2 கைப்பிடி முருங்கைக்கீரை இருந்தா.. காலையில் இப்படி சட்னி செய்யுங்க.. ருசியானதும், சத்தானதும் கூட..

Murungai Keerai Chutney Recipe In Tamil: கீரையை உணவில் அதிகம் சேர்ப்பது நல்லது என்பதை அறிவோம். அதுவும் விலைக்குறைவில் எளிதில் கிடைக்கக்கூடிய ஒரு கீரை தான் முருங்கைக்கீரை. இதுவரை நீங்கள் முருங்கைக்கீரையை பொரியல், சாம்பார், கூட்டு என்று செய்து சாப்பிட்டிருப்பீர்கள். ஆனால் முருங்கைக்கீரையைக் கொண்டு அட்டகாசமான சுவையில் சட்னி செய்யலாம் தெரியுமா?

இப்படி செய்யும் சட்னி இட்லி, தோசையுடன் சேர்த்து சாப்பிட பிரமாதமாக இருக்கும். உங்கள் பிள்ளைகளின் உடலில் இரும்புச்சத்து குறைவாக இருந்தால், அவர்களுக்கு இந்த முருங்கைக்கீரையை அடிக்கடி கொடுத்து வர, இரும்புச்சத்து அதிகரிக்கும். அதுவும் முருங்கைக்கீரையை சாப்பிட மறுக்கும் உங்கள் பிள்ளைகளுக்கு, அதைக் கொண்டு சட்னி செய்து கொடுக்கும் போது, கேட்டு விரும்பி சாப்பிடுவார்கள்.

உங்களுக்கு முருங்கைக்கீரை சட்னியை எப்படி செய்வதென்று தெரிந்து கொள்ள வேண்டுமா? கீழே முருங்கைக்கீரை சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டீஸ்பூன்
* கடலைப் பருப்பு - 1 டேபிள் ஸ்பூன்
* உளுத்தம் பருப்பு - 1 டேபிள் ஸ்பூன்
* சீரகம் - 1/4 டீஸ்பூன்
* மிளகு - 1/4 டீஸ்பூன்
* வெங்காயம் - 1 (நறுக்கியது)
* பச்சை மிளகாய் - 2
* வரமிளகாய் - 2
* புளி - சிறிய துண்டு
* துருவிய தேங்காய் - 2 டேபிள் ஸ்பூன்
* உப்பு - சுவைக்கேற்ப
* தண்ணீர் - தேவையான அளவு

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* வரமிளகாய் - 1
* கறிவேப்பிலை - 1 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடலைப் பருப்பு, உளுத்தம் பருப்பு சேர்த்து லேசாக நிறம் மாற வறுக்க வேண்டும்.
* பின் அதில் சீரகம், மிளகு சேர்த்து வறுத்து, வெங்காயம், பச்சை மிளகாய், வரமிளகாய் மற்றும் புளி சேர்த்து நன்கு வதக்க வேண்டும்.
* பின்னர் அதில் 2 கைப்பிடி முருங்கைக்கீரையை சேர்த்து 7 நிமிடம் நன்கு கீரை வேகும் வரை வதக்கி இறக்கி குளிர வைக்க வேண்டும்.
* அடுத்து மிக்சர் ஜாரில் வதக்கிய பொருட்களை சேர்த்து, அத்துடன் 2 டேபிள் ஸ்பூன் துருவிய தேங்காய், சுவைக்கேற்ப உப்பு சேர்த்து ஒருமுறை அரைத்துக் கொள்ள வேண்டும்.
* பின்பு அதில் சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பிறகு ஒரு கிண்ணத்தில் அரைத்த சட்னியை எடுத்துக் கொண்டு, சிறிது நீரை ஊற்றி கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு 1 டேபிள் ஸ்பூன் எண்ணெய் ஊற்றி சூடானதும், 1/2 டீஸ்பூன் கடுகு, 1/2 டீஸ்பூன் உளுத்தம் பருப்பு, 1 வரமிளகாய் மற்றும் 1 கொத்து கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான முருங்கைக்கீரை சட்னி தயார்.