சப்பாத்திக்கு அட்டகாசமாக இருக்கும்.... மதுரை ஸ்டைல் காளான் சால்னா

Madurai Style Mushroom Salna Recipe In Tamil: இன்று இரவு உங்கள் வீட்டில் சப்பாத்தி செய்யப் போகிறீர்களா? அதற்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? உங்கள் வீட்டில் உள்ளோர் காளானை விரும்பி சாப்பிடுவார்களா?

அப்படியானால் அந்த காளானைக் கொண்டு மதுரை ஸ்டைலில் காளான் சால்னாவை செய்யுங்கள். இந்த காளான் சால்னா சப்பாத்தியுடன் சாப்பிட அட்டகாசமாக இருக்கும். மேலும் இது செய்வதற்கு சுலபமாகவும் இருக்கும்.

உங்களுக்கு மதுரை ஸ்டைல் காளான் சால்னாவை எப்படி செய்வதென்று தெரிந்து கொள்ள வேண்டுமா? கீழே மதுரை ஸ்டைல் காளான் சால்னா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

மசாலாவிற்கு...

* துருவிய தேங்காய் - 1/4 கப்
* முந்திரி - 10
* பொட்டுக்கடலை - 1 டேபிள் ஸ்பூன்
* கசகசா - 1 டேபிள் ஸ்பூன்
* பச்சை மிளகாய் - 2
* சோம்பு - 1/2 டீஸ்பூன்
* சீரகம் - 1/2 டீஸ்பூன்

சால்னாவிற்கு...

* நல்லெண்ணெய் - 2 டீஸ்பூன்
* பிரியாணி இலை - 2
* பட்டை - 1 இன்ச்
* ஏலக்காய் - 1
* கிராம்பு - 2
* கறிவேப்பிலை - சிறிது
* வெங்காயம் - 2 (பொடியாக நறுக்கியது)
* உப்பு - 1 டீஸ்பூன்
* தக்காளி - 4 (நறுக்கியது)
* மல்லித் தூள் - 1 டீஸ்பூன்
* மிளகாய் தூள் - 1/2 டீஸ்பூன்
* காளான் - 200 கிராம்
* கொத்தமல்லி - சிறிது

செய்முறை:

* முதலில் காளானை நன்கு கழுவி துண்டுகளாக்கிக் கொள்ள வேண்டும்.
* பின்பு மிக்சர் ஜாரில் தேங்காய், முந்திரி, பொட்டுக்கடலை, கசகசா, பச்சை மிளகாய், சோம்பு, சீரகம் ஆகியவற்றை சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்னர் ஒரு குக்கரை அடுப்பில் வைத்து, அதில் எண்ணெய் ஊற்றி சூடானதும், பிரியாணி இலை, பட்டை, ஏலக்காய், கிராம்பு, கறிவேப்பிலை சேர்த்து தாளிக்க வேண்டும்.
* பின்பு அதில் வெங்காயத்தைப் போட்டு, உப்பு சேர்த்து நன்கு நிறம் மாறும் வரை வதக்க வேண்டும்.
* பின் அதில் தக்காளியை சேர்த்து நன்கு கிளறி விட வேண்டும்.
* அடுத்து மல்லித் தூள் மற்றும் மிளகாய் தூள் சேர்த்து கிளறி, 5 நிமிடம் வேக வைக்க வேண்டும்.
* பிறகு காளானை சேர்த்து நன்கு கிளறி, அரைத்த மசாலாவை சேர்த்து ஒரு நிமிடம் வதக்கி, 2 கப் நீரை ஊற்றி கிளறி, குக்கரை மூடி மிதமான தீயில் வைத்து 5 விசில் விட்டு இறக்க வேண்டும்.
* விசில் போனதும் குக்கரைத் திறந்து, கொத்தமல்லியைத் தூவினால், சுவையான மதுரை ஸ்டைல் காளான் சால்னா தயார்.

Image Courtesy: kannammacooks