பாகிஸ்தானின் நம்பர் ஒன் பணக்காரர் யார்? அவர் முகேஷ் அம்பானியை விட பணக்காரரா? உண்மை என்ன?

இந்தியாவின் பணக்காரர் யாரென்றால் முகேஷ் அம்பானி, அதானி என்று கூறுவார்கள். அதேசமயம் உலக பணக்காரர் யாரென்றால் எலன் மஸ்க், பில் கேட்ஸ் என்று கூறுவார்கள். ஆனால் நமது அண்டை நாடான பாகிஸ்தானின் மிகப்பெரிய பணக்காரர் யாரென்று உங்களுக்குத் தெரியுமா?

இந்தியாவைப் போலவே பாகிஸ்தானிலும் மிகப்பெரிய பணக்காரர்கள் உள்ளனர். அதில் முதலிடத்தில் இருப்பது 'ஷாஹித் கான்' என்று அழைக்கப்படும் ஷாஹித் ரஃபிக் 'ஷாட்' கான்தான். பாகிஸ்தானிய-அமெரிக்கரான இவர், உலகின் முன்னணி விளையாட்டுத் துறை வணிகப் பெருநிறுவனத் தலைவர்களில் ஒருவராக உள்ளார். பல்வேறு விளையாட்டு அணிகளைச் சொந்தமாக வைத்திருப்பது முதல் வாகன உற்பத்தி நிறுவனத்தை வழிநடத்துவது வரை, ஷாஹித் கான் பாகிஸ்தான் மற்றும் ஆசியாவில் செல்வாக்கு மிக்கவராகத் திகழ்கிறார்.

பாகிஸ்தானின் மிகப் பெரிய பணக்காரர் யார்?

புகழ்பெற்ற அமெரிக்க வாகன உதிரிபாகங்கள் விநியோக நிறுவனமான 'ஃப்ளெக்ஸ்-என்-கேட்' (Flex-N-Gate)-இன் உரிமையாளரான ஷாஹித் கான் பாகிஸ்தானின் நம்பர் ஒன் பணக்காரராக உள்ளார். இந்தியப் பெரும் கோடீஸ்வரர்களுடன் ஒப்பிடுகையில், அசிம் பிரேம்ஜி, ரேகா ஜுன்ஜுன்வாலா, மங்கள் பிரபாத் லோதா, விக்ரம் லால், முத்தூட் குடும்பத்தினர், என்.ஆர். நாராயண மூர்த்தி, நுஸ்லி வாடியா, பி.வி. கிருஷ்ணா ரெட்டி, விகாஸ் ஓபராய் மற்றும் பல பிரபலங்களை விட ஷாஹித் கான் முன்னிலையில் உள்ளார். அவரது சொத்து மதிப்பு சுமார் ரூ. 1,01,782 கோடி ஆகும்.

அதேசமயம், இந்தியாவின் முன்னணி தொழிலதிபரான முகேஷ் அம்பானியின் சொத்து மதிப்பு ரூ. 10.21 லட்சம் கோடியாக இருக்கிறது. இந்தியாவின் 17-வது பெரும் பணக்காரரான அசிம் பிரேம்ஜியின் செல்வத்தை விட அவர் பணக்காரராக உள்ளார். முதல் 10 இடங்களுக்குள் இடம்பெற்றுள்ள இந்தியக் கோடீஸ்வரர்களுடன் போட்டியிடுவது பாகிஸ்தானின் பெரும் பணக்காரரான ஷாஹித் கானால் இப்போதைக்கு முந்த முடியாது.

