இட்லி, தோசைக்கு சத்தான, டேஸ்டான சட்னி வேணுமா? அப்ப இந்த சட்னியை ட்ரை பண்ணுங்க... சூப்பரா இருக்கும்...!

Kovakkai Chutney Recipe in Tamil: எப்போதும் டிபன் வகைகளுக்கு என்ன சட்னி செய்யலாம் என்பது நமது அன்றாட கவலைகளில் ஒன்று. என்ன தான் செய்தாலும், தக்காளி சட்னி, வெங்காய சட்னி, பூண்டு சட்னி, தேங்காய் சட்னி மற்றும் சாம்பார் செய்வோம்.

என்னதான் மாற்றி செய்தாலும் இதில் சில பொருட்களை கூட்டி குறைத்து சுவையை மாற்ற முயற்சிப்போம். ஆனால் காய் வகைகளை வைத்து சட்னி செய்ய என்றாவது யோசித்திருக்கிறீர்களா? ஆம் இன்று காய் வகைகளில் ஒன்றான கோவைக்காயை வைத்து எப்படி சட்னி செய்வது என பார்க்கலாம் வாங்க.

தேவையான பொருட்கள்:

- கோவைக்காய் - ¼ கிலோ,
- பெரிய வெங்காயம் - 3
- பூண்டு - 6 பல்
- காய்ந்த மிளகாய் -4
- பச்சை மிளகாய் - 3
- கொத்தமல்லி விதைகள் - 1 டேபிள் ஸ்பூன்
- வெந்தயம் - 1 டேபிள் ஸ்பூன்
- புளி - சிறிதளவு (எலுமிச்சை அளவு)
- உப்பு - தேவையான அளவு

தாளிக்க:

- எண்ணெய் - தேவையான அளவு
- கடுகு - ¼ டீ ஸ்பூன்
- சீரகம் - ¼ டீ ஸ்பூன்
- கடலை பருப்பு - ¼ டீ ஸ்பூன்
- உளுந்தம் பருப்பு - ¼ டீ ஸ்பூன்
- பெருங்காயம் - ஒரு சிட்டிகை
- கருவேப்பிலை - சிறிதளவு

செய்முறை:

- வெங்காயம் மற்றும் பூண்டை தோல் உரித்து சுத்தம் செய்து கொள்ளவும்.

- வெங்காயத்தின் மேற்பரப்பில் கருப்பு நிற பூஞ்சை இருந்தால் கழுவி சுத்தம் செய்து கொள்ளவும்.

- வெங்காயத்தை நீளவாக்கில் துண்டுகளாக நறுக்கி வைத்து கொள்ளவும்.

- கோவைக்காயை தண்ணீரில் சேர்த்து மண் இல்லாமல் சுத்தமாக அலசி கொள்ளவும்.

- பின் அதன் முனை பகுதி இரண்டையும் நீக்கி விட்டு நீளவாக்கில் நறுக்கி கொள்ளவும்.

- வாணலியை அடுப்பில் வைத்து சூடானதும் எண்ணெய் சேர்க்கவும்.

- எண்ணெய் காய்ந்ததும் நறுக்கிய கோவைக்காயை சேர்த்து நன்கு வதக்கவும்.

- பின் நறுக்கி வைத்த வெங்காயம் மற்றும் தோல் உரித்து வைத்த பூண்டு சேர்த்து வதக்கவும்.

- அதனுடன் வெந்தயம், கொத்தமல்லி விதைகள், வரமிளகாய் மற்றும் பச்சை மிளகாய் சேர்த்து வறுக்கவும்.

- கடைசியாக புளியை சேர்த்து கிளறி அடுப்பை அணைத்து ஆற விடவும்.

- ஆறிய பொருட்களை மிக்ஸி ஜாரில் சேர்த்து கொள்ளவும்.

- பின் தேவையான அளவு உப்பு மற்றும் தண்ணீர் சேர்த்து அரைத்து வேறு பாத்திரத்திற்கு மாற்றி கொள்ளவும்.

- வாணலியை அடுப்பில் வைத்து சூடானதும் எண்ணெய் சேர்க்கவும்.

- எண்ணெய் காய்ந்ததும் கடுகு சேர்த்து பொரிய விடவும்.

- அதனுடன் கருவேப்பிலை மற்றும் சீரகம் சேர்த்து தாளித்து கொள்ளவும்.

- பின் கடலைப்பருப்பு மற்றும் உளுந்தம் பருப்பு சேர்த்து பொன்னிறமாக வறுத்து கொள்ளவும்.

- கடைசியாக பெருங்காயம் சேர்த்து கிளறி அடுப்பை அணைத்து விடவும்.

- இந்த தாளிப்பை சட்னி உடன் சேர்த்து கிளறினால் உடலிற்கு ஆரோக்கியமான கோவைக்காய் சட்னி ரெடி!

- இது இட்லி, தோசை என டிபன் வகைகளுக்கும் சாதத்துடன் சேர்த்து சாப்பிடவும் சுவையாக இருக்கும்.