கேரளா ஸ்பெஷல் குலுக்கி சர்பத்

கேரளாவில் கோழிக்கோடு, எர்ணாக்குளம், கொச்சி போன்ற பகுதிகளில் கிடைக்கும் ஓர் பிரபலமான ஜூஸ். இந்த பானம் கோடைக்காலத்திற்கு ஏற்ற ஓர் அற்புத பானம். உங்களுக்கு இந்த குலுக்கி சர்பத் எப்படி செய்வதென்று தெரிந்து கொள்ள வேண்டுமா?

இங்கு குலுக்கி சர்பத் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் பகிர்ந்து கொள்ளுங்கள்.

தேவையான பொருட்கள்:

சப்ஜா விதை - 2 டீஸ்பூன்
எலுமிச்சை - 2 (சாறு எடுத்துக் கொள்ளவும்)
இஞ்சி ஜூஸ் - 1 டீஸ்பூன்
பச்சை மிளகாய் - 1/4 டீஸ்பூன் (நறுக்கியது)
சோடா - 2 கப்
சர்க்கரை - தேவையான அளவு
ஐஸ் கட்டிகள் - சிறிது

செய்முறை:

முதலில் சப்ஜா விதையை சிறிது நீரில் 10 நிமிடம் ஊற வைத்து, நீரை வடிகட்டி விட்டு சப்ஜா விதைகளை தனியாக வைத்துக் கொள்ளவும்.

பின்னர் ஒரு ஷேக்கரில் ஊற வைத்த சப்ஜா விதைகள், எலுமிச்சை சாறு, இஞ்சி சாறு, பச்சை மிளகாய், சோடா, சர்க்கரை சேர்த்து 20 நொடிகள் நன்கு குலுக்கி, பின் அதில் ஐஸ் கட்டிகளை சேர்த்து பரிமாறினால், குலுக்கி சர்பத் ரெடி!!!