ஆண் பெண் இரட்டையர் செல்லங்களுக்கான அழகமுது தமிழ் பெயர்கள்!

பெயர் வைக்கும் விதம்

இன்றைய காலத்தில் பிறக்கும் அனைத்து குழந்தைகளுக்கும் அழகான மாடர்னான பெயரை சூட்ட வேண்டும் என்று சில பெற்றோர் விரும்புவர்; சிலரோ தந்தை -தாயின் அல்லது முன்னோரின் பெயரை சூட்ட எண்ணுவர்; வேறு சிலர் தமிழ் பெயரை சூட்ட வேண்டும் என்று தமிழ் ஆர்வத்தால், ஆசை கொள்வர்; மேலும் பலர் ஸ்டைலான பெயரை, ட்ரெண்டிங்கில் இருக்கும் பெயரை வைக்க நினைப்பர்; மற்ற சிலர் சமஸ்கிருதம், ஜோதிடம் என்று ஆன்மிக வழியில், இலக்கிய வழியில் பெயர் சூட்ட துடிப்பர்.

இப்படிப்பட்ட பலவித பெற்றோர்களில் தமிழ் பெயர் சூட்ட வேண்டும் என்று நினைக்கும் பெற்றோருக்கான பதிப்பு இது! அதிலும் இரட்டையர் என்றாலே ரைமிங் பெயர்களை சரியான டைமிங்கில் வைக்க பெற்றோர் மனது பேராசை கொள்ளும். அந்த ஆசையை பூர்த்தி செய்திட உதவவே இந்த பதிப்பு!

ஆண் பெண் இரட்டைக் குழந்தைகளுக்கான அழகுத் தமிழ் பெயர்கள் என்னென்ன என்று படித்தறியலாம் வாருங்கள்.

இளமுகில் - இளமதி

முகில் என்றால் தமிழில் மேகம் என்று பொருள்; மேலும் மதி என்றால் சந்திரன் என்று பொருள். பிறக்கும் ஆண் - பெண் இரட்டையருக்கு இளமுகில் - இளமதி என்ற தமிழ் பெயரை சூட்டினால், தங்கையாகிய நிலவை கருமேகங்கள் சூழாமல், கடைசி வரை உடனிருந்து காத்து வருவான், வெண்மை மேகமாகிய முகிலன். இள எனும் முன்னெழுத்துக்கள் இந்த முகில் மற்றும் மதியுடன் இணையும் பொழுது அது ஒரு அற்புதமான உச்சரிப்பை தருகிறது; மேலும் இள எனும் இரு எழுத்துக்கள் குழந்தைகள் என்றும் இன்பமயமாய் இளமையுடன் இருக்க உதவுகிறது.

பார்த்திபன் - பார்கவி

பார்த்திபன் என்றால், மகாபாரத அர்ஜுனனின் வேறு பெயர், காவியத்தில் சோழ மகாராஜாக்களில் பலர் இந்த நாமத்துடன் விளங்கி புகழ் பெற்று திகழ்ந்தனர், அமைதி விரும்பி, ஆன்மிகவாதி, அறிவாளி, ஆற்றல் கொண்டவன் என்று பல அர்த்தங்கள் உள்ளன. பார்கவி என்ற பெயர் தேவைகளான, பார்வதி, துர்க்கை இவர்களின் வேறு பெயர் ஆகும்; மேலும் இந்நாமத்தை இரண்டாக பிரித்தால், பார் - உலகம் மற்றும் கவி - பாடல் என்று பொருள் தரும். உலகத்திற்கான கீதமாக உங்கள் மகளும், உலகம் ஆளும் நாயகனாக உங்கள் மகனும் திகழ இந்த பெயரை உங்கள் குழந்தைகளுக்கு சூட்டுங்கள்.

கவின் - காவ்யா

கவின் எனும் பெயருக்கு அழகு, தேஜஸ், அற்புதவொளி என்று பொருள்; மேலும் காவ்யா எனும் நாமம் காவியத்தின் பாடல், பாட்டு என்று பொருள் தரும். இந்த பெயர்களை உங்கள் ஆண் - பெண் இரட்டையருக்கு சூட்டினால், அவர்கள் வாழ்வில் அழகும் புகழும் பொங்கும். மேலும் அவர்தம் வாழ்க்கை அழகானதாக, காவியமாக மாறும் என்று கூட கூறலாம். கவின் எனும் நாமம் கொண்ட ஆண் ஆணழகனாக, அற்புத மகனாக திகழ்வான்; மேலும் காவ்யா எனும் பெயர் கொண்ட உங்கள் பெண் உலகம் போற்றும் காவியத் தலைவியாய் வாழ வேண்டும் என்று வாழ்த்துகிறோம்.

யஷ் - யஷஸ்வி

யஷ் எனும் பெயருக்கு அரசன், மரியாதைக்குரியவர், வசதி வாய்ப்புகள் வாய்ந்தவர், திறமையானவர், புகழ் பெற்றவர் என்று பல அர்த்தங்கள் உண்டு. மேலும் யஷஸ்வி எனும் பெயர் அழியாத புகழ் கொண்டு திகழ்பவர் எனும் பொருளைத் தருகிறது; யக்ஷஸ் பவ என்று சமஸ்கிருதத்தில் மற்றவர்களை ஆசிர்வதிக்கும் பொழுது கூறப்படும் வார்த்தை இந்த பெயராக தமிழில் தமிழ் குழந்தைகளுக்கு சூட்டப்படுகிறது. இதனால், யஷ் - யஷஸ்வி என்று குழந்தைகளை ஒவ்வொரு முறை அழைக்கும் பொழுதும் அவர்கள் ஆசிர்வாதத்தோடு, புகழோடு வாழ வேண்டும் என்ற வாழ்த்துக்கள் அவர்களைச் சேரும்.