ஆரம்பகால வாழ்க்கை

தற்போது பாகிஸ்தானின் நம்பர் ஒன் பணக்காரராக இருக்கும் ஷாகித் கானின் ஆரம்பகால வாழ்க்கை அவ்வளவு எளிதானதாக இருக்கவில்லை. ஷாஹித் கான் 1950-ஆம் ஆண்டு ஜூலை 18-அன்று லாகூரில் ஒரு மிடில் கிளாஸ் குடும்பத்தில் பிறந்தார். அவரது குடும்பத்தினர் கட்டுமானத் தொழிலில் ஈடுபட்டிருந்தனர். அவரது தாயார் கணிதப் பேராசிரியராகவும், தந்தையார் ஒரு கடையை நடத்தி வருபவராகவும் இருந்தனர். ஷாஹித்திற்கு தாரிக் ரஃபிக் கான் என்ற சகோதரரும் இருந்தார், ஆனால் துரதிர்ஷ்டவசமாக அவர் தனது 20-களின் தொடக்கத்திலேயே காலமானார். இது அவரது குடும்பத்திற்கு பெரிய அடியாக இருந்தது, அவரது இறப்புக்குப் பின் குடும்பத்தின் அனைத்துப் பொறுப்புகளும் ஷாஹித்தின் தோள்களில் விழுந்தன. 16 வயதிலேயே, ஷாஹித்தின் பெற்றோர் அவரை மேற்படிப்பிற்காக அமெரிக்காவிற்கு அனுப்பினர். அவர் அர்பானா-சாம்பெய்னில் உள்ள இல்லினாய்ஸ் பல்கலைக்கழகத்தில் சேர்ந்தார்.

ஷாஹித் கான் அமெரிக்காவில் படித்துக்கொண்டிருந்தபோது, ​​கூடுதல் செலவுப் பணம் சம்பாதிப்பதற்காக பாத்திரம் கழுவும் வேலையும் செய்தார். இல்லினாய்ஸ் பல்கலைக்கழகத்தில் பயின்ற காலத்தில், ஷாஹித் பீட்டா தீட்டா பை என்ற சகோதரத்துவ அமைப்பில் சேர்ந்ததாகக் கூறப்படுகிறது, இது அவரது ஒட்டுமொத்த ஆளுமையையும் மாற்றியமைக்க உதவியது. பட்டப்படிப்பிற்காக, ஷாஹித் கான் கிரெய்ஞ்சர் பொறியியல் கல்லூரியில் சேர்ந்து, அங்கு தொழிற்பொறியியலில் பி.எஸ்சி பட்டம் பெற்றார்.

முக்கிய வருவாய் ஆதாரங்கள் மற்றும் வணிகங்கள்

ஷாஹித் கானின் வாழ்க்கையில் மிகவும் ஊக்கமளிக்கும் நிகழ்வுகளில் ஒன்று, அவர் கல்லூரியில் படித்துக் கொண்டிருந்தபோது ஒரு இளநிலை ஊழியராகப் பணியாற்றிய ஃபிளெக்ஸ்-என்-கேட் நிறுவனத்தை வாங்கியதுதான். 1980-ல் ஃபிளெக்ஸ்-என்-கேட்டை வாங்குவதற்கு முன்பு, அவர் பம்பர் வொர்க்ஸ் நிறுவனத்தை நிறுவினார், அது வாகனச் சந்தையில் குறிப்பிடத்தக்க கவனத்தைப் பெற்றது. 2019-ஆம் ஆண்டுக்குள், ஃபிளெக்ஸ்-என்-கேட் உலகின் பல்வேறு பகுதிகளில் 69 உற்பத்தி ஆலைகளைத் திறந்துள்ளது. ஷாஹித் கானின் தலைமையின் கீழ், ஃபிளெக்ஸ்-என்-கேட் உலகின் ஏழாவது பெரிய அமெரிக்க வாகன உதிரிபாகங்களை வழங்கும் நிறுவனமாக உள்ளது.

Flex-N-Gate தவிர, ஷாஹித் கானின் முக்கிய வருமான ஆதாரங்கள் அவரது விளையாட்டு அணிகளிலிருந்து வருகின்றன. அவர் ஜாக்சன்வில் ஜாகுவார்ஸ் மற்றும் ஃபுல்ஹாம் எஃப்.சி. ஆகிய இரண்டு புகழ்பெற்ற விளையாட்டு அணிகளின் உரிமையாளர் ஆவார். இது மட்டுமல்லாமல், அவர் All Elite Wrestling இணை உரிமையாளராகவும், பிளாக் நியூஸ் சேனலில் ஒரு முக்கிய பங்குதாரராகவும் உள்ளார்.