமாட்டார்கள்.