வீட்ல பிரெட் இருக்கா? அப்ப இந்த காரசாரமான மசாலா பிரெட் செய்யுங்க... டேஸ்ட் அட்டகாசமா இருக்கும்...!

Masala Bread Recipe in Tamil: மாலை நேர ஸ்னாக் என்றாலே பொதுவாக பஜ்ஜி, வடை என்றுதான் நாம் சாப்பிடுவோம், ஆனால் அதே ஸ்னாக்ஸை தினமும் சாப்பிட முடியாதல்லவா. எனவே புதுப்புது ஸ்னாக்ஸை செய்வது வீட்டிலுள்ள அனைவருக்கும் மிகவும் பயனுள்ளதாக இருக்கும். புதிய ஸ்னாக்ஸ் என்றால் மிகவும் கடினமானதாகவோ அல்லது காஸ்ட்லியானதாகவோ இருக்க வேண்டுமென்று அவசியமில்லை.

நம் வீட்டில் இருக்கும் சாதாரண பிரெட்டை வைத்தே மாலை நேரத்திற்கான சூப்பரான ஸ்னாக்ஸை செய்யலாம். இந்த காரசாரமான பிரெட் மசாலா மாலை நேரத்தில் டீ, காபியுடன் சேர்த்து சாப்பிட அருமையாக இருக்கும். இந்த பதிவில் சுவையான பிரெட் மசாலாவை எப்படி செய்யலாம் என்று தெரிந்து கொள்ளலாம்.

தேவையானப் பொருட்கள்:

- 8 பிரெட்
- 2 ஸ்பூன் எண்ணெய்(வெண்ணெயாக இருந்தால் நல்லது)
- 1 ஸ்பூன் சீரகம்
- 1 பெரிய வெங்காயம்
- 2 பச்சை மிளகாய்
- 1 ஸ்பூன் இஞ்சி பூண்டு விழுது
- 1 பெரிய தக்காளி
- 1 ஸ்பூன் பாவ் பாஜி மசாலா
- அரை ஸ்பூன் கரம் மசாலா
- 1 ஸ்பூன் மிளகாய்த்தூள்
- சிறிதளவு கசூரி மேத்தி
- உப்பு தேவையான அளவு
- தண்ணீர் தேவையான அளவு
- சிறிதளவு கொத்தமல்லி
- 1 ஸ்பூன் சாட் மசாலா
- அலங்கரிக்க நறுக்கிய வெங்காயம் சிறிதளவு

செய்முறை:

- பிரெட் துண்டுகளை க்யூப்ஸாக வெட்டி தனியாக வைக்கவும். வெங்காயம் மற்றும் தக்காளியை நன்றாக நறுக்கவும். அலங்கரிக்க சிறிது வெங்காயத்தை ஒதுக்கி வைக்கவும்.

- ஒரு கடாயில் எண்ணெய் ஊற்றி சூடாக்கி, சீரகத்தை சேர்த்து 30 வினாடிகள் வதக்கவும். வெங்காயம் மற்றும் மிளகாய் சேர்த்து, பொன்னிறமாகும் வரை வதக்கவும்.

- இஞ்சி பூண்டு விழுது சேர்த்து, பச்சை வாசனை போகும் வரை ஒரு நிமிடம் வதக்கவும். தக்காளி, உப்பு, கரம் மசாலா, பாவ் பாஜி மசாலா மற்றும் மிளகாய் தூள் சேர்த்து கிளறவும்.

- தக்காளி நன்கு வதங்கி மசாலா பச்சை வாசனை போகும் வரை வதக்கவும். 3 டேபிள்ஸ்பூன் தண்ணீர் ஊற்றி மசாலா கெட்டியாகும் வரை சமைக்கவும். கசூரி மேத்தியை உள்ளங்கையில் நசுக்கி அதில் சேர்க்கவும்.

- சுவையை ருசி பார்த்து, உங்கள் ருசிக்கேற்ப உப்பு அல்லது மசாலாவை சரிசெய்யவும். பின்னர் பிரெட்டை இந்த கலவையில் சேர்த்து கிளறி, மசாலாவுடன் நன்கு ஒட்டும்படி கிளறவும். கொத்தமல்லி இலைகளால் அலங்கரிக்கவும், சாட் மசாலா மற்றும் நறுக்கிய வெங்காயத்தைத் தூவவும்.

- காரசாரமான பிரெட் மசாலா ரெடி!