புடலங்காய் வாங்குனா அதனுடன் பால் சேர்த்து நெல்லை ஸ்டைலில் பால் கூட்டு செய்யுங்க - அட்டகாசமா இருக்கும்

Add as a preferred source on Google

Pudalangai Paal Kootu Recipe in Tamil: உங்கள் வீட்டில் புடலங்காய் செய்தாலே, யாரும் சாப்பிடமாட்டார்களா? அப்படிப்பட்டவர்களை புடலங்காயை ரசித்து சாப்பிட வைக்க வேண்டுமா? அப்படியானால் அந்த புடலங்காயுடன் பாலை சேர்த்து திருநெல்வேலி ஸ்டைலில் கூட்டு செய்யுங்கள். இந்த புடலங்காய் பால் கூட்டு நீங்கள் வழக்கமாக சாப்பிடும் கூட்டு போல இருக்காது.. இப்படி செய்யும் போது பிடிக்காதவர்கள் கூட கேட்டு வாங்கி சாப்பிடுவார்கள். அதுவும் இதை சாதத்திற்கு சைடு டிஷ்ஷாக மட்டுமின்றி, தோசை, சப்பாத்தியுடனும் சேர்த்து சாப்பிடலாம்.

பொதுவாக கூட்டு என்பது காய்கறியுடன்பாசிப்பருப்பு சேர்த்துதான் செய்வார்கள், ஆனால் இந்த ஸ்டைல் புடலங்காய் கூட்டில் பால் சேர்த்து செய்யப்படுவதால் இதன் சுவை மிகவும் வித்தியாசமானதாக இருக்கும். இந்த கூட்டு சுவையாக இருப்பது மட்டுமினி செய்வதற்கும் மிகவும் எளிதானதாகும். இந்த கூட்டு தென்மாவட்ட கல்யாண விருந்துகளில் மிகவும் பிரபலமானதாகும்.

உங்களுக்கு நெல்லை ஸ்டைல் புடலங்காய் பால் கூட்டு எப்படி செய்வதென்று தெரிந்து கொள்ள வேண்டுமா? கீழே நெல்லை புடலங்காய் பால் கூட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- அரை கிலோ புடலங்காய்
- கால் லிட்டர் பால்
- 1 கப் துருவிய தேங்காய்
- 1 ஸ்பூன் சீரகம்
- 1 ஸ்பூன் அரிசி மாவு
- 2 வர மிளகாய்
- தேவையான அளவு உப்பு

தாளிக்க:

- 2 ஸ்பூன் எண்ணெய்
- 1 ஸ்பூன் கடுகு
- 1 ஸ்பூன் உளுத்தம் பருப்பு
- 1 சிட்டிகை பெருங்காயம்
- சிறிது கறிவேப்பிலை

செய்முறை:

- புடலங்காயை நன்றாகக் கழுவி, சிறு துண்டுகளாக நறுக்கிக் கொள்ளவும்.

- நறுக்கிய புடலங்காயுடன் மஞ்சள் தூள் மற்றும் உப்பு சேர்க்கவும். இதனை ஒரு பிரஷர் குக்கரில் போட்டு, இரண்டு விசில் வரும் வரை வேகவைக்கவும்.

- புடலங்காய் மென்மையாகவும், அதே சமயம் குழைந்து போகாமலும் இருக்க இரண்டு விசில் போதுமானது.

- ஒரு மிக்ஸி ஜாரில் துருவிய தேங்காய், சீரகம் மற்றும் வர மிளகாய் ஆகியவற்றை சேர்த்து சிறிதளவு தண்ணீர் சேர்த்து அனைத்தையும் மென்மையான விழுதாக அரைத்துக்கொள்ளவும்.

- ஒரு பாத்திரத்தில் பால் எடுத்துக்கொள்ளவும். அதில் அரிசி மாவைச் சேர்த்து, கட்டிகள் ஏதும் இல்லாதவாறு நன்றாகக் கலக்கவும்.

- அந்தப் பாலுடன், அரைத்து வைத்துள்ள தேங்காய்-மசாலா விழுதைச் சேர்த்து நன்றாகக் கலக்கவும்.

- இப்போது, ​​வேகவைத்த புடலங்காயை இந்த கலவையுடன் சேர்க்கவும். தேவையான அளவு உப்பு சேர்த்து நன்கு கிளறவும்.

- தேவையான அளவு தண்ணீர் சேர்த்து கொதிக்க விடவும். கூட்டு கொதிக்க தொடங்கியதும் அடுப்பை அணைத்து விடவும்.

- ஒரு வாணலியில் எண்ணெய் ஊற்றிச் சூடாக்கவும். கடுகு சேர்த்து, அது வெடிக்கத் தொடங்கியதும், உளுத்தம் பருப்பைச் சேர்த்து லேசான பழுப்பு நிறமாகும் வரை வதக்கவும்.

- அதன் பிறகு, பெருங்காயம் மற்றும் கறிவேப்பிலை சேர்த்து ஒருமுறை கிளறவும். இந்த தாளிப்பை பால் கூட்டில் சேர்த்து அடுப்பை கிளறினால் சுவையான புடலங்காய் பால் கூட்டு தயார்!