மீல் மேக்கர் கபாப்

எப்போதும் விடுமுறை நாட்களில் அசைவ உணவுகளை சாப்பிட்டு போர் அடித்திருந்தால், அத்தகையவர்களுக்கு ஒரு சூப்பரா ரெசிபி உள்ளது. அந்த ரெசிபியை செய்து சாப்பிட்டால், நிச்சயம் அது ஒரு வித்தியாசமான அனுபவத்தைக் கொடுக்கும். அதிலும் அந்த ரெசிபி பிரியாணிக்கு பயன்படுத்தும் மீல் மேக்கரைப் பயன்படுத்தி செய்யக்கூடியது.

பொதுவாக சிக்கன் கபாப் தான் சாப்பிட்டிருப்போம். ஆனால் மீல் மேக்கர் கபாப் சாப்பிட்டதுண்டா? இல்லை தானே. அப்படியெனில், அந்த மீல் மேக்கர் கபாப் ரெசிபியை, இந்த வாரம் முயற்சி செய்து பாருங்கள். சரி, அந்த ரெசிபியின் செய்முறையைப் பார்ப்போமா!!!

தேவையான பொருட்கள்:

மீல் மேக்கர் - 10
இஞ்சி பூண்டு பேஸ்ட் - 1 டேபிள் ஸ்பூன்
பச்சை மிளகாய் - 4
வெங்காயம் - 1 (நறுக்கியது)
கொத்தமல்லி - சிறிது
தயிர் - 2 டேபிள் ஸ்பூன்
மிளகாய் தூள் - 1/2 டீஸ்பூன்
கரம் மசாலா - 1 டீஸ்பூன்
மிளகு - 1 டீஸ்பூன்
உப்பு - தேவையான அளவு
எண்ணெய் - 2 டேபிள் ஸ்பூன்

செய்முறை:

முதலில் மீல் மேக்கரை சுடு தண்ணீரில் போட்டு 10 நிமிடம் ஊற வைக்க வேண்டும். பின் அதனை தண்ணீரில் இருந்து எடுத்து, நீரை முற்றிலும் பிழிந்து விட வேண்டும்.

பின்பு அதன் மேல் இஞ்ச பூண்டு பேஸ்ட் மற்றும் உப்பு தடவி தனியாக வைத்துக் கொள்ள வேண்டும்.

பிறகு மிக்ஸியில் வெங்காயம், பச்சை மிளகாய் மற்றும் கொத்தமல்லியைப் போட்டு நன்கு மென்மையாக அரைத்துக் கொள்ள வேண்டும்.

பின் அந்த பேஸ்ட்டில் தயிர் சேர்த்து நன்கு கலந்து கொள்ள வேண்டும்.

அடுத்து அந்த மீல் மேக்கரை, அதில் போட்டு 10 நிமிடம் ஊற வைத்துக் கொள்ள வேண்டும்.

பின்னர் மைக்ரோ ஓவனை 200 டிகிரில் சூடேற்றி, பேக்கிங் டிஷ்ஷில் ஊற வைத்துள்ள மீல் மேக்கரை வைத்து, அதன் மேல் சிறிது அந்த கலவையை ஊற்றி, எண்ணெய் ஊற்றி, 10 நிமிடம் க்ரில் செய்ய வேண்டும். பின் அதனை திருப்பிப் போட்டு, 3-4 நிமிடம் க்ரில் செய்து எடுக்க வேண்டும்.

இப்போது சூப்பரான மீல் மேக்கர் கபாப் ரெடி!!!