காரைக்குடி கார சட்னி ரெசிபி: இட்லி, தோசைக்கு இதைவிட சிறந்த சைடிஷ் எதுவும் கிடையாது... ட்ரை பண்ணி பாருங்க...!

Karaikudi Kara Chutney Recipe: கோடிக்கணக்கான மக்கள் வீட்டில் காலை மற்றும் இரவு உணவாக இருப்பது இட்லி மற்றும் தோசைதான். இட்லி, தோசைக்கு தேங்காய் சட்னி மற்றும் சாம்பார் சிறந்த காம்பினேஷனாக இருந்தாலும் தொடர்ந்து அதையே செய்வது மற்றும் சாப்பிடுவது நாளடைவில் சலிப்பை ஏற்படுத்தும். இதுபோன்ற சூழலில் நாம் புதிய சட்னிகளை நோக்கி செல்கிறோம்.

புதிய சட்னி என்றாலும் அதில் இரண்டு அல்லது மூன்று ஆப்ஷன்கள்தான் பொதுவாக உள்ளன. அந்த குறையைப் போக்குவதற்குதான் இந்த பதிவு. பொதுவாக சுவையான உணவுகள் என்றால் அனைவரின் நினைவிற்கும் முதலில் வருவது செட்டிநாடு உணவுகள்தான்.

செட்டிநாடு உணவுகள் எப்போதும் காரசாரமாக இருக்கும். எனவே இட்லி மற்றும் தோசைக்கு மிகவும் சுவையாக இருக்கும் காரமான காரைக்குடி சட்னியை எப்படி செய்யலாம் என்று இந்த பதிவில் தெரிந்து கொள்ளலாம்.

தேவையான பொருட்கள்:

- நல்லெண்ணெய், கடலை எண்ணெய் - 3 ஸ்பூன்
- நடுத்தர அளவிலான நறுக்கிய வெங்காயம் - 2
- நடுத்தர அளவிலான நறுக்கிய தக்காளி - 2
- பூண்டு - 6 பற்கள்
- காய்ந்த சிவப்பு மிளகாய் - 6
- சிறிய அளவு புளி
- வெல்லம் - 1 ஸ்பூன்
- உப்பு - தேவையான அளவு

தாளிக்க:

- நல்லெண்ணெய் - 1 ஸ்பூன்
- கடுகு - தேவையான அளவு
- உளுந்து - தேவையான் அளவு
- கடலைப்பருப்பு - தேவையான் அளவு
- கறிவேப்பிலை
- பெருங்காயம் - சிறிதளவு

செய்முறை:

- ஒரு குக்கரில் 3 ஸ்பூன் நல்லெண்ணெயை ஊற்றவும்.
- நறுக்கிய வெங்காயம், தக்காளி மற்றும் பூண்டைச் சேர்த்து வதக்கவும்.
- ஓரளவு வதங்கியதும் மிளகாய், புளி மற்றும் வெல்லம் சேர்க்கவும்.
- அனைத்தையும் 5 நிமிடங்கள் வதக்கவும்.
- அதன்பின் போதுமான அளவு தண்ணீர் சேர்த்து மூடி மிதமான தீயில் வேகவைக்கவும்.
- 3 விசில் வந்த பிறகு அடுப்பை அணைக்கவும்.
- விசில் அடங்கியதும் குக்கரை திறந்து உப்பு சேர்க்கவும்.
- அதன்பின் தண்ணீர் சேர்க்காமல் நன்கு விழுது போல அரைக்கவும்.
- அதன்பின் ஒரு பாத்திரத்தில் நல்லெண்ணெய் ஊற்றி அதில் கடுகு, கறிவேப்பிலை, உளுந்தம்பருப்பு, கடலைப்பருப்பு சேர்த்து தாளிக்கவும்.
- அதன்பின் சட்னியை இதில் கொட்டி சிறிது பெருங்காயம் சேர்த்து நன்கு கலக்கவும்.
- இது இட்லி, தோசை மற்றும் ஊத்தாப்பம் போன்றவற்றுக்கு அருமையான சைடிஷாக இருக்கும்.

காரைக்குடி என்றாலே அசைவ உணவுகள் மட்டுமல்ல, இதுபோன்ற சுவையான சட்டினிகளும்தான். வழக்கமான தேங்காய் சட்னிக்கு பதிலாக இதுபோன்ற சுவையான மற்றும் காரமான சட்னிகளை அரைத்து உங்கள் குடும்பத்தினரை அசத்துங்கள்.