தீபாவளிக்கு இந்த அவல் முறுக்கை செஞ்சு பாருங்க - வாரக்கணக்கில் வைச்சு சூப்பரா சாப்பிடலாம்

Diwali Special Aval Murukku Recipe in Tamil: தீபாவளி பண்டிகை இன்னும் ஓரிரு நாளில் வரப்போகிறது. அனைவரும் வீட்டில் தீபாவளிக்கு என்ன பலகாரங்களை செய்யலாம் என்று லிஸ்ட் போடா தொடங்கியிருப்போம். முறுக்கு இல்லாமல் எந்த வீட்டின் பலகார பட்டியலிலும் முழுமையடையாது? இதுவரை நீங்கள் முறுக்கு செய்ய பலவிதமான மாவை சேர்த்தோ அல்லது அரிசியை ஊற வைத்து அரைத்தோ முறுக்கு சுட்டிருப்பீர்கள்.

ஆனால் அவலை வைத்து முறுக்கு சுட்டிருக்கிறீர்களா? இது கேட்பதற்கு வினோதமாக இருக்கலாம். ஆனால் அவலை வைத்து செய்யப்படும் இந்த முறுக்கு நீங்கள் வழக்கமாக செய்யும் முறுக்கை விட சூப்பராக இருக்கும். இப்படி ஒருமுறை முறுக்கு சுட்டால், இனிமேல் இந்த மாதிரி முறுக்கு சுடுவீர்கள். அந்த அளவிற்கு இந்த முறுக்கு செய்வதற்கு எளிதாகவும், சுவையாகவும் இருக்கும்.

உங்களுக்கு தீபாவளி ஸ்பெஷல் அவல் முறுக்கு சுடுவது என்று தெரிந்து கொள்ள வேண்டுமா? கீழே அவல் முறுக்கு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 1 கப் அரிசி மாவு
- ½ கப் அவல்
- ¼ கப் பொட்டுக்கடலை
- 1 ஸ்பூன் சீரகம்
- 1 ஸ்பூன் வெண்ணெய்
- ஒரு சிட்டிகை பெருங்காயத்தூள்
- 1 ஸ்பூன் மிளகாய்த்தூள்
- 2 கப் எண்ணெய் (பொரிப்பதற்கு)

செய்முறை:

- அவலை ஒரு மிக்ஸி ஜாரில் போட்டு, நைஸான பொடியாக அரைத்து தனியே எடுத்து வைத்துக்கொள்ளவும்.

- அதேபோல பொட்டுக்கடலையையும் ஒரு மிக்ஸி ஜாரில் போட்டு, நைஸான பொடியாக அரைத்து தனியே எடுத்து வைத்துக்கொள்ளவும்.

- ஒரு சல்லடையை எடுத்து, அதில் அரிசி மாவு, அரைத்து வைத்துள்ள அவல் பொடி மற்றும் பொட்டுக்கடலை மாவு ஆகியவற்றைச் சேர்த்து, கட்டிகள் ஏதுமின்றி ஒன்றாகச் சலித்துக்கொள்ளவும்.

- சலித்து வைத்துள்ள மாவுக் கலவையுடன் சீரகம், வெண்ணெய், மிளகாய்த்தூள், உப்பு மற்றும் பெருங்காயம் ஆகியவற்றைச் சேர்க்கவும்.

- வெண்ணெய் மாவுடன் நன்கு கலக்கும்படி அனைத்தையும் நன்றாகப் பிசையவும்.

- அதன்பிறகு, சிறிது சிறிதாகத் தண்ணீர் தெளித்து, மென்மையான மாவாகப் பிசையவும். இந்த மாவை மூடி தனியே எடுத்து வைக்கவும்.

- ஒரு அகலமான வாணலியில் எண்ணெயைச் சூடாக்கவும். எண்ணெய் சூடானதும், தேன்குழல் அச்சையும் எடுத்து, அதன் உட்புறத்தில் எண்ணெய் தடவிக்கொள்ளவும்.

- அச்சினுள் இரண்டு கைப்பிடி அளவு முறுக்கு மாவை நிரப்பவும்.

- எண்ணெய் போதுமான அளவு சூடானதும், துளைகள் கொண்ட ஒரு கரண்டியை எடுத்து, அதன் மீது எண்ணெய் தடவவும். அச்சைப் பயன்படுத்தி, அந்தக் கரண்டியின் மீது முறுக்கைப் பிழியவும்.

- கரண்டியை மெதுவாகத் திருப்பி, எண்ணெயினுள் முறுக்கைப் போடவும். இதேபோல் மீதமுள்ள மாவையும் ஒவ்வொரு முறுக்காக பிழிந்து வைக்கவும்.

- முறுக்கை மிதமான தீயில் வைத்து, அவ்வப்போது இருபுறமும் திருப்பிப் போட்டுப் பொரிக்கவும். முறுக்கு கருகிவிடாமல் பார்த்துக்கொள்ளவும்.

- முறுக்கு வெந்ததும் அதை வெளியே எடுத்து, அதிகப்படியான எண்ணெய் வடிய ஒரு காகிதத் துண்டின் மீது வைக்கவும்.

- முறுக்கு நன்கு ஆறிய பிறகு, அதன் மொறுமொறுப்புத்தன்மை நீங்காமல் இருக்க, காற்று புகாத டப்பாவில் போட்டுச் சேமித்து வைக்கவும்.

- அவ்வளவுதான் மொறுமொறுப்பான, சுவையான அவல் முறுக்கு ரெடி!