கர்நாடகா ஸ்டைல் தக்காளி சட்னி ரெசிபி... இட்லி, தோசைக்கு இது மாதிரி பெஸ்ட் சைடிஷ் எதுவும் இல்ல...!

Karnataka Style Thakkali Chutney Recipe in Tamil: இன்று இரவு அல்லது நாளை காலை உங்கள் வீட்டில் இட்லி அல்லது தோசை செய்யப் போகிறீர்களா? எப்போதும் இட்லி தோசைக்கு தேங்காய் சட்னி, கார சட்னி, தக்காளி சட்னி என்று செய்து போரடித்துவிட்டதா? சற்று வித்தியாசமான சுவையில் ஏதாவது சட்னியை செய்ய நினைக்கிறீர்களா? உங்கள் வீட்டில் தக்காளியும், வெங்காயமும் உள்ளதா? அப்படி இருந்தால் சூப்பரான கர்நாடகா ஸ்டைல் கார சட்னியை செய்து விடலாம்.

இதுவரை நீங்கள் வழக்கமான கார சட்னியைத்தான் இட்லி, தோசைக்கு செய்திருப்பீர்கள். ஆனால் இந்த கர்நாடகா ஸ்டைல் கார சட்னி வழக்கமான கார சட்னி போல அல்லாமல் கொஞ்சம் வித்தியாசமான சுவையில் இருக்கும். இந்த தக்காளி கார சட்னி கர்நாடகாவில் மிகவும் பிரபலமானது. இந்த சட்னி சுவையானதாக இருப்பதோடு இதை செய்வதும் மிகவும் எளிதானது.

உங்களுக்கு கர்நாடகா ஸ்டைல் தக்காளி கார சட்னியை எப்படி செய்வதென்று தெரிந்து கொள்ள வேண்டுமா? கீழே தக்காளி கார சட்னியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 3 பெரிய தக்காளி
- 1 பெரிய வெங்காயம்
- 3 பல் பூண்டு
- அரை ஸ்பூன் ரசப்பொடி
- அரை ஸ்பூன் மிளகாய் தூள்
- வெல்லம் சிறிதளவு
- உப்பு தேவையான அளவு

தாளிக்க:

- 1 ஸ்பூன் எண்ணெய்
- 1 வர மிளகாய்
- அரை ஸ்பூன் கடுகு
- 1 கொத்து கறிவேப்பிலை
- 1 சிட்டிகை மஞ்சள் தூள்
- 1 சிட்டிகை பெருங்காயம்

செய்முறை:

- ஒரு மிக்ஸி ஜாரில் நறுக்கிய தக்காளி, நறுக்கிய வெங்காயம் மற்றும் 3 பல் பூண்டு சேர்க்கவும்.

- பின்னர் அரை ஸ்பூன் ரசப் பொடி, சிறிதளவு வெல்லம், மிளகாய் தூள் மற்றும் தேவையான அளவு உப்பு சேர்க்கவும்.

- இதை நைஸாக அரைக்காமல் கொஞ்சம் கொரகொரப்பாக அரைத்துக் கொள்ளவும்.

- இதை ஒரு கிண்ணத்தில் மாற்றி வைத்துக் கொள்ளவும்.

- சட்னியை தாளிக்க ஒரு கடாயில் ஒரு ஸ்பூன் எண்ணெய் ஊற்றி கடுகு சேர்க்கவும்.

- கடுகு பொரிந்ததும் அதில் வர மிளகாயை சேர்க்கவும்.

- பின்னர் அதில் கறிவேப்பிலை, மஞ்சள் தூள் மற்றும் பெருங்காயத்தை சேர்த்து தாளிக்கவும்.

- பின்னர் அரைத்து வைத்த தக்காளியை இதில் கொட்டி நன்கு கிளறி விடவும்.

- இதை ஒரு மூடி போட்டு மிதமான தீயில் கொதிக்க விடவும்.

- உப்பு மற்றும் வெல்லத்தை சரி பார்த்து நன்கு சுண்டியவுடன் அடுப்பை அணைக்கவும்.

- இது இட்லி, தோசைக்கு மட்டுமின்றி சாதத்துடன் சேர்த்து சாப்பிடவும் அருமையாக இருக்கும்.