215 ஆண்டுகளுக்கு முன்னாலேயே வெளிநாட்டில் திறக்கப்பட்ட முதல் இந்திய உணவகம் எது தெரியுமா?

இந்திய உணவுகள் உலகம் முழுவதும் புகழ் பெற்றவை, அதனால்தான் உலகின் அனைத்து நாடுகளிலும் இந்திய உணவகங்கள் திறக்கப்பட்டுள்ளன. உலகின் எந்த நாட்டுக்கு சென்றாலும் தற்போது நமக்கு இந்திய உணவுகள் கிடைக்கும். ஆனால் முதல் முதலாக வெளிநாட்டில் திறக்கப்பட்ட இந்திய உணவகம் எதுவென்று எப்போதாவது சிந்தித்து உள்ளீர்களா?

அந்த இந்திய உணவகம் லண்டனில் திறக்கப்பட்டது. 215 ஆண்டுகளுக்கு முன்பு பீகார் மாநிலம் பாட்னாவிலிருந்து லண்டனுக்குச் சென்று அங்கு முதல் இந்திய உணவகத்தைத் திறந்த அவரைப் பற்றி மிகச் சிலருக்கு மட்டுமே தெரியும். அவர்தான் பாட்னாவின் சேக்-தின்-முகமதுதான்.

Brighton and Hove அருங்காட்சியகத்தின் வலைத்தளம், (brightonmuseums.org.uk), லண்டனில் உள்ள போர்ட்மேன் சதுக்கத்திற்கு அருகில் சேக்-தின்-முகமது ''Hindoostane Coffee House' என்ற உணவகத்தைத் திறந்ததாகவும், அது இந்திய உணவு வகைகளை வழங்கியதாகவும் கூறுகிறது. இது பிரிட்டனின் முதல் இந்திய உணவகம், இது 1810 இல் நிறுவப்பட்டது.

சேக்-தின்-முகமது யார்?

இந்தியாவின் பாட்னாவை அடிப்படையாகக் கொண்ட ஒரு முஸ்லிம் குடும்பத்தில் 1759 ஆம் ஆண்டு பிறந்த முகமது, பிரிட்டிஷ் கிழக்கிந்திய கம்பெனியின் இராணுவத்தில் தனது வாழ்க்கையைத் தொடங்கி, 1782 வரை இராணுவத்தில் பணியாற்றினார். பின்னர், அவர் தனது நண்பருடன் அயர்லாந்துக்குச் சென்றார். அங்கு அவர் ஜேன் டேலி என்ற பெண்ணைச் சந்தித்தார், பின்னர் விரைவிலேயே அவரை திருமணம் செய்து கொண்டார்.

இந்திய உணவகத்தை லண்டனில் எப்படி திறந்தார்?

திருமணம் செய்த பின்னர் அவர் மனைவியுடன் இங்கிலாந்துக்குச் சென்றார். அங்கு அவர் புதிதாக வியாபாரம் ஒன்றை தொடங்க திட்டமிட்டார். இது ஒரு பெரிய பிரச்சனையாக இருக்கவில்லை, ஏனெனில் அவர் தனது பல திறமைகளில் ஒன்றைப் பயன்படுத்தி ஒரு தொழிலை உருவாக்கி நல்ல வருமானம் ஈட்ட முடியும்என்று நம்பினார். அவருக்கு ஒரு தனித்துவமான யோசனை வந்தது, அதுதான் லண்டனில் இந்திய உணவு வகைகளை பரிமாறுவது, அதன் விளைவாக1810 இல் இங்கிலாந்தின் முதல் இந்திய உணவகமான 'இந்துஸ்தான் காபி ஹவுஸ்' திறக்கப்பட்டது.

துரதிர்ஷ்டவசமாக, அவரது உணவகம் அந்த காலகட்டத்தில் மிகவும் நவீனமானதாக இருந்தது, அதனால் அது லாபகரமானதாக அமையவில்லை. ஆனால், உணவகம் வெற்றிபெறாததால் அவர் மனச்சோர்வடையவில்லை, மாறாக 1814 இல் பிரைட்டனுக்கு குடிபெயர்ந்தார், அங்கு அவர் மிகப்பெரிய வெற்றியைப் பெற்றார்.

அந்த பகுதியில் கடல் குளியல் மிகவும் பிரபலமாக இருந்த காலத்தில், கடற்கரையில் உள்ள பூல் பள்ளத்தாக்கில் ஒரு உட்புற குளியல் தொட்டியைத் திறந்தவர் அவர்தான். இங்கு, இந்திய மூலிகைகள் மற்றும் மருந்துகளைப் பயன்படுத்தி சூடான நீர் மற்றும் நீராவி குளியல் வழங்கும் முதல் நீராவி குளியல் மையம் திறக்கப்பட்டது. இதை அந்த காலகட்டத்தின் முதல் ஸ்பா என்றே கூறலாம்.

அந்த நேரத்தில், அவரது புதுமையான யோசனைகளும் அவற்றின் ஆக்கப்பூர்வமான செயல்படுத்தலும் ஒரு புரட்சியைக் கொண்டுவர அவருக்கு உதவியது. முகமதுவின் குளியல் தொட்டியில், குழாய்களைப் பயன்படுத்தி கொண்டு வரப்பட்டு சூடேற்றப்பட்ட கடல் நீரில் மக்கள் சூடான குளியல் எடுக்க முடிந்தது. பிரிட்டனின் வானிலை மிகவும் குளிராக இருந்ததால் இது மக்களிடையே மிகவும் பிரபலமானது.

எப்படி பல யோசனைகளுக்கு முன்னோடியாக இருந்தார்?

உணவகம் மற்றும் குளியல் இல்லம் மட்டுமல்ல, ஷாம்பூவைக் கண்டுபிடித்தவராகவும் சேக் கருதப்படுகிறார். உண்மைதான், அவர் இந்தியாவிலிருந்து ஆயுர்வேத மருந்துகளையும் பல சிகிச்சைகளையும் லண்டனுக்கு கொண்டு சென்றார், இந்திய எண்ணெய்களால் ஷாம்பு செய்வதை உள்ளடக்கிய ஒரு வகை அரோமாதெரபி மசாஜ் ஒன்றைத் தொடங்கினார்.

ஆங்கிலத்தில் ஒரு புத்தகத்தை எழுதிய முதல் இந்தியர் சேக்-தின்-முகமது ஆவார், அதை அவர் 1794 ஆம் ஆண்டு வெளியிட்டார். அதற்கு 'தி டிராவல்ஸ் ஆஃப் டீன் முகமது' என்று பெயரிடப்பட்டது, இது ஆங்கிலத்தில் வெளியிட்ட முதல் இந்திய எழுத்தாளர் என்ற பெருமையை அவருக்குப் பெற்றுத்தந்தது.