கொத்தமல்லி மற்றும் எலுமிச்சை சூப் ரெசிபி

குளிர்காலத்தில் பெரும்பாலான வீடுகளில் மாலை வேளையில் சூப் செய்து குடிக்கும் பழக்கம் இருக்கும். அந்த சூப் ரெசிபியில் நிறைய உள்ளன. மேலும் சூப் ரெசிபிக்கள் அனைத்தும் 20 நிமிடங்களிலேயே செய்யக்கூடியவைகளாக இருக்கும். அந்த வகையில் இங்கு ஒரு அருமையான சூப் ரெசிபி கொடுக்கப்பட்டுள்ளது.

அது தான் கொத்தமல்லி எலுமிச்சை சூப் ரெசிபி. இந்த ரெசிபியானது உடல் எடையை குறைக்க நினைப்போருக்கு மிகவும் ஏற்றது. சரி, இப்போது அந்த சூப் ரெசிபியைப் பார்ப்போமா!!!

தேவையான பொருட்கள்:

கொத்தமல்லி - 2 டேபிள் ஸ்பூன்
வெங்காயம் - 1 (நறுக்கியது)
வெங்காயத் தாள் - 1 (நறுக்கியது)
இஞ்சி - 1 இன்ச் (தட்டியது)
பூண்டு - 1 பல் (தட்டியது)
எலுமிச்சை சாறு - 2 டேபிள் ஸ்பூன்
வெஜிடேபிள் ஸ்டாக் - 4 கப்
மிளகு தூள் - 1 டீஸ்பூன்
உப்பு - தேவையான அளவு
வெண்ணெய் - 1 டீஸ்பூன்

செய்முறை:

* முதலில் ஒரு வாணலியை அடுப்பில் வைத்து, அதில் வெண்ணெய் சேர்த்து உருகியதும், தீயை குறைவில் வைத்து, வெங்காயம், இஞ்சி, பூண்டு, வெங்காயத் தாள் சேர்த்து பொன்னிறமாக வதக்க வேண்டும்.

* பின் அதில் வெஜிடேபிள் ஸ்டாக் ஊற்றி நன்கு கொதிக்க விட வேண்டும்.

* பின்பு கொத்தமல்லி, எலுமிச்சை சாறு, உப்பு, மிளகு தூள் சேர்த்து கிளறி, சூப்பானது சற்று கெட்டியானதும், அடுப்பில் இருந்து இறக்கினால், சூப்பரான கொத்தமல்லி எலுமிச்சை சூப் ரெடி!!!