சப்பாத்திக்கு கேரட், பீன்ஸ் வெச்சு 15 நிமிடத்தில் இப்படி கிரேவி செய்யுங்க.. டேஸ்ட் வேற லெவல்-ல இருக்கும்..

Carrot Beans Gravy Recipe In Tamil: இன்று இரவு உங்கள் வீட்டில் சப்பாத்தி செய்யப் போகிறீர்களா? அதற்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? வீட்டில் பீன்ஸ் மற்றும் கேரட் உள்ளதா? அப்படியானால் அவற்றைக் கொண்டு அட்டகாசமான சுவையில் கிரேவி செய்யுங்கள்.

இந்த கேரட் பீன்ஸ் கிரேவி செய்வதற்கு சுவையாக இருப்பதோடு, செய்வதற்கு சுலபமாகவும் இருக்கும். முக்கியமாக இந்த கிரேவி 15 நிமிடத்தில் செய்யக்கூடியவாறு ஈஸியாக இருக்கும்.

உங்களுக்கு கேரட் பீன்ஸ் கிரேவியை எப்படி செய்வதென்று தெரிந்து கொள்ள வேண்டுமா? கீழே கேரட் பீன்ஸ் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 3 டேபிள் ஸ்பூன்
* சீரகம் - 1 டீஸ்பூன்
* வெங்காயம் - 3 (பொடியாக நறுக்கியது)
* உப்பு - 1 டீஸ்பூன்
* தக்காளி - 2
* கொத்தமல்லி - 1 கைப்பிடி
* முந்திரி - 4-5
* இஞ்சி பூண்டு பேஸ்ட் - 1 டேபிள் ஸ்பூன்
* மஞ்சள் தூள் - 1/4 டீஸ்பூன்
* காஷ்மீரி மிளகாய் தூள் - 1 டேபிள் ஸ்பூன்
* மல்லித் தூள் - 1 டேபிள் ஸ்பூன்
* கரம் மசாலா - 1 டீஸ்பூன்
* கேரட் - 1 (நறுக்கியது)
* பீன்ஸ் - 10 (நறுக்கியது)
* தண்ணீர் - தேவையான அளவு
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சீரகத்தை சேர்த்து தாளிக்க வேண்டும்.
* பின்னர் அதில் பொடியாக நறுக்கிய வெங்காயத்தை சேர்த்து, சிறிது உப்பு சேர்த்து கண்ணாடி பதத்திற்கு வதக்க வேண்டும்.
* வெங்காயம் வதங்குவதற்குள் மிக்சர் ஜாரில் தக்காளி, கொத்தமல்லி, முந்திரியைப் போட்டு, வெங்காயம் வதங்கியதும், பாதி வெங்காயத்தையும் மிக்சர் ஜாரில் போட்டு நன்கு மென்மையாக அரைத்துக் கொள்ள வேண்டும்.
* பின் வாணலியில் வதங்கி கொண்டிருக்கும் வெங்காயத்துடன் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* அதன் பின் நறுக்கிய கேரட் மற்றும் பீன்ஸை சேர்த்து 1 நிமிடம் வதக்க வேண்டும்.
* அதன் பின் அதில் அரைத்த மசாலாவை சேர்த்து கிளறி, அத்துடன் மஞ்சள் தூள், காஷ்மீரி மிளகாய் தூள், மல்லித் தூள், கரம் மசாலா மற்றும் சுவைக்கேற்ப உப்பு சேர்த்து 1 நிமிடம் வதக்க வேண்டும்.
* பிறகு சிறிது நீரை ஊற்றி கிளறி, மூடி வைத்து, மிதமான தீயில் வைத்து 10 நிமிடம் கொதிக்க வைத்து இறக்கி, கொத்தமல்லியைத் தூவினால் சுவையான கேரட் பீன்ஸ் கிரேவி தயார்.