தீபாவளிக்கு வழக்கமான முறுக்கு செய்யாம இந்த பச்சை மிளகாய் தயிர் முறுக்கை செஞ்சு பாருங்க - செமையா இருக்கும்

Diwali Special Thayir Murukku Recipe in Tamil: தீபாவளி பண்டிகை நெருங்கிக் கொண்டிருக்கிறது. அனைவரும் வீட்டில் தீபாவளிக்கு என்ன பலகாரங்களை செய்யலாம் என்று லிஸ்ட் போட தொடங்கியிருப்போம். உங்களின் இந்த வருட தீபாவளி பலகார லிஸ்ட்டில் முறுக்கு உள்ளதா? இதுவரை நீங்கள் முறுக்கு செய்ய பலவிதமான மாவை சேர்த்தோ அல்லது அரிசியை ஊற வைத்து அரைத்தோ முறுக்கு சுட்டிருப்பீர்கள்.

இந்த வருட தீபாவளிக்கு கொஞ்சம் வித்தியாசமான அதேசமயம் சுவையான முறுக்கு செய்ய ஆசைப்படுறீங்களா? அப்படியானால் தயிர் மற்றும் பச்சை மிளகாய் சேர்த்து ஒரு வித்தியாசமான முறுக்கை செய்யுங்கள். இப்படி ஒருமுறை முறுக்கு சுட்டால், இனிமேல் இந்த மாதிரி முறுக்கு சுடுவீர்கள். இந்த வருட உங்களின் தீபாவளியை கூடுதல் ஸ்பெஷலாக்க இந்த முறுக்கை செய்யுங்கள்.

உங்களுக்கு சுவையான தயிர் முறுக்கை எப்படி செய்வதென்று தெரிந்து கொள்ள வேண்டுமா? கீழே தீபாவளி ஸ்பெஷல் தயிர் முறுக்கு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 1 ½ கப் அரிசி மாவு
- ¼ கப் உளுந்து மாவு
- ¼ கப் தயிர்
- 2 ஸ்பூன் பச்சை மிளகாய் விழுது
- 1 ஸ்பூன் எள்
- 1 ஸ்பூன் நெய்
- தேவையான அளவு உப்பு
- பொரிப்பதற்குத் தேவையான எண்ணெய்

செய்முறை:

- முதலில் ஒரு மிக்ஸியில் 10-12 பச்சை மிளகாய்களை, தேவையான அளவு உப்பு சேர்த்துக் கொள்ளவும்.

- அதனுடன் 2-3 மேஜைக்கரண்டி தண்ணீர் சேர்த்து, விழுதாக அரைத்து எடுத்து வைத்துக்கொள்ளவும்.

- அதன் பிறகு, ஒரு பாத்திரத்தில் அரிசி மாவு, உளுந்து மாவு, எள், அரைத்து வைத்த மிளகாய் விழுது, புளிக்காத தயிர் மற்றும் நெய் ஆகியவற்றைச் சேர்க்கவும்.

- நன்றாகக் கலந்து, பிறகு சிறிது சிறிதாகத் தண்ணீர் சேர்த்து, மென்மையான மாவாகப் பிசைந்துகொள்ளவும். மாவு மிகவும் கெட்டியாக இருந்தால், அதை அச்சு வழியாகப் பிழிவது கடினமாகிவிடும்.

- முறுக்கு அச்சினை எடுத்து, அதில் தேன்குழல் பிழியும் தட்டைப் பொருத்தவும். பிறகு, பிசைந்து வைத்துள்ள மாவை அதில் நிரப்பவும்.

- வாணலியில் தேவையான அளவு எண்ணெயை சேர்த்து சூடாக்கவும்.

- முறுக்கு குழாயிலிருந்து சூடான எண்ணெயில் நேரடியாகப் போடவும்.

- குறைந்த தீயில் பொரிக்கவும். குமிழ்கள் குறைந்து, முறுக்கு மேற்பரப்பில் தெரியத் தொடங்கும் போது, ​​அதைத் திருப்பிப் போடவும்.

- அடுப்பை மிதமான தீயில் வைத்து, முறுக்கு இருபுறமும் பொன்னிறமாகும் வரை தொடர்ந்து வேகவைக்கவும்.

- எண்ணெய் வடிய காகிதத் துண்டின் மீது முறுக்கை போடவும். இதேபோல் அனைத்து மாவையும் செய்யவும்.

- தேவைக்கேற்ப தீயைக் கட்டுப்படுத்திக் கொள்ளவும். ஆனால், சரியான நிறம் கிடைப்பதற்கு குறைந்த அல்லது நடுத்தர தீயில் வைத்து வேகவைக்கவும்.

- அவ்வளவுதான் சூப்பரான தயிர் பச்சை மிளகாய் முறுக்கு ரெடி!