புதினா சட்னி செய்யும் போது இந்த 1 பொருளை சேர்த்துக்கோங்க.. ருசி தூக்கலா செமயா இருக்கும்...

Pudina Chutney Recipe In Tamil: உங்கள் வீட்டில் இட்லி, தோசைக்கு பெரும்பாலும் சட்னியை தான் செய்வீர்களா? அதுவும் நீங்கள் அடிக்கடி புதினா சட்னியை செய்வீர்களா? எப்போதும் ஒரே சுவையில் தான் புதினா சட்னியை செய்வீர்களா? அப்படியானால் ஒருமுறை சற்று வித்தியாசமான சுவையில் புதினா சட்னியை செய்யுங்கள்.

அதுவும் புதினா சட்னியை அரைக்கும் போது ஒரே ஒரு பொருளை மட்டும் கூடுதலாக சேர்த்துக் கொள்ளுங்கள். இதனால் சுவை இன்னும் பிரமாதமாக இருக்கும். அது வேறொன்றும் இல்லை, நெல்லிக்காய் தான். இப்படி நெல்லிக்காயை சேர்க்கும் போது, அந்த சட்னி சத்தானதாக இருக்கும்.

உங்களுக்கு புதினா சட்னியை எப்படி செய்வதென்று தெரிந்து கொள்ள வேண்டுமா? கீழே புதினா சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து

தேவையான பொருட்கள்:

* எண்ணெய் - 1 டீஸ்பூன் + 1 டீஸ்பூன்
* கடலைப் பருப்பு - 1 டேபிள் ஸ்பூன்
* உளுத்தம் பருப்பு - 1 டேபிள் ஸ்பூன்
* வரமிளகாய் - 4
* சின்ன வெங்காயம் - 10
* பூண்டு - 5 பல்
* இஞ்சி - 1 இன்ச்
* பச்சை மிளகாய் - 2
* பெரிய நெல்லிக்காய் - 2 (நறுக்கியது)
* புளி - சிறிய துண்டு
* புதினா - 1 கைப்பிடி
* துருவிய தேங்காய் - 1/2 கப்
* மஞ்சள் தூள் - 1/4 டீஸ்பூன்
* உப்பு - சுவைக்கேற்ப

தாளிப்பதற்கு...

* நல்லெண்ணெய் - 1 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* பெருங்காயத் தூள் - 1/4 டீஸ்பூன்
* கறிவேப்பிலை - 1 கொத்து
* வரமிளகாய் - 1

செய்முறை:

* முதலில் ஒரு வாணலியை அடுப்பில் வைத்து, அதில் 1 டீஸ்பூன் எண்ணெய் ஊற்றி, அத்துடன் கடலைப் பருப்பு உளுத்தம் பருப்பு சேர்த்து பொன்னிறமாக வறுக்க வேண்டும்.
* அதன் பின் அதில் வரமிளகாய் சேர்த்து வறுத்து இறக்கி, ஒரு தட்டில் போட்டுக் குளிர வைக்க வேண்டும்.
* பின் அதே வாணலியை அடுப்பில் வைத்து, அதில் 1 டீஸ்பூன் எண்ணெய் ஊற்றி சூடானதும், நறுக்கிய சின்ன வெங்காயம், பூண்டு மற்றும் இஞ்சியை சேர்த்து, நன்க கண்ணாடி பதத்திற்கு வெங்காயம் வரும் வரை வதக்க வேண்டும்.
* பின்பு அதில் பச்சை மிளகாய் சேர்த்து வதக்கி, நறுக்கிய நெல்லிக்காயை சேர்த்து சிறிது நேரம் வதக்க வேண்டும்.
* பிறகு அதில் புளி மற்றும் புதினாவை சேர்த்து நன்கு வதக்கி இறக்க வேண்டும்.
* அடுத்து அதில் துருவிய தேங்காயை சேர்த்து, அத்துடன் மஞ்சள் தூள் மற்றும் சுவைக்கேற்ப உப்பு சேர்த்து கிளறி, குளிர வைக்க வேண்டும்.
* பின்னர் மிக்சர் ஜாரில் வறுத்த பொருட்களை மற்றும் வதக்கிய வெங்காயம், தக்காளியையும் சேர்த்து, சிறிது நீரை ஊற்றி நன்கு அரைத்து, ஒரு கிண்ணத்தில் போட்டுக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு நல்லெண்ணெய் ஊற்றி சூடானதும், கடுகு, உளுத்தம் பருப்பு, பெருங்காயத் தூள், கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்தால் சுவையான புதினா சட்னி தயார்.