காலையில் அடிக்கடி இந்த அடையை செஞ்சு சாப்பிடுங்க.. உடல் எடை வேகமாக குறையும்...

Weight Loss Adai Recipe In Tamil: நீங்கள் உடல் எடையைக் குறைக்க ட்ரை செய்து கொண்டிருக்கிறீர்களா? அதற்காக டயட்டில் இருக்கிறீர்களா? அப்படியானால் உங்கள் டயட்டில் சத்தான, அதே சமயம் உடல் எடையைக் குறைக்கத் தூண்டும் உணவுகளை சேர்த்து வந்தால், உடல் எடை வேகமாக குறையும்.

இதுவரை உங்கள் டயட்டில் சுவையில்லாத உணவு தான் இருந்தது என்றால், உங்களின் டயட்டில் சுவையான அடையை சேர்த்துக் கொள்ளுங்கள். இந்த அடை ருசியாக இருப்பதோடு, உடல் எடையைக் குறைக்கவும் உதவி புரியும். மேலும் இந்த அடை செய்வதற்கு மிகவும் சுலபமாக இருக்கும். டயட்டில் இல்லாதவர்களும் இந்த அடையை அடிக்கடி செய்து சாப்பிடலாம்.

உங்களுக்கு இந்த எடையைக் குறைக்க உதவும் அடையை எப்படி செய்வதென்று தெரிந்து கொள்ள வேண்டுமா? கீழே எடையைக் குறைக்க உதவும் அடை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கோதுமை மாவு - 1 கப்
* துருவிய சுரைக்காய் - 1 கப்
* துருவிய கேரட் - 1 கப்
* வெங்காயம் - 1 (பொடியாக நறுக்கியது)
* பச்சை மிளகாய் - 1 (பொடியாக நறுக்கியது)
* பூண்டு - 10 பல் (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* பசலைக்கீரை - 1/2 கப் (பொடியாக நறுக்கியது)
* உப்பு - 1 டீஸ்பூன்
* சீரகப் பொடி - 1/4 டீஸ்பூன்
* மிளகுத் தூள் - 1/4 டீஸ்பூன்
* மஞ்சள் தூள் - 1/4 டீஸ்பூன்
* ஓமம் - 1/4 டீஸ்பூன்
* எண்ணெய் - சிறிது

மல்லி சட்னிக்கு...

* எண்ணெய் - 1 டீஸ்பூன்
* பச்சை மிளகாய் - 3
* புளி - சிறிய துண்டு
* உளுத்தம் பருப்பு - 1 டேபிள் ஸ்பூன்
* கொத்தமல்லி - 1 கப்
* உப்பு - 1/2 டீஸ்பூன்
* தண்ணீர் - சிறிது

தாளிப்பதற்கு...

* எண்ணெய் - 1 டீஸ்பூன்
* கடுகு - 1/4 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து

செய்முறை:

* முதலில் ஒரு பாத்திரத்தில் 1 கப் கோதுமை மாவை எடுத்துக் கொள்ள வேண்டும்.
* பின்னர் அத்துடன் சீரகத் தூள், மிளகுத் தூள், மஞ்சள் தூள், ஓமம் மற்றும் உப்பு சேர்த்துக் கொள்ள வேண்டும்.
* பின்பு அதோடு துருவிய சுரைக்காய், கேரட் மற்றும் பொடியாக நறுக்கிய வெங்காயம், பச்சை மிளகாய் சேர்த்து, பூண்டு சேர்த்துக் கொள்ள வேண்டும்.
* பிறகு பொடியாக நறுக்கிய கொத்தமல்லி சிறிது மற்றும் 1/2 கப் பொடியாக நறுக்கிய பசலைக்கீரையை சேர்த்து, 1 கப் நீரை ஊற்றி, அடை மாவு பதத்திற்கு பிசைந்து கொள்ள வேண்டும்.
* அதன் பின் தோசைக் கல்லை அடுப்பில் வைத்து, கல் சூடானதும், அதில் 1 டீஸ்பூன் எண்ணெய் ஊற்றி, சிறிது பிசைந்து வைத்துள்ள மாவை வைத்து, கையில் நீரைத் தொட்டு, அப்படியே கல்லில் தட்டையாக பரப்பி விட வேண்டும்.
* பின் உயர் தீயில் வைத்து, முன்னும் பின்னும் வேக வைத்து எடுத்தால், சுவையான அடை தயார்.
* அடுத்து சட்னிக்கு ஒரு வாணலியில் 1 டீஸ்பூன் எண்ணெய் ஊற்றி சூடானதும், 3 பச்சை மிளகாய், சிறிது புளி, 1 டேபிள் ஸ்பூன் உளுத்தம் பருப்பை சேர்த்து பொன்னிறமாக வறுக்க வேண்டும்.
* பின் அதில் 1 கப் கொத்தமல்லியைத் தூவி, 1/2 டீஸ்பூன் உப்பு சேர்த்து இலைகள் சுருங்கும் வரை வதக்கி இறக்கி குளிர வைத்து, மிக்சர் ஜாரில் போட்டு அரைத்து, ஒரு கிண்ணத்தில் எடுத்துக் கொள்ள வேண்டும்.
* இறுதியாக சிறு வாணலியை அடுப்பில் வைத்து, அதில் 1 டீஸ்பூன் எண்ணெய் ஊற்றி சூடானதும், 1/4 டீஸ்பூன் கடுகு, 1/2 டீஸ்பூன் உளுத்தம் பருப்பு, 1 கொத்து கறிவேப்பிலை சேர்த்து தாளித்து, சட்னியுடன் சேர்த்து கிளறினால், மல்லி சட்னி தயார்.