முட்டையை வைச்சு இந்த மாதிரி மசாலா கீமா பண்ணுங்க - தோசை, சப்பாத்திக்கு அட்டகாசமா இருக்கும்

Muttai Masala Keema Recipe in Tamil: சாதம், சப்பாத்தி, மற்றும் தோசைன்னு எல்லாத்துக்கும் பண்ணுற ஒரு குழம்புன்னா அது முட்டை குழம்பு தான். இது எல்லாருக்கும் பிடிச்ச ஒண்ணு. பெரும்பாலும் முட்டை குழம்புன்னா முட்டையை குழம்பு உடைத்து விட்டு வேக வைப்போம். இல்லனா வேக வைத்த முட்டையை சேர்த்து கிரேவி செய்வோம். ஆனால் எவ்வளவு நாள்தான் ஒரே மாதிரி முட்டையை செய்றது. முட்டையை ஒரு தடவை இந்த மாதிரி மசாலா கீமா செஞ்சு பாருங்க. இந்த சைடிஷோட டேஸ்ட் வேற லெவலில் இருக்கும்.

கீமா என்றால் சிக்கன், மட்டனில்தான் செய்ய வேண்டுமென்ற அவசியமில்லை. பாவ்பாஜி மசாலா, பட்டர் சேர்த்து தயாரிக்கப்படும் இந்த முட்டைக் கீமா தோசை, சப்பாத்தி மற்றும் பூரி என அனைத்துடனும் சேர்த்து சாப்பிடுவதற்கும் அருமையாக இருக்கும். இந்த முட்டை கீமா செய்வதற்கு எளிதாக இருப்பதுடன் வித்தியாசமான சுவையுடன் இருக்கும். சமைக்கத் தெரியாத பேச்சுலர்கள் கூட இந்த கீமாவை 15 நிமிடத்தில் செய்து விடலாம்.

உங்களுக்கு அட்டகாசமான முட்டை கீமாவை எப்படி செய்வதென்று தெரிந்து கொள்ள வேண்டுமா? கீழே முட்டை மசாலா கீமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 4 பெரிய வேகவைத்த முட்டைகள்
- 1 பெரிய தக்காளி, பொடியாக நறுக்கியது
- 1 பெரிய வெங்காயம், பொடியாக நறுக்கியது
- 1 பச்சை மிளகாய்
- 1 ஸ்பூன் இஞ்சி-பூண்டு விழுது
- 1ஸ்பூன் பட்டர்
- ¼ ஸ்பூன் மிளகாய் தூள்
- ¼ ஸ்பூன் மல்லித் தூள்
- ¼ ஸ்பூன் சீரகத் தூள்
- ½ ஸ்பூன் பாவ் பாஜி மசாலா
- ஒரு சிட்டிகை மஞ்சள் தூள்
- ¼ ஸ்பூன் கரம் மசாலா தூள்
- 2 ஸ்பூன் கொத்தமல்லி இலைகள், பொடியாக நறுக்கியது

செய்முறை:

- முட்டைகளை வேகவைத்து தோல் உரித்து கேரட் போல துருவி வைத்துக் கொள்ளவும்.

- ஒரு கடாயில் 1 ஸ்பூன் வெண்ணெயைச் சூடாக்கவும். வெண்ணெய் உருகியதும் பொடியாக நறுக்கிய வெங்காயத்தைச் சேர்த்து, அது பொன்னிறமாக மாறும் வரை வதக்கவும். வெங்காயம் விரைவாக வதங்கச் சிறிது உப்பு சேர்த்துக்கொள்ளலாம்.

- பின்னர் இஞ்சி-பூண்டு விழுது சேர்த்து, அதன் பச்சை வாசனை போகும் வரை வதக்கவும்.

- அதன்பின் பொடியாக நறுக்கிய தக்காளியைச் சேர்த்து, அவை மென்மையாகும் வரை மிதமான தீயில் 10 நிமிடங்கள் சமைக்கவும்.

- பின்னர் சீரகப் பொடி, மல்லித் தூள், பாவ் பாஜி மசாலா, மிளகாய்த் தூள், மஞ்சள் தூள் மற்றும் நறுக்கிய பச்சை மிளகாய் ஆகியவற்றைச் சேர்க்கவும். உப்பின் அளவையும் சரிசெய்யவும்.

- இந்தக் கலவை நன்கு கலந்து, ஈரப்பதம் வற்றும் வரை சுமார் 5 நிமிடங்கள் சமைக்கவும்.

- பின்னர் ¼ கப் தண்ணீர் சேர்க்கவும். நன்கு கலந்து, மசாலாப் பொருட்களின் பச்சை வாசனை போகும் வரை வதக்கவும்.

- அதன்பின் துருவிய முட்டைகளைக் கலவையில் சேர்த்து மெதுவாகக் கலக்கவும். இதை 2 நிமிடங்கள் வேகவிட்டு, கரம் மசாலாவைத் தூவி நன்கு கலக்கவும்.

- மசாலா முட்டையுடன் நன்றாக கலந்ததும் நறுக்கிய கொத்தமல்லியைச் சேர்த்து, சாதம், சப்பாத்தி அல்லது தோசையுடன் பரிமாறவும்.